പ്രമുഖ തെന്നിന്ത്യൻ നടൻ പ്രകാശ് രാജിനെതിരെ ബെംഗളൂരു മജിസ്ട്രേട്ട് കോടതി ജാമ്യമില്ലാ വാറന്റ് പുറപ്പെടുവിച്ചു. മൂന്ന് സംസ്ഥാനങ്ങളിലായി നാല് വോട്ടർ ഐഡികൾ കൈവശം വെച്ചെന്ന ഗുരുതരമായ കേസിലാണ് കോടതിയുടെ ഈ ശക്തമായ നടപടി. കേസുമായി ബന്ധപ്പെട്ട് കോടതി മൂന്ന് തവണ സമൻസ് അയച്ചിട്ടും താരം കൈപ്പറ്റാനോ ഹാജരാകാനോ തയ്യാറാകാത്തതിനെ തുടർന്നാണ് കോടതി കർശന നിലപാടിലേക്ക് നീങ്ങിയത്.
ബെംഗളൂരുവിലെ ശാന്തിനഗർ, തെലങ്കാനയിലെ സെരിലിംഗംപള്ളി, തമിഴ്നാട്ടിലെ വേളാച്ചേരി എന്നിവിടങ്ങളിലായി പ്രകാശ് രാജിന് വോട്ടർ ഐഡികളുണ്ടെന്ന് കാണിച്ച് ശേഷാദ്രിപുരം സ്വദേശിയായ കെ. ദിലീപ് കുമാറാണ് കോടതിയെ സമീപിച്ചത്. ഇതിൽ തമിഴ്നാട്ടിലെ വേളാച്ചേരിയിൽ മാത്രം താരത്തിന് രണ്ട് വോട്ടുകളുണ്ടെന്നും പരാതിയിൽ വ്യക്തമാക്കുന്നുണ്ട്. ഒരേസമയം ഒന്നിലധികം സംസ്ഥാനങ്ങളിൽ വോട്ടർ പട്ടികയിൽ പേര് ചേർക്കുന്നത് നിയമവിരുദ്ധമാണെന്നിരിക്കെയാണ് താരത്തിനെതിരെ പരാതി ഉയർന്നത്.
അതേസമയം, കോടതി നടപടി നേരിടുന്ന പ്രകാശ് രാജിന് പൊലീസ് സുരക്ഷ ഒരുക്കിയതുമായി ബന്ധപ്പെട്ട് ഇപ്പോൾ പുതിയ വിവാദങ്ങളും ഉയരുന്നുണ്ട്. ധർമസ്ഥല വിവാദവുമായി ബന്ധപ്പെട്ട് കഴിഞ്ഞ ജൂൺ 18-ന് പ്രകാശ് രാജ് ബെംഗളൂരുവിൽ വച്ച് ഒരു വാർത്താസമ്മേളനം നടത്തിയിരുന്നു. ഈ സമയത്ത് അദ്ദേഹത്തിന് പൊലീസ് വൻ സുരക്ഷയാണ് ഒരുക്കിയിരുന്നത്. കോടതി സമൻസ് അയച്ച് താരം അത് കൈപ്പറ്റാതിരുന്ന സാഹചര്യത്തിൽ, പരസ്യമായി വാർത്താസമ്മേളനത്തിന് എത്തിയ പ്രകാശ് രാജിന് സമൻസ് കൈമാറാൻ പൊലീസ് തയ്യാറാകാതിരുന്നതാണ് ഇപ്പോൾ വലിയ ആക്ഷേപങ്ങൾക്ക് കാരണമായിരിക്കുന്നത്. കോടതി ഉത്തരവുണ്ടായിട്ടും പൊലീസ് ഇത് നടപ്പിലാക്കാൻ മടിക്കുന്നത് എന്തുകൊണ്ടാണെന്ന ചോദ്യവുമായി നിരവധി പേർ രംഗത്തെത്തിയിട്ടുണ്ട്. വരും ദിവസങ്ങളിൽ ഈ കേസ് പ്രകാശ് രാജിന് വലിയ നിയമക്കുരുക്കായി മാറുമെന്നാണ് റിപ്പോർട്ടുകൾ സൂചിപ്പിക്കുന്നത്.
