അമേരിക്കൻ വൈസ് പ്രസിഡന്റ് ജെ.ഡി വാൻസിന്റെ കത്തോലിക്കാ വിശ്വാസത്തിലേക്കുള്ള ആത്മീയ യാത്രകളും അദ്ദേഹത്തിന്റെ ഹിന്ദു വംശജയായ ഭാര്യ ഉഷാ വാൻസിന്റെ മതവിശ്വാസങ്ങളും വീണ്ടും അന്താരാഷ്ട്ര തലത്തിൽ വലിയ ചർച്ചയാകുന്നു. താൻ എന്തുകൊണ്ട് ക്രിസ്തുമതത്തിലേക്ക് പരിവർത്തനം ചെയ്തില്ലെന്നും തങ്ങളുടെ അന്തർധാരയിലുള്ള ദാമ്പത്യം എങ്ങനെ മുന്നോട്ട് പോകുന്നുവെന്നും തുറന്നുപറഞ്ഞ് ഉഷാ വാൻസ് രംഗത്തെത്തി.
സിബിഎസ് സൺഡേ മോണിങ് (CBS Sunday Morning) അഭിമുഖത്തിലാണ് ഉഷ തന്റെ നിലപാട് വ്യക്തമാക്കിയത്. വാൻസ് തന്നെ മതം മാറ്റാൻ ശ്രമിക്കുന്നു എന്ന തരത്തിലുള്ള പ്രചാരണങ്ങൾ തെറ്റാണെന്ന് ഉഷ പറഞ്ഞു. അദ്ദേഹം ഒരു കത്തോലിക്കനായതുകൊണ്ട് തന്റെ വിശ്വാസം പങ്കുവെക്കാൻ ആഗ്രഹിക്കുന്നത് സ്വാഭാവികമാണെന്നും എന്നാൽ തന്നെ എല്ലാദിവസവും അതിനായി നിർബന്ധിക്കാറില്ലെന്നും ഉഷ വ്യക്തമാക്കി. ജെ.ഡി വാൻസിന്റെ പുതിയ പുസ്തകമായ ‘കമ്മ്യൂണിയൻ: ഫൈൻഡിങ് മൈ വേ ബാക്ക് ടു ഫെയ്ത്ത്’ റിലീസ് ചെയ്തതിന് പിന്നാലെയാണ് ഇവരുടെ വിശ്വാസങ്ങളെക്കുറിച്ചുള്ള ചർച്ചകൾ വീണ്ടും സജീവമായത്.
തന്റെ ഭർത്താവ് ജീവിതത്തിൽ ഒരുപാട് പ്രതിസന്ധികളിലൂടെ കടന്നുപോയ ആളാണെന്നും ആത്മീയതയിലാണ് അദ്ദേഹം ആശ്വാസം കണ്ടെത്തിയതെന്നും ഉഷ ഓർമ്മിപ്പിച്ചു. ജെ.ഡി വാൻസിന്റെ പ്രശസ്തമായ ‘ഹിൽബിലി എലിജി’ എന്ന ആത്മകഥയിൽ വിവരിക്കുന്നതുപോലെ, മാതാപിതാക്കളുടെ വേർപിരിയലും മാറിമാറി വന്ന കുടുംബാംഗങ്ങളും കാരണം കുട്ടിക്കാലത്ത് വലിയ അസ്ഥിരതയും മാനസിക സമ്മർദ്ദവും അദ്ദേഹം അനുഭവിച്ചിരുന്നു. ജീവിതത്തിൽ ഒരു സുരക്ഷിതത്വവും വേരുകളും തേടിയുള്ള അദ്ദേഹത്തിന്റെ യാത്രയാണ് ഒടുവിൽ കത്തോലിക്കാ സഭയിൽ എത്തിച്ചത്. “വാൻസിന് തെറാപ്പികൾ ഒന്നും ഫലിച്ചില്ല, എന്നാൽ ചർച്ച് അദ്ദേഹത്തിന് വലിയ ആശ്വാസമായി മാറി” എന്ന് ഉഷ മുൻപ് പറഞ്ഞ കാര്യവും അഭിമുഖത്തിൽ പങ്കുവെച്ചു. അതേസമയം സതേൺ കാലിഫോർണിയയിലെ ഒരു പരമ്പരാഗത ഇന്ത്യൻ ഹിന്ദു കുടിയേറ്റ കുടുംബത്തിലാണ് താൻ വളർന്നതെന്നും വളരെ സമാധാനപരവും സുരക്ഷിതവുമായ അന്തരീക്ഷം കുട്ടിക്കാലത്ത് ലഭിച്ചതിനാൽ തനിക്ക് മറ്റൊരു മതം തേടിപ്പോകേണ്ട സാഹചര്യം ഉണ്ടായിട്ടില്ലെന്നും ഉഷാ വാൻസ് വ്യക്തമാക്കി. ഇവാൻ, വിവേക്, മിരാബെൽ എന്നീ മൂന്ന് കുട്ടികളുള്ള ഈ ദമ്പതികൾ തങ്ങളുടെ നാലാമത്തെ കൺമണിക്കായുള്ള കാത്തിരിപ്പിലാണ് ഇപ്പോൾ.
അതിനിടെ, ഉഷാ വാൻസിന്റെ പ്രശസ്തമായ ‘സ്റ്റോറിടൈം വിത്ത് ദി സെക്കൻഡ് ലേഡി’ എന്ന പോഡ്കാസ്റ്റിൽ ജെ.ഡി വാൻസ് പങ്കെടുത്ത ഒരു വീഡിയോ സോഷ്യൽ മീഡിയയിൽ വൻതോതിൽ ട്രോളുകൾക്ക് ഇരയാവുകയാണ്. ഫാദേഴ്സ് ഡേ പ്രമാണിച്ചുള്ള പ്രത്യേക എപ്പിസോഡിൽ വിന്നി ദി പൂഹ് (Winnie the Pooh) കഥകൾ വായിക്കാനാണ് വൈസ് പ്രസിഡന്റ് എത്തിയത്. പോഡ്കാസ്റ്റിലേക്ക് സ്വാഗതം ചെയ്ത ഉഷയോട് “തീർച്ചയായും, നിങ്ങളെ കണ്ടതിൽ സന്തോഷം” എന്ന് പറഞ്ഞുകൊണ്ട് വാൻസ് ഭാര്യയുടെ കാൽമുട്ടിൽ തട്ടുന്ന (Knee pat) രീതിയാണ് നെറ്റിസൺസിനെ ചൊടിപ്പിച്ചത്. തികച്ചും അപരിചിതരായ ആളുകൾ പെരുമാറുന്നതുപോലെ തികച്ചും അസ്വാഭാവികവും അരോചകവുമായ രീതിയിലാണ് വാൻസ് ഭാര്യയോട് പെരുമാറിയതെന്നാണ് സോഷ്യൽ മീഡിയയിൽ ഉയരുന്ന വിമർശനം. “ഒരു നായയെ തലോടുന്നതുപോലെയാണ് അദ്ദേഹം ഭാര്യയുടെ കാലിൽ തട്ടിയത്” എന്നും, “ഇവർ തമ്മിൽ ശരിക്കും പരിചയമുണ്ടോ?” എന്നുമൊക്കെ ചോദിച്ചുകൊണ്ട് എക്സ് (X) പ്ലാറ്റ്ഫോമിൽ ഈ വീഡിയോ ഇപ്പോൾ വൻതോതിൽ ഷെയർ ചെയ്യപ്പെടുകയാണ്.
