മേയ്ക്ക് ഇൻ ഇന്ത്യ’ പദ്ധതിക്കും രാജ്യത്തിന്റെ പ്രതിരോധ സ്വയംപര്യാപ്തതയ്ക്കും പുതിയ കരുത്ത് പകർന്ന് ബ്രഹ്മോസ് സൂപ്പർസോണിക് ക്രൂയിസ് മിസൈലിനായി ഇന്ത്യയിൽ നിർമ്മിച്ച നൂറാമത്തെ തദ്ദേശീയ ബൂസ്റ്റർ വിജയകരമായി ഫ്ലാഗ് ഓഫ് ചെയ്തു. നാഗ്‌പൂരിലെ സോളാർ ഇൻഡസ്ട്രീസ് ഇന്ത്യ ലിമിറ്റഡിന്റെ നിർമ്മാണ ശാലയിൽ വ്യാഴാഴ്ച നടന്ന ചടങ്ങിൽ ബ്രഹ്മോസ് എയ്‌റോസ്‌പേസ് ചീഫ് ജയതീർത്ഥ് ജോഷി, സോളാർ ഇൻഡസ്ട്രീസ് ചെയർമാൻ സത്യനാരായണൻ നുവാൽ എന്നിവർ ചേർന്നാണ് ചരിത്രപരമായ ഈ നേട്ടം കുറിച്ച ബൂസ്റ്റർ ഫ്ലാഗ് ഓഫ് ചെയ്തത്.
ഇന്ത്യയുടെ തദ്ദേശീയ പ്രതിരോധ പരിപാടിയിലെ ഏറ്റവും വലിയ നാഴികക്കല്ലാണിത്. മുൻപ് റഷ്യയിൽ നിന്ന് പൂർണ്ണമായും ഇറക്കുമതി ചെയ്തിരുന്ന ബൂസ്റ്ററുകളാണ് സാങ്കേതികവിദ്യാ കൈമാറ്റത്തിലൂടെ (Technology Transfer) ഇപ്പോൾ ഇന്ത്യയിൽ തന്നെ വൻതോതിൽ നിർമ്മിക്കുന്നത്. 2018-ൽ സാങ്കേതികവിദ്യ കൈമാറുകയും 2020-ഓടെ ഇതിന്റെ പരീക്ഷണങ്ങൾ പൂർത്തിയാക്കുകയും ചെയ്തു. തുടർന്ന് 2022-ൽ സോളാർ ഇൻഡസ്ട്രീസ് ഇതിന്റെ വാണിജ്യാടിസ്ഥാനത്തിലുള്ള ഉത്പാദനം ആരംഭിക്കുകയായിരുന്നു. തുടക്കത്തിൽ പ്രതിമാസം ഒരു ബൂസ്റ്റർ മാത്രം നിർമ്മിച്ചിരുന്ന സ്ഥാനത്തുനിന്ന്, ഇപ്പോൾ പ്രതിമാസം 60 ബൂസ്റ്ററുകൾ വരെ ഉത്പാദിപ്പിക്കാൻ തക്കവണ്ണം സോളാർ ഇൻഡസ്ട്രീസ് ശേഷി വർദ്ധിപ്പിച്ചിട്ടുണ്ട്. പ്രതിവർഷം 150 ബൂസ്റ്ററുകൾ വരെ നിർമ്മിക്കാൻ കമ്പനി ഇപ്പോൾ സജ്ജമാണ്.
ബൂസ്റ്ററിന് പുറമേ ബ്രഹ്മോസ് മിസൈലുകളുടെ ഏറ്റവും നിർണായക ഭാഗമായ ‘വാർഹെഡ്’ (യുദ്ധമുന്നണി) പൂർണ്ണമായും തദ്ദേശീയമായി വികസിപ്പിക്കുന്നതിലും സോളാർ ഇൻഡസ്ട്രീസ് നിർണായക പങ്ക് വഹിക്കുന്നുണ്ട്. ഇതിന്റെ പരീക്ഷണങ്ങൾ അവസാന ഘട്ടത്തിലാണെന്നും അടുത്ത മാസത്തോടെ വിജയകരമായി പൂർത്തിയായാൽ ഇറക്കുമതി ചെയ്യുന്ന വാർഹെഡുകൾക്ക് പകരം ഇന്ത്യയിൽ നിർമ്മിച്ചവ ഉപയോഗിക്കാനാകുമെന്നും അധികൃതർ വ്യക്തമാക്കി. കഴിഞ്ഞ 25 വർഷമായി ലോകത്തിലെ ഏറ്റവും വിശ്വസനീയമായ സൂപ്പർസോണിക് ക്രൂയിസ് മിസൈലായി ബ്രഹ്മോസ് മാറിയിട്ടുണ്ടെന്നും ഈ നേട്ടം അതിന്റെ ആഗോള ഖ്യാതി ഇരട്ടിയാക്കുമെന്നും ജയതീർത്ഥ് ജോഷി പറഞ്ഞു.
ഫിലിപ്പീൻസിന് പിന്നാലെ ബ്രഹ്മോസ് മിസൈലുകൾ സ്വന്തമാക്കാൻ വിയറ്റ്നാമും അന്തിമ ഘട്ടത്തിലാണെന്ന നിർണായക വിവരവും അദ്ദേഹം പങ്കുവെച്ചു. ഏതാനും അനുമതികൾ കൂടി ലഭിച്ചാൽ വിയറ്റ്നാമിൽ നിന്നുള്ള വൻ ഓർഡർ ഇന്ത്യക്ക് ലഭിക്കും. ഇതിന് പുറമേ കിഴക്കൻ-പടിഞ്ഞാറൻ മേഖലകളിലെ നിരവധി രാജ്യങ്ങളുമായി ബ്രഹ്മോസ് കയറ്റുമതിക്കായി വിപുലമായ ചർച്ചകൾ പുരോഗമിക്കുകയാണ്.
