അമേരിക്കൻ വിദേശകാര്യ സെക്രട്ടറി മാർക്കോ റൂബിയോ ഇന്ത്യ സന്ദർശന വേളയിൽ പുതിയൊരു “അമേരിക്ക ഫസ്റ്റ്” വിസ ഷെഡ്യൂളിംഗ് സംവിധാനം പ്രഖ്യാപിച്ചു. വാഷിംഗ്ടണും ന്യൂഡൽഹിയും തമ്മിലുള്ള വാണിജ്യ, സാമ്പത്തിക ബന്ധങ്ങൾ കൂടുതൽ ശക്തിപ്പെടുത്തുന്നതിന്റെ ഭാഗമായാണ് ഈ പുതിയ വിസ നടപടിക്രമം ഏർപ്പെടുത്തുന്നത്.
ന്യൂഡൽഹിയിലെ യുഎസ് എംബസി സപ്പോർട്ട് അനക്സ് കെട്ടിടത്തിന്റെ ഉദ്ഘാടന ചടങ്ങിൽ വെച്ചാണ് മാർക്കോ റൂബിയോ ഈ പുതിയ സംവിധാനം പ്രഖ്യാപിച്ചത്. ഇരുരാജ്യങ്ങളും തമ്മിലുള്ള സാമ്പത്തിക പങ്കാളിത്തം കൂടുതൽ കാര്യക്ഷമമാക്കാനും വിസ ലഭ്യതയിലെ കാലതാമസം ഒഴിവാക്കാനും ലക്ഷ്യമിട്ടാണ് ഈ പുതിയ ‘എഐ’ അധിഷ്ഠിത സംവിധാനം കൊണ്ടുവരുന്നത്.
അമേരിക്കയുമായുള്ള വ്യാപാര-സാമ്പത്തിക ബന്ധങ്ങൾ ശക്തിപ്പെടുത്തുന്ന ബിസിനസ് പ്രൊഫഷണലുകൾക്ക്, വിസ അപ്പോയിന്റ്മെന്റ് ലഭിക്കുന്നതിൽ മുൻഗണന ലഭിക്കും. വരാനിരിക്കുന്ന മാസങ്ങളിൽ തന്നെ ഇന്ത്യയിൽ ഈ സംവിധാനം പരീക്ഷണാർത്ഥം നടപ്പിലാക്കും. നിക്ഷേപക കരാറുകൾ ഉറപ്പിക്കാൻ യാത്ര ചെയ്യുന്ന എക്സിക്യൂട്ടീവുകൾ, അമേരിക്കൻ സാങ്കേതികവിദ്യകൾ ഇൻസ്റ്റാൾ ചെയ്യുന്ന എൻജിനീയർമാർ, ഗവേഷകർ എന്നിവർക്ക് വിസ അപ്പോയിന്റ്മെന്റുകൾ വേഗത്തിൽ ലഭിക്കാൻ ഈ സംവിധാനം സഹായിക്കും.
ഇരുരാജ്യങ്ങളും തമ്മിലുള്ള വാണിജ്യ ബന്ധം ഇപ്പോൾ 20 ബില്യൺ ഡോളറിലധികം നിക്ഷേപങ്ങൾ എന്ന നിലയിലേക്ക് വളർന്നിട്ടുണ്ട്. ഈ വളർച്ചയെ നിലനിർത്താൻ വിസ സംവിധാനത്തിലെ ഇത്തരം പരിഷ്കാരങ്ങൾ അനിവാര്യമാണെന്ന് റൂബിയോ വ്യക്തമാക്കി.മുംബൈ പോലുള്ള വലിയ കോൺസുലേറ്റുകളിൽ ബി-1/ബി-2 (B-1/B-2), എച്ച്-1ബി (H-1B) വിസകൾക്കായി 100 ദിവസത്തിലധികം കാത്തിരിക്കേണ്ടി വരുന്നത് വലിയ വെല്ലുവിളിയായിരുന്നു. ഈ കാലതാമസം ഒഴിവാക്കാനും, വാണിജ്യ ഇടപാടുകൾ വേഗത്തിലാക്കാനും വേണ്ടിയാണ് ഇന്ത്യയെ പൈലറ്റ് പ്രോജക്റ്റിനായി അമേരിക്ക തിരഞ്ഞെടുത്തത്. ഇന്ത്യയുമായുള്ള തന്ത്രപരമായ ബന്ധത്തിന് അമേരിക്ക നൽകുന്ന വലിയ പ്രാധാന്യത്തെയാണ് ഈ തീരുമാനം കാണിക്കുന്നത്.
