ഐപിഎൽ 2026-ൽ സൺറൈസേഴ്സ് ഹൈദരാബാദും ചെന്നൈ സൂപ്പർ കിംഗ്സും തമ്മിൽ നടന്ന വാശിയേറിയ മത്സരത്തിനിടയിലെ തർക്കങ്ങൾക്ക് പിന്നാലെ, മൈതാനത്തിന് പുറത്ത് സ്നേഹം പങ്കുവെച്ച് മലയാളി താരം സഞ്ജു സാംസണും ദക്ഷിണാഫ്രിക്കൻ സൂപ്പർ താരം ഹെന്റിച്ച് ക്ലാസനും. മത്സരത്തിനിടയിൽ ഇരുവർക്കുമിടയിൽ ഉണ്ടായ ചില ചൂടേറിയ നിമിഷങ്ങൾക്ക് വിരാമമിട്ടുകൊണ്ട് ഇരുവരും ഇൻസ്റ്റാഗ്രാമിൽ പങ്കുവെച്ച ചിത്രങ്ങളാണ് ഇപ്പോൾ ക്രിക്കറ്റ് ലോകത്ത് തരംഗമാകുന്നത്.
മത്സരത്തിന് ശേഷം ഹെന്റിച്ച് ക്ലാസനൊപ്പമുള്ള ഒരു മനോഹരമായ ചിത്രം പങ്കുവെച്ചുകൊണ്ടാണ് സഞ്ജു ആദ്യം രംഗത്തെത്തിയത്. “കളിക്കളത്തിൽ പലതും സംഭവിക്കാം, പക്ഷേ അതിന് പുറത്ത് ഈ അത്ഭുത മനുഷ്യനോട് എനിക്ക് വലിയ സ്നേഹവും ബഹുമാനവുമുണ്ട്,” എന്നായിരുന്നു ക്ലാസനെ ടാഗ് ചെയ്തുകൊണ്ട് സഞ്ജു കുറിച്ചത്.
സഞ്ജുവിന്റെ സ്റ്റോറി റീ-പോസ്റ്റ് ചെയ്തുകൊണ്ട് ഹെന്റിച്ച് ക്ലാസൻ നൽകിയ മറുപടിയാണ് ആരാധകരുടെ കൈയടി നേടുന്നത്. “ഒരുപാട് സ്നേഹവും ബഹുമാനവും ബഡ്ഡി. നിന്റെ കളി കാണുന്നത് എനിക്ക് എപ്പോഴും ഇഷ്ടമാണ്. നീ നിന്റെ ശൈലിയിൽ തന്നെ മുന്നോട്ട് പോകൂ. നമ്മൾ തമ്മിൽ ഇപ്പോൾ എല്ലാ പ്രശ്നങ്ങളും പരിഹരിച്ചു. അടുത്ത പോരാട്ടത്തിനായി ഞാൻ കാത്തിരിക്കുന്നു,” എന്ന് ക്ലാസൻ കുറിച്ചു.
ചെന്നൈ സൂപ്പർ കിംഗ്സും സൺറൈസേഴ്സ് ഹൈദരാബാദും ഇന്നലെ നടന്ന നിർണ്ണായകമായ ‘സൗത്ത് ഇന്ത്യൻ ഡെർബി’ മത്സരത്തിനിടയിലാണ് നാടകീയ രംഗങ്ങൾ അരങ്ങേറിയത്. ഹൈദരാബാദ് ബാറ്റിംഗിന്റെ പതിനഞ്ചാം ഓവറിലായിരുന്നു സംഭവം. നൂർ അഹമ്മദിന്റെ പന്തിൽ ഹെൻറിച്ച് ക്ലാസനെ സഞ്ജു സാംസൺ സ്റ്റംപിംഗിലൂടെ പുറത്താക്കി. വിക്കറ്റ് നഷ്ടമായതിന് പിന്നാലെ ഇരുവരും തമ്മിൽ വാക്കേറ്റമുണ്ടാകുകയും പരസ്പരം കോർത്ത് മുന്നോട്ട് വരികയുമായിരുന്നു. രംഗം വഷളായതോടെ ചെന്നൈ സൂപ്പർ കിംഗ്സ് താരങ്ങൾ ഇടപെട്ടാണ് ഇരുവരേയും പിടിച്ചുമാറ്റിയത്. സംഭവത്തിൽ മാച്ച് റഫറി അന്വേഷണം ആരംഭിച്ചിട്ടുണ്ടെന്നും ഇരുവർക്കും കനത്ത പിഴ ലഭിക്കാൻ സാധ്യതയുണ്ടെന്നുമാണ് വിവരം.
