“എംബിഎ ബിരുദവും കയ്യിൽ പിടിച്ച് സിവിൽ സർവീസ് പരീക്ഷയ്ക്ക് വേണ്ടിയുള്ള പഠിപ്പും വേണ്ടാന്ന് വച്ച്, ഒരു ചായക്കീറ്റും തൂക്കി തെരുവ് വക്കിലേക്ക് ഇറങ്ങിയ ഒരു ഇരുപത്തിനാലുകാരനെ വീട്ടുകാരും നാട്ടുകാരും ചേർന്ന് ഭ്രാന്തനാണെന്ന് വിളിച്ചു! എന്നാൽ, വെറും 15 രൂപയുടെ ചായ കളിമൺ കപ്പുകളിൽ ഒഴിച്ച് കൊടുത്ത്, മൂന്ന് വർഷം കൊണ്ട് അയാൾ കെട്ടിപ്പടുത്തത് 100 കോടിയുടെ ബിസിനസ്സ് സാമ്രാജ്യമാണ്.മധ്യപ്രദേശിലെ ഇൻഡോറിൽ ഒരു ഗേൾസ് ഹോസ്റ്റലിന് മുന്നിലാണ് ഇവർ ആദ്യത്തെ ചായക്കട തുടങ്ങുന്നത്. പരസ്യം ചെയ്യാനോ ബോർഡ് വെക്കാനോ പോലും കയ്യിൽ പണമില്ലാതിരുന്നതുകൊണ്ട്, ഒരു സുഹൃത്തിന്റെ കടയിൽ നിന്നും കടം വാങ്ങിയ പഴയ മരപ്പലകയിലാണ് ‘Chai Sutta Bar’ എന്ന് ഇവർ ആദ്യമായി എഴുതിവെച്ചത്.Chai Sutta Bar’ (ചായ് സുട്ടാ ബാർ) എന്ന ബ്രാൻഡിന്റെ സ്ഥാപകനായ അനുഭവ് ദുബെയാണിത്. നമ്മൾ വെറും ‘സാധാരണ ചായക്കട’ എന്ന് വിചാരിച്ച് തള്ളിക്കളയുന്ന ഈ ബിസിനസ്സ് കൊണ്ട് ഇന്ത്യയിൽ ആളുകൾ കോടീശ്വരന്മാരാകുന്നത് എങ്ങനെയാണെന്ന് കേട്ടാൽ, നാളെത്തന്നെ ‘നമുക്കൊരു ചായക്കട തുടങ്ങിയാലോ’ എന്ന് നിങ്ങളും ചോദിച്ചുപോകും!”
ഇന്ത്യയിൽ ചായ എന്നത് വെറുമൊരു പാനീയമല്ല, അതൊരു വികാരമാണ്. രാവിലെ എണീറ്റ ഉടനെ ഒരു ബെഡ് കോഫി കുടിക്കുന്നതിനേക്കാൾ, ഓഫീസിലെ ടെൻഷൻ മാറ്റാൻ കൂട്ടുകാരോടൊപ്പം ഒരു കട്ടിങ് ചായ കുടിക്കുന്നതിലാണ് ഭൂരിഭാഗം മലയാളികളുടെയും ആശ്വാസം. അതുകൊണ്ടുതന്നെയാണ് ‘ചായ് പോയിന്റും’, ‘ചായ് സുട്ടാ ബാറും’ ഒക്കെ വെറും ചായ വിറ്റ് കോടികളുടെ ടേണോവർ ഉണ്ടാക്കുന്നത്. പണക്കാരനെന്നോ പാവപ്പെട്ടവനെന്നോ വ്യത്യാസമില്ലാതെ എല്ലാവരും ഒരുപോലെ ദിവസത്തിൽ പലതവണ കുടിക്കുന്ന ഒന്നാണ് ചായ. ഇതിന്റെ ഏറ്റവും വലിയ പ്രത്യേകത എന്തെന്നാൽ, അസംസ്കൃത വസ്തുക്കളായ പാൽ, ചായപ്പൊടി, പഞ്ചസാര എന്നിവയ്ക്ക് ചിലവ് വളരെ കുറവാണ്. അതുകൊണ്ട് തന്നെ ചായക്കട എന്നത് ഇന്ത്യയിൽ ഏറ്റവും കുറഞ്ഞ പണച്ചിലവിൽ തുടങ്ങി ഏറ്റവും വലിയ ലാഭം കൊയ്യാൻ പറ്റുന്ന ഒന്നാന്തരം ബിസിനസ്സാണ്.
