ഇന്ത്യൻ ക്രിക്കറ്റ് ഇതിഹാസം സച്ചിൻ ടെണ്ടുൽക്കറുടെ ബാറ്റിങ് മികവിനെക്കുറിച്ച് ലോകം മുഴുവൻ വാഴ്ത്തുമ്പോഴും, അദ്ദേഹം ഡ്രെസ്സിങ് റൂമിൽ ഒളിപ്പിച്ചു വെച്ചിരുന്ന കളിതമാശകളെക്കുറിച്ച് അധികമാർക്കും അറിയില്ല. 2002-ൽ കട്ടക്കിൽ വെച്ച് ഇംഗ്ലണ്ടിനെതിരെ നടന്ന ഏകദിന മത്സരത്തിന് മുൻപ് പേസർ ജവഗൽ ശ്രീനാഥ് കടുത്ത സമ്മർദ്ദത്തിലായപ്പോൾ സച്ചിൻ ഒപ്പിച്ച ഒരു കിടിലൻ തമാശയെക്കുറിച്ച് മുൻ ഇന്ത്യൻ താരം ഹേമങ് ബദാനി വെളിപ്പെടുത്തിയിട്ടുണ്ട്.
കരിയറിലെ അവസാന ഘട്ടത്തിലൂടെ കടന്നുപോകുകയായിരുന്ന ജവഗൽ ശ്രീനാഥ് സാധാരണയായി മൈതാനത്ത് കടുത്ത ആത്മവിശ്വാസമുള്ള കളിക്കാരനാണ്. എന്നാൽ കട്ടക്ക് ഏകദിനത്തിന് തൊട്ടുമുൻപ് താരം അകാരണമായി വല്ലാതെ പരിഭ്രാന്തനായിരുന്നു. ശ്രീനാഥിന്റെ ഈ അസ്വസ്ഥത മാറ്റാനും ഡ്രെസ്സിങ് റൂമിലെ അന്തരീക്ഷം ലഘൂകരിക്കാനുമായിരുന്നു സച്ചിന്റെ ആ മാസ്റ്റർ പ്ലാൻ.
മത്സരത്തിൽ പ്ലെയിങ് ഇലവനിൽ ഇല്ലാതിരുന്ന ഹേമങ് ബദാനിയെയാണ് സച്ചിൻ ഈ പ്രാങ്കിനായി തിരഞ്ഞെടുത്തത്. 6 അടിയിലധികം ഉയരമുള്ള ശ്രീനാഥിന് നീളമേറിയ പാന്റും 5 അടി 5 ഇഞ്ചോളം മാത്രം ഉയരമുള്ള സച്ചിന് നീളം കുറഞ്ഞ പാന്റുമാണ് ഉണ്ടായിരുന്നത്. ടീം പരിശീലനത്തിന് ഇറങ്ങുന്നതിന് മുൻപ് സച്ചിൻ ബദാനിയോട് ഒരു രഹസ്യം പറഞ്ഞു: “നീ പോയി എന്റെ പാന്റ് എടുത്ത് ശ്രീനാഥിന്റെ ബാഗിൽ വെക്കുക, ശ്രീനാഥിന്റെ വലിയ പാന്റ് എടുത്ത് മറ്റെവിടെയെങ്കിലും ഒളിപ്പിച്ചു വെക്കുക.” സച്ചിൻ പറഞ്ഞതുപോലെ തന്നെ ബദാനി പാന്റുകൾ തമ്മിൽ മാറ്റി.
തന്റെ കാര്യങ്ങളിൽ വലിയ ശ്രദ്ധയൊന്നും കൊടുക്കാത്ത ശ്രീനാഥ്, പരിശീലനം കഴിഞ്ഞ് വന്ന് ബാഗിലിരുന്ന പാന്റുമെടുത്ത് ധരിച്ച് നേരെ മൈതാനത്തേക്ക് ഇറങ്ങി. ആദ്യ പന്തെറിഞ്ഞതിന് പിന്നാലെ ഇന്ത്യൻ താരങ്ങളെല്ലാം മൈതാനത്ത് പരസ്യമായി ചിരിക്കാൻ തുടങ്ങി. എന്താണ് സംഭവിക്കുന്നതെന്ന് ശ്രീനാഥിന് ആദ്യം മനസ്സിലായില്ല. തുടർന്ന് ഒരു സഹതാരം അടുത്ത് ചെന്ന് പറഞ്ഞപ്പോഴാണ് ശ്രീനാഥ് തന്റെ പാന്റിലേക്ക് നോക്കുന്നത്. കാൽമുട്ടിന് തൊട്ടുതാഴെ വരെ മാത്രം നിൽക്കുന്ന നീളം കുറഞ്ഞ പാന്റായിരുന്നു താൻ ധരിച്ചിരുന്നതെന്ന് ശ്രീനാഥ് അപ്പോഴാണ് തിരിച്ചറിഞ്ഞത്.
“ആദ്യ ഓവറിന് ശേഷം ശ്രീനാഥ് ഉടൻ തന്നെ ഡ്രെസ്സിങ് റൂമിലേക്ക് മടങ്ങി പാന്റ് മാറി. ‘എന്താ ഇവിടെ നടക്കുന്നത്, ഇത് ആരാ ചെയ്തത്?’ എന്ന് ചോദിച്ച് അവൻ എന്റെ നേരെ ചൂടായി. എന്നാൽ എനിക്ക് ഒന്നും അറിയില്ലെന്ന ഭാവത്തിൽ ഞാൻ കൈകൾ മലർത്തിക്കാട്ടി നിരപരാധിയായി നിന്നു.” – ബദാനി ചിരിയോടെ ഓർത്തെടുത്തു.
എന്തായാലും സച്ചിൻ ഒപ്പിച്ച ആ കുസൃതി കൃത്യമായി ഫലം കണ്ടു. ഡ്രെസ്സിങ് റൂമിലെ ആ ചിരി നിമിഷങ്ങൾ ശ്രീനാഥിന്റെ സമ്മർദ്ദം പൂർണ്ണമായും അകറ്റി. ആ മത്സരത്തിൽ 1/41 എന്ന മികച്ച ഇക്കണോമിയിൽ പന്തെറിഞ്ഞ് ഇന്ത്യയ്ക്കായി തകർപ്പൻ സ്പെല്ലാണ് ശ്രീനാഥ് കാഴ്ചവെച്ചത്.
