ടെഹ്റാൻ : കഴിഞ്ഞ ഫെബ്രുവരിയിൽ യുഎസ്-ഇസ്രായേൽ സംയുക്ത വ്യോമാക്രമണത്തിൽ കൊല്ലപ്പെട്ട ഇറാന്റെ പരമോന്നത നേതാവ് ആയത്തുള്ള അലി ഖമേനിയുടെ ഭൗതികശരീരം വഹിച്ചുകൊണ്ടുള്ള ഔദ്യോഗിക വിലാപയാത്രകളും ചടങ്ങുകളും ടെഹ്റാനിൽ ആരംഭിച്ചപ്പോൾ കടുത്ത വികാരനിർഭരമായ രംഗങ്ങൾക്ക് സാക്ഷ്യം വഹിച്ച് ലോകം. ടെഹ്റാനിലെ ഗ്രാൻഡ് മൊസല്ലയിൽ നടന്ന വിടവാങ്ങൽ ചടങ്ങിൽ, ഇറാന്റെ പാർലമെന്റ് സ്പീക്കർ മുഹമ്മദ് ബാഗർ ഗാലിബാഫും വിദേശകാര്യ മന്ത്രി അബ്ബാസ് അരാഗ്ചിയും ഖമേനിയുടെ ഭൗതികശരീരം അടങ്ങിയ പെട്ടിക്ക് മുന്നിൽ പൊട്ടിക്കരഞ്ഞത് രാജ്യത്തെ ജനങ്ങളെയും സുരക്ഷാ ഉദ്യോഗസ്ഥരെയും ഒരുപോലെ കണ്ണീരിലാഴ്ത്തി. പ്രാർത്ഥനകൾക്കിടയിൽ ദുഃഖം നിയന്ത്രിക്കാനാകാതെ ഇരുവരും വിതുമ്പുന്നതിന്റെ ദൃശ്യങ്ങൾ ഇറാനിയൻ മാധ്യമങ്ങൾ പുറത്തുവിട്ടതോടെ ആഗോളതലത്തിൽ ഇത് വലിയ വാർത്തയായി മാറി. ഇറാന്റെ ചരിത്രത്തിലെ ഏറ്റവും നിർണ്ണായകമായ ഘട്ടത്തിലൂടെ രാജ്യം കടന്നുപോകുമ്പോൾ, തങ്ങളുടെ പ്രിയ നേതാവിന്റെ വേർപാട് ഭരണകൂടത്തെ എത്രത്തോളം ഉലച്ചിരിക്കുന്നു എന്നതിന്റെ തെളിവായി ഈ രംഗം മാറി.
ഇറാൻ പ്രസിഡന്റ് മസൂദ് പെസെഷ്കിയാൻ, ജുഡീഷ്യറി തലവൻ ഗുലാം ഹുസൈൻ മൊഹ്സെനി ഈജെ തുടങ്ങിയ ഉന്നത നേതാക്കളും സൈനിക മേധാവികളും ചടങ്ങിൽ പങ്കെടുത്തു. ഫെബ്രുവരി 28-ന് നടന്ന ആക്രമണത്തിൽ ഖമേനിയോടൊപ്പം അദ്ദേഹത്തിന്റെ മകൾ, മരുമകൻ, ചെറുമകൾ എന്നിവരും കൊല്ലപ്പെട്ടിരുന്നു. യുദ്ധസാഹചര്യങ്ങളും സുരക്ഷാ ഭീഷണികളും കാരണം കഴിഞ്ഞ നാല് മാസമായി നീട്ടിവെച്ചിരുന്ന ശവസംസ്കാര ചടങ്ങുകൾ, കഴിഞ്ഞ മാസം ഒപ്പുവെച്ച താൽക്കാലിക വെടിനിർത്തൽ കരാറിന് ശേഷമാണ് ഇപ്പോൾ വിപുലമായ രീതിയിൽ നടത്തപ്പെടുന്നത്. കറുത്ത വസ്ത്രം ധരിച്ചെത്തിയ ദശലക്ഷക്കണക്കിന് ആളുകളാണ് ടെഹ്റാനിലെ തെരുവുകളിൽ വിതുമ്പിക്കൊണ്ടും നെഞ്ചത്തടിച്ചുകൊണ്ടും തങ്ങളുടെ നേതാവിന് വിട നൽകാനായി തടിച്ചുകൂടിയത്. കനത്ത സുരക്ഷയിലാണ് ചടങ്ങുകൾ പുരോഗമിക്കുന്നത്.
ആഗോളതലത്തിൽ നിന്നുള്ള പ്രമുഖ നേതാക്കളും വിവിധ രാജ്യങ്ങളുടെ നയതന്ത്ര പ്രതിനിധികളും ചടങ്ങിൽ അനുശോചനം രേഖപ്പെടുത്താൻ എത്തിയിരുന്നു. ഇന്ത്യയെ പ്രതിനിധീകരിച്ച് കേന്ദ്ര വിദേശകാര്യ സഹമന്ത്രി പവിത്ര മാർഗരിറ്റ, ബിഹാർ ഗവർണർ ലെഫ്റ്റനന്റ് ജനറൽ (റിട്ട.) സയ്യിദ് അതാ ഹസ്നൈൻ എന്നിവർ ചടങ്ങിൽ പങ്കെടുത്തു. ഇവർക്ക് പുറമെ കോൺഗ്രസ് നേതാവ് സൽമാൻ ഖുർഷിദ്, പിഡിപി അധ്യക്ഷ മെഹബൂബ മുഫ്തി എന്നിവരും ഖമേനിക്ക് അന്തിമോപചാരം അർപ്പിക്കാൻ ടെഹ്റാനിൽ എത്തിയിട്ടുണ്ട്. റഷ്യൻ സെക്യൂരിറ്റി കൗൺസിൽ ഡെപ്യൂട്ടി ചെയർമാൻ ദിമിത്രി മെദ്വദേവ്, പാകിസ്താൻ പ്രധാനമന്ത്രി ഷെഹ്ബാസ് ഷെരീഫ് തുടങ്ങിയ പ്രമുഖ അന്താരാഷ്ട്ര നേതാക്കളും വിടവാങ്ങൽ ചടങ്ങിന്റെ ഭാഗമായി. അതേസമയം, സുരക്ഷാ കാരണങ്ങളാൽ ഖമേനിയുടെ മകനും പുതിയ പരമോന്നത നേതാവുമായ മുജ്തബ ഖമേനി ചടങ്ങിൽ പരസ്യമായി പങ്കെടുത്തില്ല എന്നത് ശ്രദ്ധേയമായി.