നിങ്ങൾക്ക് ഈ ബിസിനസ്സിലേക്ക് ഇറങ്ങണമെങ്കിൽ പല വഴികളുണ്ട്. വെറുമൊരു തട്ടുകടയോ സൈക്കിൾ കാർട്ടോ ആണെങ്കിൽ 30,000 രൂപ മുതൽ 1 ലക്ഷം രൂപയ്ക്കുള്ളിൽ ബിസിനസ്സ് തുടങ്ങാം. അതേസമയം നഗരത്തിന്റെ ഒരു പ്രധാന ഭാഗത്ത് ചെറിയൊരു ചായക്കടയോ ബേക്കറിയോ ആണെങ്കിൽ 1 ലക്ഷം മുതൽ 5 ലക്ഷം രൂപ വരെ ഇൻവെസ്റ്റ്മെന്റ് വരും. ഇനി നല്ലൊരു പ്രീമിയം ചായ കഫേ സ്റ്റൈലിലാണ് ഉദ്ദേശിക്കുന്നതെങ്കിൽ 5 മുതൽ 20 ലക്ഷം രൂപ വരെയും, വലിയൊരു ഫ്രാഞ്ചൈസി ഔട്ട്ലെറ്റ് ആണെങ്കിൽ 20 മുതൽ 50 ലക്ഷം രൂപ വരെയും ചിലവ് വരാം. ഇതിൽ പ്രധാന ചിലവുകൾ വരുന്നത് ഷോപ്പ് റെന്റ്, ഗ്യാസ് സ്റ്റൗ, ചായ ബോയിലർ, ഫ്രിഡ്ജ്, ഫർണിച്ചറുകൾ, പിന്നെ ഫുഡ് സേഫ്റ്റി ലൈസൻസും (FSSAI) ജിഎസ്ടി രജിസ്ട്രേഷനും ഒക്കെ എടുക്കാനാണ്. കടയിരിക്കുന്ന ലൊക്കേഷനാണ് ഇതിന്റെ ഭാവി നിശ്ചയിക്കുന്നത്. ആളുകൾ എപ്പോഴും ഒത്തുകൂടുന്ന ബസ് സ്റ്റാൻഡുകൾ, കോളേജ് പരിസരങ്ങൾ, അല്ലെങ്കിൽ ഐടി പാർക്കുകൾ എന്നിവയ്ക്ക് സമീപം കടയിട്ടാൽ കച്ചവടം പൊടിപൊടിക്കും.
ഇനി ഇതിന്റെ ലാഭക്കണക്കുകളിലേക്ക് (Profit Margin) നോക്കിയാൽ ആരും ഒന്ന് ഞെട്ടും. നമ്മൾ 15 രൂപയ്ക്ക് കുടിക്കുന്ന ഒരു കപ്പ് ചായ ഉണ്ടാക്കാൻ പാൽ, ചായപ്പൊടി, പഞ്ചസാര, ഇഞ്ചി എന്നിവയ്ക്കെല്ലാം കൂടി പരമാവധി വരുന്നത് വെറും 5 രൂപ മാത്രമാണ്! ബാക്കി 10 രൂപയും നിങ്ങളുടെ ഗ്രോസ് പ്രോഫിറ്റ് ആണ്. അതായത് ഏകദേശം 67 ശതമാനം ലാഭം! വാടകയും ജീവനക്കാരുടെ ശമ്പളവും കഴിഞ്ഞാൽ പോലും 15% മുതൽ 30% വരെ കൃത്യമായ അറ്റാദായം ഇതിൽ നിന്ന് കിട്ടും. ഒരു ദിവസം വെറും 500 കപ്പ് ചായ വിൽക്കുന്ന ഒരു സാധാരണ കടയ്ക്ക് ദിവസം 7,500 രൂപയും മാസം 2.25 ലക്ഷം രൂപയും വരുമാനം ഉണ്ടാക്കാം. ചായയുടെ കൂടെ ബിസ്ക്കറ്റ്, സാമോസ, പഴംപൊരി, ബൺ മസ്ക തുടങ്ങിയ ലഘുഭക്ഷണങ്ങൾ (Snacks) കൂടി വിറ്റാൽ ലാഭം ഇരട്ടിയാകും. എല്ലാ ചിലവും കഴിഞ്ഞ് മാസം 50,000 രൂപ അറ്റലാഭം കിട്ടുന്ന ഒരു ചെറിയ ചായക്കടയ്ക്ക് വെറും 6 മാസം കൊണ്ട് തന്നെ മുടക്കുമുതൽ (Break-even Point) പൂർണ്ണമായും തിരിച്ചുപിടിക്കാം.
