ആഗോള ഇന്ധന പ്രതിസന്ധിയുടെയും വിദേശ നാണയ ശേഖരം സംരക്ഷിക്കേണ്ടതിന്റെയും പ്രാധാന്യം ഊന്നിപ്പറഞ്ഞ് പ്രധാനമന്ത്രി നരേന്ദ്ര മോദി സ്വന്തം മാതൃകയിലൂടെ ജന ശ്രദ്ധ നേടുന്നു. തന്റെ ഔദ്യോഗിക വാഹനവ്യൂഹത്തിന്റെ വലുപ്പം പകുതിയോളം കുറച്ചുകൊണ്ടാണ് പ്രധാനമന്ത്രി ഈ പുതിയ സന്ദേശം നൽകിയിരിക്കുന്നത്.
ഹൈദരാബാദിൽ നടത്തിയ പ്രസംഗത്തിന് തൊട്ടുപിന്നാലെയാണ് പ്രധാനമന്ത്രി തന്റെ വാഹനവ്യൂഹത്തിൽ വലിയ മാറ്റം വരുത്തിയത്. വഡോദര, ഗുവാഹത്തി സന്ദർശന വേളകളിൽ പകുതിയോളം വാഹനങ്ങൾ ഒഴിവാക്കിയാണ് അദ്ദേഹം യാത്ര ചെയ്തത്. സുരക്ഷാ ക്രമീകരണങ്ങളിൽ ഒട്ടും വിട്ടുവീഴ്ച ചെയ്യാതെ തന്നെയായിരുന്നു ഈ നീക്കം.
സ്പെഷ്യൽ പ്രൊട്ടക്ഷൻ ഗ്രൂപ്പിന്റെ സുരക്ഷാ നിർദ്ദേശങ്ങൾ കർശനമായി പാലിച്ചുകൊണ്ട് തന്നെയാണ് വാഹനങ്ങളുടെ എണ്ണം കുറച്ചത്. അത്യാവശ്യ സുരക്ഷാ വാഹനങ്ങൾ നിലനിർത്തിക്കൊണ്ട് അധികമായി ഉണ്ടായിരുന്ന വാഹനങ്ങൾ ഒഴിവാക്കുകയായിരുന്നു. നീളമേറിയ വാഹനവ്യൂഹങ്ങൾ പലപ്പോഴും വലിയ ഗതാഗതക്കുരുക്കിന് കാരണമാകാറുണ്ട്. പ്രധാനമന്ത്രിയുടെ ഈ നീക്കം പൊതുജനങ്ങളുടെ യാത്രാക്ലേശം കുറയ്ക്കാനും ട്രാഫിക് മാനേജ്മെന്റ് എളുപ്പമാക്കാനും സഹായിക്കും.
പ്രധാനമന്ത്രിയുടെ ഈ ചുവടുവെപ്പിന് പിന്നാലെ ഉത്തർപ്രദേശ്, മധ്യപ്രദേശ് തുടങ്ങിയ സംസ്ഥാനങ്ങളിൽ മുഖ്യമന്ത്രിമാരും മന്ത്രിമാരും തങ്ങളുടെ വാഹനവ്യൂഹത്തിന്റെ വലുപ്പം കുറയ്ക്കണമെന്ന് നിർദ്ദേശിച്ചിട്ടുണ്ട്. ആഗോളതലത്തിൽ പെട്രോൾ, ഡീസൽ വില വർദ്ധിക്കുന്ന സാഹചര്യത്തിൽ ഇന്ധനം കരുതലോടെ ഉപയോഗിക്കണമെന്ന് പ്രധാനമന്ത്രി ജനങ്ങളോട് അഭ്യർത്ഥിച്ചിരുന്നു. വിദേശ നാണയ ശേഖരം ലാഭിക്കുന്നതിനായി ഒരു വർഷത്തേക്ക് സ്വർണ്ണം വാങ്ങുന്നത് ഒഴിവാക്കാനും കോവിഡ് കാലത്തെ പോലെ ഓൺലൈൻ മീറ്റിംഗുകൾ പ്രോത്സാഹിപ്പിക്കാനും അദ്ദേഹം നിർദ്ദേശിച്ചിട്ടുണ്ട്.
പ്രധാനമന്ത്രിയുടെ ഈ നടപടി സർക്കാരിന്റെ അനാവശ്യ ചിലവുകൾ കുറയ്ക്കുന്നതിനും വിഭവങ്ങൾ കൃത്യമായി വിനിയോഗിക്കുന്നതിനും വലിയ ഉദാഹരണമായി മാറിയിരിക്കുകയാണ്. സാധാരണക്കാർക്ക് ബുദ്ധിമുട്ടില്ലാത്ത രീതിയിലുള്ള വിവിഐപി നീക്കങ്ങൾ വരും ദിവസങ്ങളിൽ കൂടുതൽ വ്യാപകമാകുമെന്നാണ് റിപ്പോർട്ടുകൾ.
