രാജസ്ഥാന്റെ യാത്രാ സൗകര്യങ്ങൾക്കും വിനോദസഞ്ചാര മേഖലയ്ക്കും വൻ കുതിപ്പേകാൻ പോകുന്ന ജോധ്പൂർ വിമാനത്താവളത്തിലെ പുതിയ ടെർമിനൽ മന്ദിരം പ്രധാനമന്ത്രി നരേന്ദ്ര മോദി ശനിയാഴ്ച ഉദ്ഘാടനം ചെയ്തു. 480 കോടി രൂപ ചിലവഴിച്ച് അത്യാധുനിക രീതിയിലാണ് ഈ ടെർമിനൽ നിർമ്മിച്ചിരിക്കുന്നത്.
വിമാനത്താവള വികസനത്തിനൊപ്പം രാജ്യത്തെ സാധാരണക്കാർക്കും വ്യോമയാനം സാധ്യമാക്കുന്ന പരിഷ്കരിച്ച ‘ഉഡാൻ’ പദ്ധതിയുടെ പ്രഖ്യാപനവും പ്രധാനമന്ത്രി ചടങ്ങിൽ വെച്ച് നിർവ്വഹിച്ചു. രാജസ്ഥാനിലെ രണ്ടാമത്തെ വലിയ നഗരമായ ജോധ്പൂരിലെത്തിയ പ്രധാനമന്ത്രി നരേന്ദ്ര മോദിക്ക് വൻ സ്വീകരണമാണ് ലഭിച്ചത്. രാജസ്ഥാൻ ഗവർണർ ഹരിഭാവു ബാഗ്ഡെ, കേന്ദ്രമന്ത്രിയും ജോധ്പൂർ എംപിയുമായ ഗജേന്ദ്ര സിംഗ് ഷെഖാവത്ത്, രാജസ്ഥാൻ മുഖ്യമന്ത്രി ഭജൻലാൽ ശർമ്മ എന്നിവർ ചേർന്നാണ് പ്രധാനമന്ത്രിയെ സ്വീകരിച്ചത്. റിമോട്ട് കൺട്രോൾ സംവിധാനത്തിലൂടെ ശിലാഫലകം അനാച്ഛാദനം ചെയ്തുകൊണ്ട് പ്രധാനമന്ത്രി പുതിയ ടെർമിനൽ മന്ദിരം നാടിന് സമർപ്പിച്ചു. തുടർന്ന് അദ്ദേഹം പുതിയ മന്ദിരത്തിനുള്ളിൽ കയറി സജ്ജീകരണങ്ങൾ വിലയിരുത്തുകയും ചെയ്തു.
പ്രതിവർഷം 20 ലക്ഷം യാത്രക്കാരെ കൈകാര്യം ചെയ്യാം. 23,000 ചതുരശ്ര മീറ്ററിലധികം വിസ്തൃതിയിലാണ് ഈ അത്യാധുനിക ടെർമിനൽ മന്ദിരം പണികഴിപ്പിച്ചിരിക്കുന്നത്. വിമാനത്താവള വികസനത്തോടെ പ്രതിവർഷം 20 ലക്ഷം യാത്രക്കാരെ കൈകാര്യം ചെയ്യാൻ ഈ പുതിയ ടെർമിനലിന് സാധിക്കുമെന്ന് പ്രധാനമന്ത്രിയുടെ ഓഫീസ് വ്യക്തമാക്കി. യാത്രക്കാർക്ക് കൂടുതൽ സുഗമവും സുഖപ്രദവുമായ യാത്രാനുഭവം നൽകുന്നതിനായി അത്യാധുനിക അന്താരാഷ്ട്ര നിലവാരത്തിലുള്ള സൗകര്യങ്ങളും ഇൻഫ്രാസ്ട്രക്ചറുമാണ് ഇവിടെ ഒരുക്കിയിരിക്കുന്നത്.
വിമാനത്താവള ടെർമിനൽ ഉദ്ഘാടനത്തോടൊപ്പം കേന്ദ്ര സർക്കാരിന്റെ മുൻനിര പ്രാദേശിക കണക്റ്റിവിറ്റി പ്രോഗ്രാമായ ‘ഉഡാൻ’ പദ്ധതിയുടെ പുതുക്കിയ പതിപ്പും പ്രധാനമന്ത്രി ലോഞ്ച് ചെയ്തു. വരും ദശകത്തിൽ രാജ്യത്തുടനീളമുള്ള ഉൾനാടൻ, ഉൾഗ്രാമ പ്രദേശങ്ങളിലേക്ക് വ്യോമയാന സർവീസുകൾ വ്യാപിപ്പിക്കുന്നതിനായി 28,840 കോടി രൂപയാണ് ഈ പരിഷ്കരിച്ച പദ്ധതിയിലൂടെ നീക്കിവെച്ചിരിക്കുന്നത്.
വിമാന സർവീസുകൾ ഇല്ലാത്തതോ കുറഞ്ഞ സർവീസുകൾ മാത്രമുള്ളതോ ആയ വിദൂര മേഖലകളിലേക്ക് കണക്റ്റിവിറ്റി ഉറപ്പാക്കുകയാണ് ഇതിലൂടെ ലക്ഷ്യമിടുന്നത്. സാധാരണക്കാരായ പൗരന്മാർക്ക് എളുപ്പത്തിൽ വിമാനയാത്ര ലഭ്യമാക്കുക എന്ന കേന്ദ്ര സർക്കാരിന്റെ ദീർഘവീക്ഷണത്തിന്റെ ഭാഗമായാണ് ഈ വലിയ തുക പ്രഖ്യാപിച്ചിരിക്കുന്നത്
