ഇന്ത്യൻ ക്രിക്കറ്റിലെ പുതിയ അത്ഭുതബാലൻ വൈഭവ് സൂര്യവംശിയുടെ അന്താരാഷ്ട്ര അരങ്ങേറ്റത്തിനായി രാജ്യം മുഴുവൻ കാത്തിരിക്കെ, ഇന്ത്യയുടെ വരാനിരിക്കുന്ന അയർലൻഡ് പര്യടനത്തിന് കനത്ത തിരിച്ചടിയായി അവിടുത്തെ ആഭ്യന്തര കലാപം. ഇന്ത്യൻ ടീമിന്റെ സുരക്ഷ മുൻനിർത്തി ബിസിസിഐ സ്ഥിതിഗതികൾ അതീവ ഗൗരവത്തോടെ നിരീക്ഷിച്ചു വരികയാണ്.
ആഭ്യന്തര സംഘർഷം രൂക്ഷമായതിനെ തുടർന്ന് ലിസ്ബേണിൽ നടക്കേണ്ടിയിരുന്ന ഇന്റർ-പ്രൊവിൻഷ്യൽ ടി20 ഫെസ്റ്റിവൽ ഇതിനകം തന്നെ ക്രിക്കറ്റ് അയർലൻഡ് റദ്ദാക്കിയിട്ടുണ്ട്. വരാനിരിക്കുന്ന ഐറിഷ് സീനിയർ കപ്പ്, നാഷണൽ കപ്പ് മത്സരങ്ങളുടെ കാര്യത്തിൽ അടുത്ത 48 മണിക്കൂറിനുള്ളിൽ അന്തിമ തീരുമാനമെടുക്കുമെന്ന് ക്രിക്കറ്റ് അയർലൻഡ് ഔദ്യോഗിക പ്രസ്താവനയിലൂടെ അറിയിച്ചു. കളിക്കാരുടെയും കോച്ചുമാരുടെയും ആരാധകരുടെയും സുരക്ഷയ്ക്കാണ് തങ്ങൾ മുൻഗണന നൽകുന്നതെന്നും അവർ വ്യക്തമാക്കി.
ദേശീയ മാധ്യമമായ ‘ദൈനിക് ജാഗരൺ’ റിപ്പോർട്ട് ചെയ്യുന്നതനുസരിച്ച്, ബിസിസിഐ അയർലൻഡിലെ സാഹചര്യങ്ങൾ കൃത്യമായി നിരീക്ഷിക്കുന്നുണ്ട്. അവിടെ നിലവിലെ വംശീയ സംഘർഷങ്ങൾക്ക് അയവ് വന്നില്ലെങ്കിൽ, മത്സരങ്ങൾ ബെൽഫാസ്റ്റിൽ നിന്നും മറ്റ് സുരക്ഷിതമായ വേദികളിലേക്ക് മാറ്റാൻ ബിസിസിഐ ആവശ്യപ്പെട്ടേക്കും.
ഐപിഎൽ 2026-ൽ രാജസ്ഥാൻ റോയൽസിന് വേണ്ടി സിക്സറുകളുടെ പെരുമഴ തീർത്ത സൂര്യവംശി, നിലവിൽ ശ്രീലങ്കയിൽ നടക്കുന്ന ത്രിരാഷ്ട്ര പരമ്പരയിൽ ഇന്ത്യ എ ടീമിന് വേണ്ടിയാണ് കളിക്കുന്നത്. കഴിഞ്ഞ ദിവസം അഫ്ഗാനിസ്ഥാൻ എ ടീമിനെതിരെയുള്ള മത്സരത്തിൽ താരം തൻ്റെ കളിശൈലി മാറ്റിയതായി കാണാൻ സാധിച്ചു. ഐപിഎല്ലിലെപ്പോലെ വായുവിൽ ഉയർത്തി അടിക്കുന്നതിന് പകരം നിലംപറ്റെയുള്ള ഷോട്ടുകൾക്കാണ് താരം മുൻഗണന നൽകിയത്. മത്സരത്തിൽ ഒരു സിക്സർ പോലും നേടാതെ 22 പന്തിൽ 44 റൺസ് സൂര്യവംശി അടിച്ചുകൂട്ടി.
സൂര്യവംശിയുടെ ഈ മികച്ച പോരാട്ടത്തിനിടയിലും മത്സരത്തിൽ ഇന്ത്യ എ ടീം അഫ്ഗാനിസ്ഥാൻ എ ടീമിനോട് പരാജയപ്പെടുകയായിരുന്നു.
