ഐ.പി.എൽ 2026-ൽ സൺറൈസേഴ്സ് ഹൈദരാബാദിനോട് ഏറ്റ കനത്ത തോൽവിക്ക് പിന്നാലെ, ചെപ്പോക്ക് സ്റ്റേഡിയത്തിൽ ചെന്നൈ ആരാധകരുടെ കണ്ണുനിറച്ച് മഹേന്ദ്ര സിംഗ് ധോണിയുടെ വൈകാരിക രംഗങ്ങൾ. ഈ സീസണിൽ പരിക്കുമൂലം ഒരൊറ്റ മത്സരത്തിൽ പോലും കളിക്കാതിരുന്ന ധോണി, ചെപ്പോക്കിലെ ഈ സീസണിലെ അവസാന മത്സരത്തിന് ശേഷം മൈതാന മധ്യത്തിലെത്തി ആരാധകർക്ക് നന്ദി പറഞ്ഞു.
മത്സരശേഷം ടീം ഫോട്ടോ എടുക്കാനായി മൈതാനത്തേക്ക് ഇറങ്ങി. തുടർന്ന് ചെപ്പോക്കിലെ ഗാലറിയെ വലംവെച്ച് തന്നെ കാത്തിരുന്ന പതിനായിരക്കണക്കിന് ആരാധകർക്ക് അദ്ദേഹം നന്ദി അറിയിച്ചു. മത്സരത്തിന് പിന്നാലെ കമന്റേറ്ററായി സ്റ്റേഡിയത്തിലുണ്ടായിരുന്ന മുൻ ചെന്നൈ താരം സുരേഷ് റെയ്ന, ധോണിയുമായി നടത്തിയ സംഭാഷണം സ്റ്റാർ സ്പോർട്സിലൂടെ വെളിപ്പെടുത്തി. ഇത് കേട്ട് ആരാധകരുടെ നെഞ്ച് തകർന്നിരിക്കുകയാണ്.
റെയ്ന ധോണിയോട് പറഞ്ഞു” ഈ സീസണിൽ നിങ്ങൾ കളിച്ചിട്ടില്ല, അതുകൊണ്ട് ഇതൊരു മിസ്ഡ് കോൾ മാത്രമാണ്. അടുത്ത വർഷം നിർബന്ധമായും തിരിച്ചുവരണം.” മറുപടിയായി “എന്റെ ശരീരം ഇപ്പോൾ അൽപ്പം വീക്ക് ആണ് , അൽപ്പം ശാരീരിക ബുദ്ധിമുട്ടുകൾ ഉണ്ട് ” എന്നാണ് ധോണി പറഞ്ഞത്. എന്നാൽ തങ്ങൾ ഇതൊന്നും വിശ്വസിക്കില്ലെന്നും ധോണി അടുത്ത വർഷം കളിക്കുമെന്നാണ് പ്രതീക്ഷയെന്നും റെയ്ന കൂട്ടിച്ചേർത്തു. ശരീരം പഴയതുപോലെ സഹകരിക്കാത്തതിനാൽ അടുത്ത സീസണിൽ ധോണി കളിക്കാനിറങ്ങുന്നത് ബുദ്ധിമുട്ടാകുമെന്നാണ് ഈ വാക്കുകൾ സൂചിപ്പിക്കുന്നത്.
മത്സരശേഷമുള്ള വാർത്താസമ്മേളനത്തിൽ സിഎസ്കെ ഹെഡ് കോച്ച് സ്റ്റീഫൻ ഫ്ലെമിംഗിനോട് ധോണിയുടെ ഭാവിയെക്കുറിച്ച് ചോദ്യങ്ങൾ ഉയർന്നു. എന്നാൽ ഇതിനോട് കൃത്യമായ മറുപടി നൽകാൻ ഫ്ലെമിംഗ് തയ്യാറായില്ല. “അത് മാനേജ്മെന്റ് എടുക്കേണ്ട തീരുമാനമാണ്. ധോണി ഈ സീസണിൽ കളിച്ചില്ലെങ്കിലും ടീമിനൊപ്പം ഉണ്ടായിരുന്നു എന്നത് യുവതാരങ്ങൾക്ക് വലിയ ആത്മവിശ്വാസമാണ് നൽകിയത്. ടീമിൽ അദ്ദേഹത്തിന്റെ സ്വാധീനം വളരെ വലുതാണ്. ചെന്നൈയുടെ ഭാവിക്കായുള്ള പുതിയ തലമുറ കളിക്കാരെ വാർത്തെടുക്കാൻ ഞങ്ങൾക്ക് കഴിഞ്ഞിട്ടുണ്ട്,” ഫ്ലെമിംഗ് പറഞ്ഞു.
