ലഖ്നൗ : ഉത്തർപ്രദേശ് തിരഞ്ഞെടുപ്പിനായി കോൺഗ്രസ് ശക്തമായ പദ്ധതികൾ തയ്യാറാക്കിയിട്ടുണ്ടെന്ന് പ്രതിപക്ഷ നേതാവ് രാഹുൽ ഗാന്ധി. യുപി നിയമസഭാ തിരഞ്ഞെടുപ്പ് ലക്ഷ്യമിട്ട് വൻ ജനസമ്പർക്ക പരിപാടികൾക്കാണ് കോൺഗ്രസ് തയ്യാറെടുക്കുന്നത്. പഴയ തെറ്റുകൾ തിരുത്തിക്കൊണ്ട് ഇത്തവണത്തെ ഉത്തർപ്രദേശ് നിയമസഭാ തിരഞ്ഞെടുപ്പിൽ വലിയ മുന്നേറ്റം കാഴ്ചവയ്ക്കും എന്നും രാഹുൽ ഗാന്ധി സൂചിപ്പിച്ചു.
കഴിഞ്ഞകാല തെരഞ്ഞെടുപ്പുകളിൽ പാർട്ടിക്ക് സംഭവിച്ച പാളിച്ചകൾ പരസ്യമായി സമ്മതിച്ചുകൊണ്ടായിരുന്നു രാഹുൽ ഗാന്ധിയുടെ ഈ പ്രഖ്യാപനം. സമാജ്വാദി പാർട്ടിയുമായുള്ള സഖ്യം നിലനിർത്തിക്കൊണ്ടുതന്നെ, യുപിയിൽ പാർട്ടിയുടെ അടിത്തറ ശക്തമാക്കാനാണ് കോൺഗ്രസിന്റെ പുതിയ നീക്കം. കഴിഞ്ഞ നിയമസഭാ തെരഞ്ഞെടുപ്പുകളിൽ പ്രിയങ്ക ഗാന്ധിയുടെ നേതൃത്വത്തിലായിരുന്നു ക്യാമ്പയിനുകൾ പ്രധാനമായും നടന്നതെങ്കിൽ, ഇത്തവണ രാഹുൽ ഗാന്ധിയെ നേരിട്ട് യുപിയുടെ തെരഞ്ഞെടുപ്പ് മുഖമാക്കാനാണ് പാർട്ടി തീരുമാനം. വർദ്ധിച്ചുവരുന്ന ഇന്ധനവിലയും വിലക്കയറ്റവും തൊഴിലില്ലായ്മയും ഉയർത്തിക്കാട്ടിയാകും കോൺഗ്രസിന്റെ ക്യാമ്പയിൻ എന്നാണ് സൂചന.
