പശ്ചിമേഷ്യൻ മണ്ണിൽ യുദ്ധകാഹളം മുഴങ്ങുമ്പോൾ ആഗോള സമ്പദ്‌വ്യവസ്ഥയുടെ നെഞ്ചിടിപ്പ് കൂട്ടുന്നത് ‘ഹോർമുസ് കടലിടുക്ക്’ ആണ്. ലോകത്താകമാനം ഉപയോഗിക്കുന്ന ഇന്ധനത്തിന്റെ അഞ്ചിലൊന്നും കടന്നുപോകുന്ന ഈ ഇടുങ്ങിയ കടൽപ്പാത ഇന്ന് കനത്ത യുദ്ധഭീതിയിലാണ്. അമേരിക്ക-ഇറാൻ സംഘർഷത്തെത്തുടർന്ന് ലോകത്തെ വൻകിട ഷിപ്പിംഗ് കമ്പനികളൊക്കെയും ഈ റൂട്ടിൽ നിന്നും കപ്പലുകൾ പിൻവലിക്കുകയോ സർവീസുകൾ നിർത്തിവെക്കുകയോ ചെയ്യുമ്പോൾ, ആഗോളതലത്തെ അത്ഭുതപ്പെടുത്തിക്കൊണ്ട് ഇന്ത്യൻ പതാകയേന്തിയ കപ്പലുകൾ ഇന്നും ഈ അപകടമേഖലയിലൂടെ വിജയകരമായി പ്രയാണം തുടരുകയാണ്.
സാധാരണക്കാർക്ക് ഇതൊരു വാർത്ത മാത്രമായിരിക്കാം, എന്നാൽ അന്താരാഷ്ട്ര തലത്തിൽ ഇന്ത്യ നടത്തുന്ന അതിശക്തമായ സമുദ്ര സുരക്ഷാ തന്ത്രങ്ങളുടെയും നയതന്ത്ര വിജയത്തിന്റെയും തെളിവാണിത്. ഇന്ത്യയുടെ സാമ്പത്തിക അടിത്തറ നിലനിർത്തുന്നതിൽ ക്രൂഡ് ഓയിൽ, എൽ.പി.ജി , രാസവളങ്ങൾ എന്നിവയുടെ ഇറക്കുമതി പ്രധാന പങ്കുവഹിക്കുന്നുണ്ട്. ഹോർമുസ് കടലിടുക്ക് അടഞ്ഞാൽ രാജ്യത്ത് ഇന്ധനവില കുതിച്ചുയരുകയും അത് സാധാരണക്കാരന്റെ ജീവിതത്തെ ബാധിക്കുകയും ചെയ്യും. ഈ പ്രതിസന്ധി മുൻകൂട്ടി കണ്ടുകൊണ്ട് കേന്ദ്ര വിദേശകാര്യ മന്ത്രാലയം, ഷിപ്പിംഗ്, പെട്രോളിയം മന്ത്രാലയങ്ങളുമായി ചേർന്ന് അതീവ രഹസ്യവും കൃത്യവുമായ ഒരു മുൻഗണനാ പട്ടിക തയ്യാറാക്കിയിരുന്നു. ഇന്ത്യയ്ക്ക് അടിയന്തിരമായി ആവശ്യമുള്ള ഇന്ധനവുമായി വരുന്ന കപ്പലുകൾക്ക് സുരക്ഷിത പാതയൊരുക്കുക എന്നതായിരുന്നു ഇതിൽ പ്രധാനം.