പക്ഷേ, റോഡരികിൽ കാണുന്ന എല്ലാ ചായക്കടയും കോടികളുടെ സാമ്രാജ്യമാകുന്നില്ല. അതിന് പിന്നിൽ കടുത്ത മത്സരമുണ്ട്. നിങ്ങളുടെ തൊട്ടടുത്ത് തന്നെ മറ്റ് നൂറു ചായക്കടകൾ ഉണ്ടാകും. അവിടെയാണ് നമ്മൾ വ്യത്യസ്തരാകേണ്ടത്. സാധാരണ ചായയ്ക്ക് പകരം മസാല ചായ്, കാശ്മീരി കഹ്വ, ഇഞ്ചി ചായ, ഏലയ്ക്കാ ചായ, കളിമൺ പാത്രത്തിൽ നൽകുന്ന കുൽഹാദ് ചായ് എന്നിവ പരീക്ഷിക്കാം. ആളുകൾക്ക് ചായ ഉണ്ടാക്കുന്നത് നേരിട്ട് കാണാൻ പറ്റുന്ന രീതിയിൽ വൃത്തിയും വെടിപ്പുമുള്ള (Hygiene) അന്തരീക്ഷം ഒരുക്കണം. ഓഫീസിൽ പോകുന്നവർക്ക് സമയം കുറവായതിനാൽ മിന്നൽ വേഗത്തിൽ സർവീസ് നൽകണം. അതോടൊപ്പം നല്ലൊരു ബ്രാൻഡ് പേരും ആകർഷകമായ പാക്കേജിംഗും കൂടിയുണ്ടെങ്കിൽ കസ്റ്റമേഴ്സ് നിങ്ങളുടെ കടയിലേക്ക് ഒഴുകിയെത്തും.
ചായക്കട ബിസിനസ്സിന്റെ ഏറ്റവും വലിയ ശക്തി അതിന്റെ സ്കേലബിലിറ്റി (Scalability) തന്നെയാണ്. ഒരു ചെറിയ തട്ടുകടയിൽ നിന്ന് തുടങ്ങി, പിന്നീട് അതൊരു പെർമനന്റ് ഷോപ്പാക്കി മാറ്റി, നഗരത്തിന്റെ വിവിധ ഭാഗങ്ങളിൽ ഔട്ട്ലെറ്റുകൾ തുറന്ന്, ഒടുവിൽ അതൊരു വലിയ ഫ്രാഞ്ചൈസി ശൃംഖലയാക്കി മാറ്റാൻ ഇതിലൂടെ സാധിക്കും. ഒരു കടയിൽ നിന്ന് 50,000 രൂപ ലാഭം കിട്ടുമ്പോൾ, അങ്ങനെയുള്ള 10 കടകൾ ഉണ്ടെങ്കിൽ മാസം 5 ലക്ഷം രൂപയും, 20 കടകൾ ഉണ്ടെങ്കിൽ മാസം 10 ലക്ഷം രൂപയും അറ്റലാഭം മാത്രം നിങ്ങളുടെ അക്കൗണ്ടിലേക്ക് വരും!
തീർച്ചയായും, പാൽവില കൂടുന്നത്, ജീവനക്കാരുടെ ക്ഷാമം, കടുത്ത മത്സരം എന്നിവ ചെറിയ റിസ്കുകളാണെങ്കിലും കൃത്യമായ ആസൂത്രണവും നല്ലൊരു ലൊക്കേഷനും ഉണ്ടെങ്കിൽ ചായക്കട എന്നത് ഇന്നും ഇന്ത്യയിലെ ഏറ്റവും സുരക്ഷിതവും ലാഭകരവുമായ ബിസിനസ്സ് ഫോർമുലയാണ്. അപ്പോൾ എങ്ങനെയാ… നമുക്കൊരു ചായക്കട തുടങ്ങിയാലോ?
