ബെംഗളൂരു : ബെംഗളൂരുവിലെ ഇന്ത്യൻ ബഹിരാകാശ ഗവേഷണ സംഘടനയുടെ അന്താരാഷ്ട്ര ആസ്ഥാനമായ ‘അന്തരീക്ഷ ഭവന്’ നേരെ ബോംബ് ഭീഷണി. വ്യാഴാഴ്ച ഉച്ചക്ക് ശേഷമാണ് ഐഎസ്ആർഒ ചെയർമാന്റെ ഒഫീഷ്യൽ ഇമെയിൽ ഐഡിയിലേക്ക് ബോംബ് ഭീഷണി സന്ദേശം ലഭിച്ചത്. അതീവ സുരക്ഷാ പ്രാധാന്യമുള്ള സ്ഥാപനത്തിൽ സ്ഫോടകവസ്തുക്കൾ സ്ഥാപിച്ചിട്ടുണ്ടെന്നായിരുന്നു സന്ദേശം.
സന്ദേശം ശ്രദ്ധയിൽപ്പെട്ടയുടൻ അധികൃതർ ബെംഗളൂരു സിറ്റി പോലീസിനെ വിവരമറിയിച്ചു. ഉടൻ തന്നെ സഞ്ജയ് നഗർ പോലീസ് പരിധിയിൽ വരുന്ന ഐഎസ്ആർഒ ആസ്ഥാനത്തേക്ക് ബോംബ് ഡിറ്റക്ഷൻ ആൻഡ് ഡിസ്പോസൽ സ്ക്വാഡും ഡോഗ് സ്ക്വാഡും ഉൾപ്പെടെയുള്ള വൻ പോലീസ് സംഘം പാഞ്ഞെത്തി. തുടർന്ന് സുരക്ഷാ മുൻകരുതലുകളുടെ ഭാഗമായി ക്യാമ്പസിലുണ്ടായിരുന്ന ജീവനക്കാരെയും ശാസ്ത്രജ്ഞരെയും ഉടനടി കെട്ടിടത്തിൽ നിന്നും സുരക്ഷിതമായി പുറത്തെത്തിച്ചു. തുടർന്ന്, കെട്ടിട സമുച്ചയത്തിന്റെ ഓരോ കോണിലും മണിക്കൂറുകളോളം നീണ്ട വിശദമായ പരിശോധനയും സാനിറ്റൈസേഷൻ പ്രക്രിയയും നടത്തി.
പരിശോധനയിൽ സംശയാസ്പദമായ യാതൊരുവിധ വസ്തുക്കളും കണ്ടെത്തിയിട്ടില്ല എന്ന് പോലീസ് സ്ഥിരീകരിച്ചു. സമാനമായ രീതിയിൽ ജൂൺ 29-ന് രാജ്യത്തെ പ്രമുഖ സുരക്ഷാ ഏജൻസികളായ നാഷണൽ ഇൻവെസ്റ്റിഗേഷൻ ഏജൻസി (NIA), ഡിഫൻസ് റിസർച്ച് ആൻഡ് ഡെവലപ്മെന്റ് ഓർഗനൈസേഷൻ (DRDO), മിനിസ്ട്രി ഓഫ് സിവിൽ ഏവിയേഷൻ എന്നിവയ്ക്കും എയർ ഇന്ത്യയുടെ ന്യൂയോർക്ക് വിമാനത്തിനും ബോംബ് ഭീഷണി സന്ദേശങ്ങൾ ലഭിച്ചിരുന്നു. ഈ സംഭവത്തിൽ ഗാസിയാബാദ് സ്വദേശിയായ ഒരാൾ അറസ്റ്റിലായിരുന്നു.
