ദേശീയതലത്തിൽ നീറ്റ് പുനഃപരീക്ഷ നടക്കാനിരിക്കെ, രാജ്യത്ത് വലിയ സുരക്ഷാ മുൻകരുതലുകളുടെ ഭാഗമായി പ്രമുഖ മെസേജിങ് ആപ്പായ ടെലഗ്രാമിന് താൽക്കാലിക നിരോധനം ഏർപ്പെടുത്തി കേന്ദ്ര സർക്കാർ. പ്ലേസ്റ്റോറിൽ നിന്ന് ഗൂഗിളും ആപ്പ് നീക്കം ചെയ്തു കഴിഞ്ഞു. നീറ്റ് മെഡിക്കൽ പ്രവേശന പരീക്ഷയുടെ പുനഃപരീക്ഷ പൂർത്തിയാകുന്ന ജൂൺ 22 വരെയാണ് ഈ താൽക്കാലിക നിരോധനം നിലവിലുണ്ടാകുക.
താൽക്കാലിക നിരോധന ഉത്തരവ് വന്നതിന് പിന്നാലെ ഗൂഗിൾ തങ്ങളുടെ പ്ലേസ്റ്റോറിൽ നിന്ന് ടെലഗ്രാം ആപ്പ് നീക്കം ചെയ്തു. ആപ്പിളിന്റെ ആപ്പ് സ്റ്റോറിൽ നിന്നും ടെലഗ്രാം ഉടൻ നീക്കം ചെയ്യാൻ കേന്ദ്ര സർക്കാർ കർശന നിർദ്ദേശം നൽകിയിരിക്കുകയാണ്. നിലവിൽ ആപ്പ് ഉപയോഗിക്കുന്ന ആളുകൾക്ക് അത് തുറക്കുമ്പോൾ “കണക്റ്റിംഗ്” എന്നാണ് കാണിക്കുന്നത്. പുനഃപരീക്ഷയ്ക്ക് മുന്നോടിയായി ചോദ്യപേപ്പർ ചോർന്നുവെന്ന തരത്തിലുള്ള വ്യാജ പ്രചാരണങ്ങൾക്കും വലിയ സാമ്പത്തിക തട്ടിപ്പുകൾക്കും ടെലഗ്രാം ആപ്പ് വ്യാപകമായി ഉപയോഗിച്ചതാണ് ഈ അടിയന്തിര നടപടിക്ക് കാരണം.
‘പേപ്പർ ലീക്ക്ഡ് നീറ്റ്’, ‘റീ-നീറ്റ് 2026’, ‘പ്രൈവറ്റ് മാഫിയ’, ‘റീ നീറ്റ് മാഫിയ’ തുടങ്ങിയ പേരുകളിലുള്ള ഒട്ടനവധി ടെലഗ്രാം ചാനലുകൾ വഴി പരീക്ഷാ ചോദ്യപേപ്പറുകൾ ലഭ്യമാണെന്ന് പരസ്യപ്പെടുത്തുകയും വിദ്യാർത്ഥികളിൽ നിന്നും ഉദ്യോഗാർത്ഥികളിൽ നിന്നും വൻതോതിൽ പണം തട്ടുകയും ചെയ്തതായി കണ്ടെത്തിയിട്ടുണ്ട്. തട്ടിപ്പുകൾ തടയുന്നതിന്റെ ഭാഗമായി ആപ്പിലെ ‘മെസേജ് എഡിറ്റ്’ ഫീച്ചർ ജൂൺ 30 വരെ പൂർണ്ണമായും പ്രവർത്തനരഹിതമാക്കിയിട്ടുണ്ട്.
ഇതിനോടകം തന്നെ സംശയസ്പദമായ നിരവധി ടെലഗ്രാം ചാനലുകളും ബോട്ടുകളും അധികൃതർ നീക്കം ചെയ്തു കഴിഞ്ഞു. വ്യാജചോദ്യപേപ്പർ പ്രചരിപ്പിച്ചതുമായി ബന്ധപ്പെട്ട് ബിഹാർ, ഗുജറാത്ത്, രാജസ്ഥാൻ ഉൾപ്പെടെ വിവിധ സംസ്ഥാനങ്ങളിൽ അന്വേഷണം ഊർജ്ജിതമായി തുടരുകയാണെന്ന് കേന്ദ്ര സർക്കാർ അറിയിച്ചു. ഇത്തരം സൈബർ തട്ടിപ്പുകൾ ശ്രദ്ധയിൽപ്പെട്ടാൽ ഉടൻ തന്നെ 1930 എന്ന ഹെൽപ്ലൈൻ നമ്പറിൽ റിപ്പോർട്ട് ചെയ്യാനും ഏജൻസികൾ നിർദ്ദേശിച്ചിട്ടുണ്ട്.
