അയർലൻഡിനെതിരായ ഒന്നാം ടി20 പോരാട്ടത്തിൽ ഇന്ത്യ 34 റൺസിന്റെ അപ്രതീക്ഷിത തോൽവി വഴങ്ങിയതിന് പിന്നാലെ സെലക്ഷൻ കമ്മിറ്റിക്കെതിരെ കടുത്ത വിമർശനവുമായി മുൻ ഇന്ത്യൻ നായകനും ചീഫ് സെലക്ടറുമായിരുന്ന കൃഷ്ണമാചാരി ശ്രീകാന്ത് രംഗത്ത്. ഇന്ത്യൻ ബൗളിങ് നിരയിൽ ചോർച്ചയുണ്ടാക്കുന്ന പ്രസിദ്ധ് കൃഷ്ണയ്ക്ക് പകരം മികച്ച ഫോമിലുള്ള സീനിയർ പേസർ ഭുവനേശ്വർ കുമാറിനെ ഉടനടി ടീമിലേക്ക് തിരികെ കൊണ്ടുവരണമെന്ന് ശ്രീകാന്ത് ആവശ്യപ്പെട്ടു.
അയർലൻഡിലെ സിവിൽ സർവീസ് ക്രിക്കറ്റ് ക്ലബ്ബ് മൈതാനത്ത് നടന്ന മത്സരത്തിൽ ആദ്യം ബാറ്റ് ചെയ്ത അയർലൻഡ് 9 വിക്കറ്റിന് 182 റൺസെന്ന വമ്പൻ സ്കോറാണ് പടുത്തുയർത്തിയത്. മറുപടി ബാറ്റിങ്ങിൽ ഇന്ത്യ 18.5 ഓവറിൽ 148 റൺസിന് ഓൾഔട്ടായി. മത്സരത്തിൽ നാല് ഓവറിൽ 57 റൺസ് വഴങ്ങിയ പേസർ പ്രസിദ്ധ് കൃഷ്ണയുടെയും വാഷിംഗ്ടൺ സുന്ദറിന്റെയും മോശം പ്രകടനമാണ് ഇന്ത്യയെ തോൽവിയിലേക്ക് തള്ളിയിട്ടതെന്ന് ശ്രീകാന്ത് വിലയിരുത്തി.
ശ്രീകാന്തിന്റെ വാക്കുകൾ ഇങ്ങനെ: “പ്രസീദ് കൃഷ്ണ തുടർച്ചയായി ഗുഡ് ലെങ്തിലാണ് പന്തെറിയുന്നത്. ബാറ്റർമാർക്ക് അടിച്ചുതകർക്കാൻ പാകത്തിൽ കൃത്യമായി സ്ലോട്ടിലാണ് അവന്റെ പന്തുകൾ വന്നു വീഴുന്നത്. പ്രസിദ്ധും വാഷിംഗ്ടൺ സുന്ദറും എറിഞ്ഞ ആ അഞ്ച് ഓവറുകളാണ് ഇന്ത്യയുടെ കളി തോൽപ്പിച്ചത്. ഭുവനേശ്വർ കുമാർ ഈ ബൗളിങ് നിരയിൽ ഒരു ‘ഓട്ടോമാറ്റിക് ചോയ്സ്’ ആയിരിക്കണം. അടിച്ചുപരത്താൻ പറ്റിയ കൃത്യമായ വേഗതയിലും ലെങ്തിലുമാണ് പ്രസിദ്ധ് പന്തെറിയുന്നത്. ഈ വർഷത്തെ ഐപിഎല്ലിൽ പോലും അവൻ അത്ര നല്ല ഫോമിലായിരുന്നില്ല.”
അടുത്തിടെ അവസാനിച്ച ഐപിഎൽ സീസണിൽ റോയൽ ചലഞ്ചേഴ്സ് ബെംഗളൂരുവിനായി പന്തെറിഞ്ഞ 36-കാരനായ ഭുവനേശ്വർ കുമാർ 16 മത്സരങ്ങളിൽ നിന്ന് 28 വിക്കറ്റുകളുമായി സീസണിലെ രണ്ടാമത്തെ ഉയർന്ന വിക്കറ്റ് വേട്ടക്കാരനായിരുന്നു. വെറും 7.95 എന്ന കർശനമായ ഇക്കോണമി റേറ്റിലായിരുന്നു ഭുവിയുടെ ഈ തകർപ്പൻ പ്രകടനം. എന്നാൽ ഇത്രയും മികച്ച ഫോമിലുള്ള സീനിയർ താരത്തെ പുറത്തിരുത്തി, ഐപിഎല്ലിലും അന്താരാഷ്ട്ര മത്സരങ്ങളിലും റൺസ് വഴങ്ങുന്നതിൽ യാതൊരു നിയന്ത്രണവുമില്ലാത്ത പ്രസീദിന് അവസരം നൽകുന്നതിനെയാണ് ശ്രീകാന്ത് ചോദ്യം ചെയ്യുന്നത്.
വാഷിംഗ്ടൺ സുന്ദർ ഐപിഎല്ലിൽ പോലും കൃത്യമായി പന്തെറിയാറില്ലെന്നും അയർലൻഡിനെതിരെ താരം നിരാശപ്പെടുത്തിയെന്നും ശ്രീകാന്ത് കൂട്ടിച്ചേർത്തു. ഇന്ത്യൻ ബൗളിങ്ങിൽ 33-കാരനായ ശിവം ദുബെയുടെ പ്രകടനത്തെ ശ്രീകാന്ത് പ്രശംസിച്ചു. 3 ഓവറിൽ വെറും 18 റൺസ് മാത്രം വഴങ്ങി ഒരു വിക്കറ്റെടുത്ത ദുബെ ഐപിഎല്ലിനേക്കാൾ ആത്മവിശ്വാസമുള്ള അന്താരാഷ്ട്ര താരമായി മാറിയെന്ന് അദ്ദേഹം പറഞ്ഞു.
പരമ്പരയിൽ 1-0 ന് പിന്നിലായ ഇന്ത്യയ്ക്ക് പരമ്പര കൈവിടാതിരിക്കാൻ ഇന്ന് (നടക്കുന്ന രണ്ടാം ടി20 മത്സരം നിർണ്ണായകമാണ്. ഇതേ വേദിയിൽ തന്നെയാണ് മത്സരം നടക്കുന്നത്. ഇന്ന് ജയിച്ച് പരമ്പരയിൽ ഒപ്പമെത്താനും, വരാനിരിക്കുന്ന ഇംഗ്ലണ്ട് പര്യടനത്തിന് മുൻപ് ആത്മവിശ്വാസം വീണ്ടെടുക്കാനും ശ്രേയസ് അയ്യർക്കും സംഘത്തിനും ഇന്ന് വലിയ മാർജിനിൽ വിജയിച്ചേ തീരൂ. ടീമിൽ ഭുവനേശ്വർ കുമാർ തിരിച്ചെത്തുമോ എന്നാണ് ആരാധകർ ഇപ്പോൾ ഉറ്റുനോക്കുന്നത്.