‘ഓപ്പറേഷൻ ഊർജ്ജ സുരക്ഷ’ എന്ന പേരിൽ ഇന്ത്യൻ നാവികസേന പേർഷ്യൻ ഗൾഫിൽ വലിയ തോതിലുള്ള യുദ്ധക്കപ്പലുകളും വ്യോമ നിരീക്ഷണ സംവിധാനങ്ങളുമാണ് വിന്യസിച്ചിരിക്കുന്നത്. അപകടമേഖലയിലൂടെ കടന്നുപോകുന്ന ഷിവാലിക്, നന്ദാദേവി, ജഗ് ലാഡ്കി തുടങ്ങിയ ഇന്ത്യൻ കപ്പലുകൾക്ക് നാവികസേന നേരിട്ട് അകമ്പടി സേവിക്കുന്നു.
“ഇന്ത്യയുടെ ഊർജ്ജ സുരക്ഷയും സമുദ്ര സുരക്ഷയും പരസ്പരം ബന്ധപ്പെട്ടിരിക്കുന്നു. ഭാരതത്തിന്റെ സാമ്പത്തിക താല്പര്യങ്ങൾ സംരക്ഷിക്കാൻ ഇന്ത്യൻ നാവികസേന എപ്പോഴും സജ്ജമാണ്.” — അഡ്മിറൽ ദിനേഷ് കെ. ത്രിപാഠി വ്യക്തമാക്കി. യുദ്ധഭീതി നിലനിൽക്കുന്നതിനാൽ സാധാരണ ഇൻഷുറൻസ് കമ്പനികൾ ഈ റൂട്ടിലോടുന്ന കപ്പലുകൾക്ക് പരിരക്ഷ നൽകാൻ മടിക്കാറുണ്ട്. എന്നാൽ ഈ പ്രതിസന്ധി മറികടക്കാൻ ഭാരത സർക്കാർ സ്വന്തമായി ‘മറൈൻ ഇൻഷുറൻസ്’ സംവിധാനം ഏർപ്പെടുത്തിയത് ഇന്ത്യൻ കപ്പലുകൾക്ക് വലിയ ആത്മവിശ്വാസമാണ് നൽകിയത്.
ഹോർമുസ് കടലിടുക്കിന്റെ പൂർണ്ണ നിയന്ത്രണം ഇറാന്റെ കൈകളിലാണ്. വൻശക്തികളായ അമേരിക്കയോടും പാശ്ചാത്യ രാജ്യങ്ങളോടും ഇറാൻ കടുത്ത നിലപാട് സ്വീകരിക്കുമ്പോഴും, ഇന്ത്യയുമായുള്ള ചരിത്രപരമായ നയതന്ത്രബന്ധം അവർ കാത്തുസൂക്ഷിക്കുന്നു. ഈ സൗഹൃദം തന്നെയാണ് മറ്റ് രാജ്യങ്ങളുടെ കപ്പലുകൾക്ക് അനുമതി നിഷേധിക്കപ്പെടുമ്പോഴും ഇന്ത്യൻ പതാകയുള്ള കപ്പലുകൾക്ക് സുരക്ഷിതമായി കടന്നുപോകാൻ ഇറാൻ മൌനാനുമതി നൽകുന്നതിന് പിന്നിലെ രഹസ്യം.
ആഗോള പ്രതിസന്ധികൾക്കിടയിലും സ്വന്തം രാജ്യത്തിന്റെ ആവശ്യങ്ങൾ കണ്ടറിഞ്ഞ്, പ്രതിരോധവും നയതന്ത്രവും ഒരുപോലെ സമന്വയിപ്പിച്ച് ഇന്ത്യ നടത്തുന്ന ഈ നീക്കം ലോകരാജ്യങ്ങൾക്ക് വലിയൊരു പാഠമാണ്. കടലിലെ യുദ്ധക്കണ്ണുകൾക്ക് മുന്നിലൂടെ ഭാരതത്തിന്റെ കപ്പലുകൾ സുരക്ഷിതമായി തീരമണയുമ്പോൾ, അത് ലോകവേദിയിൽ ഇന്ത്യ എന്ന മഹാശക്തിയുടെ തന്ത്രപരമായ വിജയത്തിന്റെ വിളംബരമായി മാറുന്നു.
