പാകിസ്താൻ അധിനിവേശ കശ്മീരിൽ ആഴ്ചകളായി തുടരുന്ന കടുത്ത ആഭ്യന്തര അസ്വാസ്ഥ്യങ്ങൾക്കിടയിൽ, പാക് ഭരണകൂടത്തിനെതിരെ കടുത്ത നിലപാടുമായി പ്രക്ഷോഭകാരികൾ രംഗത്ത്. മേഖലയിലെ ജനകീയ കൂട്ടായ്മയായ ജോയിന്റ് അവാമി ആക്ഷൻ കമ്മിറ്റി നേതാവ് സർദാർ അമൻ ഖാൻ, പാകിസ്താന്റെ സാമ്പത്തിക ഉപരോധത്തെത്തുടർന്ന് കടുത്ത ദുരിതത്തിലായ ജനങ്ങളെ രക്ഷിക്കാൻ ഇന്ത്യയുടെ സഹായം അഭ്യർത്ഥിച്ചു.
റാവലക്കോട്ടിലെ ഈദ്ഗാ ഗ്രൗണ്ടിൽ നടന്ന വൻ ജനമുന്നേറ്റത്തെ അഭിസംബോധന ചെയ്യവെയാണ്, അതിർത്തിയിലെ നിയന്ത്രണരേഖ മറികടന്ന് ഇന്ത്യയിലേക്ക് നീങ്ങുന്നതിനെക്കുറിച്ച് അദ്ദേഹം ജനങ്ങളോട് ആരായുകയും ജനക്കൂട്ടം അതിനെ പൂർണ്ണമായി പിന്തുണയ്ക്കുകയും ചെയ്തത്. മേഖലയിൽ ഭക്ഷണത്തിനും മരുന്നുകൾക്കും കടുത്ത ക്ഷാമം നേരിടുകയാണെന്നും ജനങ്ങൾ വലിയൊരു മാനുഷിക പ്രതിസന്ധിയിലൂടെയാണ് കടന്നുപോകുന്നതെന്നും സർദാർ അമൻ ഖാൻ വെളിപ്പെടുത്തി. സമാധാനപരമായി അവകാശങ്ങൾക്കായി സമരം ചെയ്യുന്ന ജനങ്ങളെ തോക്കുകൾ കൊണ്ട് അടിച്ചമർത്താനാണ് പാക് സൈന്യവും ഭരണകൂടവും ശ്രമിക്കുന്നതെങ്കിൽ തങ്ങൾക്ക് മുന്നിൽ മറ്റ് വഴികളുണ്ടെന്ന് അദ്ദേഹം മുന്നറിയിപ്പ് നൽകി.
പൂഞ്ച്, ദോഡ സെക്ടറുകളിലെ അതിർത്തികൾ തുറന്നുനൽകണമെന്നും കശ്മീരിന്റെ ദുരിതങ്ങളിൽ ഇന്ത്യയുടെ ഇടപെടൽ ആവശ്യമാണെന്നും സോഷ്യൽ മീഡിയയിൽ വ്യാപകമായി പ്രചരിക്കുന്ന അദ്ദേഹത്തിന്റെ പ്രസംഗത്തിൽ വ്യക്തമാക്കുന്നുണ്ട്. കഴിഞ്ഞ മാസം മുതൽ ആരംഭിച്ച ജനകീയ പ്രക്ഷോഭങ്ങളെ അടിച്ചമർത്താൻ ജിഎഎസിയെ ഒരു ഭീകര സംഘടനയായി പ്രഖ്യാപിച്ച് പാകിസ്താൻ നിരോധിച്ചിരുന്നു. ഇതോടെയാണ് അവകാശങ്ങൾക്ക് വേണ്ടിയുള്ള സമരം പാകിസ്താനിൽ നിന്നുള്ള സ്വാതന്ത്ര്യത്തിനായുള്ള കടുത്ത ജനകീയ പ്രക്ഷോഭമായി മാറിയത്. പതിറ്റാണ്ടുകളായി ഇസ്ലാമാബാദിന്റെ നിയന്ത്രണത്തിലുള്ള കരിനിയമങ്ങളും കടുത്ത അവഗണനയും നേരിടുന്ന അധിനിവേശ കശ്മീരിലെ ജനങ്ങൾ “ഞങ്ങൾക്ക് സ്വാതന്ത്ര്യം വേണം” എന്ന മുദ്രാവാക്യങ്ങളുമായി തെരുവിൽ തുടരുകയാണ്.
