സൗരവ് ഗാംഗുലിയും സച്ചിൻ ടെണ്ടുൽക്കറും തമ്മിലുള്ള സൗഹൃദം ക്രിക്കറ്റ് ലോകത്ത് ഏറെ പ്രശസ്തമാണ്. ഇരുവരും ഒന്നിച്ചുള്ള അണ്ടർ-15 ദേശീയ ക്യാമ്പിനിടെ ഗാംഗുലിയെ പറ്റിക്കാൻ സച്ചിൻ ഒപ്പിച്ച ഒരു തകർപ്പൻ കുസൃതിയുടെ കഥയാണിത്. ഇൻഡോറിൽ നടന്ന അണ്ടർ-15 ദേശീയ ക്രിക്കറ്റ് ക്യാമ്പിനിടെയാണ് ഈ രസകരമായ സംഭവം നടക്കുന്നത്. ഒരു ഞായറാഴ്ച ഉച്ചയ്ക്ക് ഒട്ടും പ്രതീക്ഷിക്കാതെ സൗരവ് ഗാംഗുലി തന്റെ മുറിയിൽ സുഖമായി ഉറങ്ങാൻ കിടന്നു. എന്നാൽ, കിട്ടിയ ഒരു അവധി ദിവസം സഹതാരം ഇങ്ങനെ ഉറങ്ങിത്തീർക്കുന്നത് ഒട്ടും ശരിയല്ലെന്ന് സച്ചിന് തോന്നി.
ഗാംഗുലിയുടെ ഉറക്കം കെടുത്താൻ തന്നെ ഉറപ്പിച്ച സച്ചിൻ, ക്യാമ്പിലെ മറ്റ് ചില കൂട്ടുകാരെയും കൂട്ടി ബക്കറ്റുകളിൽ വെള്ളം നിറച്ചുകൊണ്ടുവന്നു. തുടർന്ന് അവർ ആ വെള്ളം മുഴുവൻ ഗാംഗുലി ഉറങ്ങിക്കിടന്ന മുറിയിലേക്ക് ഒഴുക്കിവിട്ടു. പെട്ടെന്ന് ഉറക്കത്തിൽ നിന്ന് ഞെട്ടിയുണർന്ന ഗാംഗുലി കണ്ടത് അക്ഷരാർത്ഥത്തിൽ അവിശ്വസനീയമായ കാഴ്ചയായിരുന്നു.
തന്റെ വിലപിടിപ്പുള്ള ക്രിക്കറ്റ് കിറ്റും വസ്ത്രങ്ങളും മുറിയിലെ വെള്ളത്തിൽ ഒഴുകിനടക്കുന്നു. ബാത്റൂമിലെ പൈപ്പ് എവിടെയെങ്കിലും പൊട്ടിയൊലിച്ചതാകാം ഈ വെള്ളപ്പൊക്കത്തിന് കാരണം എന്നാണ് പാവം ഗാംഗുലി ആദ്യം കരുതിയത്. കാര്യമറിയാതെ പരിഭ്രാന്തിയോടെ മുറിക്ക് പുറത്തേക്ക് ഇറങ്ങി നോക്കിയ ഗാംഗുലി കണ്ടത്, തന്നെ നോക്കി കുടുകുടെ ചിരിച്ചു നിൽക്കുന്ന സച്ചിൻ ടെണ്ടുൽക്കറെയാണ്. സച്ചിൻ ഒപ്പിച്ച കുസൃതിയായിരുന്നു ഇതെന്ന് മനസ്സിലായതോടെ ഗാംഗുലിയും ആകെ അന്തംവിട്ടുപോയി.
