പശ്ചിമ ബംഗാളിൽ സർക്കാർ ക്ഷേമപദ്ധതികളുടെ ആനുകൂല്യങ്ങൾ കൈപ്പറ്റുന്നവർക്കായി കടുത്ത നിബന്ധനകളും നിയന്ത്രണങ്ങളുമായി മുഖ്യമന്ത്രി സുവേന്ദു അധികാരി. അർഹരായ പാവപ്പെട്ടവരിലേക്ക് മാത്രം സർക്കാർ സഹായങ്ങൾ എത്തിക്കുക എന്ന ലക്ഷ്യത്തോടെയാണ് പുതിയ ഭരണപരിഷ്കാരങ്ങൾ പ്രഖ്യാപിച്ചിരിക്കുന്നത്. ഇതിന്റെ ഭാഗമായി സംസ്ഥാനത്തെ പ്രശസ്തമായ ‘ലക്ഷ്മീർ ഭണ്ഡാർ’ പദ്ധതി നിറുത്തലാക്കി പകരം ‘അന്നപൂർണ യോജന’ എന്ന പുതിയ പദ്ധതിയും ബംഗാൾ സർക്കാർ അവതരിപ്പിച്ചു. പുതിയ മാറ്റങ്ങൾ പ്രകാരം മൂന്നോ അതിലധികമോ തവണ വിവാഹം കഴിച്ചവർക്ക് ഇനി മുതൽ യാതൊരുവിധ സർക്കാർ ആനുകൂല്യങ്ങളും ലഭിക്കില്ല. ജനസംഖ്യാ നിയന്ത്രണവും കുടുംബ ഭദ്രതയും മുൻനിർത്തിയാണ് സർക്കാർ ഈ കടുത്ത തീരുമാനത്തിലേക്ക് കടന്നതെന്നാണ് റിപ്പോർട്ടുകൾ.
സാമൂഹിക ക്ഷേമ പദ്ധതികൾ പൂർണ്ണമായും സുതാര്യമാക്കുന്നതിന്റെ ഭാഗമായി വലിയ അഴിച്ചുപണിയാണ് ബംഗാൾ സർക്കാർ നടത്തിയിരിക്കുന്നത്. മൂന്ന് വിവാഹം കഴിച്ചവർക്ക് പുറമെ, കുട്ടികൾക്ക് പ്രതിരോധ കുത്തിവെയ്പ്പുകൾ എടുക്കാൻ വിസമ്മതിക്കുന്ന മാതാപിതാക്കൾക്കും പുതിയ നിയമപ്രകാരം ആനുകൂല്യങ്ങൾ നഷ്ടമാകും. സർക്കാർ നിർദ്ദേശിച്ചിട്ടുള്ള അടിസ്ഥാന വാക്സിനുകളോ അടിയന്തര വാക്സിനുകളോ എടുക്കാത്ത കുടുംബങ്ങളെ ക്ഷേമപദ്ധതികളുടെ ലിസ്റ്റിൽ നിന്നും പൂർണ്ണമായും ഒഴിവാക്കും. ആരോഗ്യരംഗത്ത് മികച്ച മുന്നേറ്റം ലക്ഷ്യമിട്ടാണ് സർക്കാർ ഈ നിലപാട് സ്വീകരിച്ചിരിക്കുന്നത്. ഇതോടൊപ്പം, കുട്ടികളെ സർക്കാർ സ്കൂളുകളിൽ നിന്നും മാറ്റി ‘ചില പ്രത്യേക മതപഠന ശാലകളിൽ’ (മദ്രസകൾ ഉൾപ്പെടെയുള്ളവ) ചേർക്കുന്ന രക്ഷിതാക്കളുടെ അലവൻസുകളും റദ്ദാക്കുമെന്ന് സർക്കാർ വ്യക്തമാക്കിയിട്ടുണ്ട്. കുട്ടികളുടെ പൊതുവിദ്യാഭ്യാസം ഉറപ്പുവരുത്തുന്നതിനാണ് ഈ നീക്കം.
കൂടാതെ, ബംഗാളിലേക്ക് നടക്കുന്ന അനധികൃത കുടിയേറ്റങ്ങൾ തടയുന്നതിന്റെ ഭാഗമായി കടുത്ത പരിശോധനകൾക്ക് ശേഷമേ ഇനി ആനുകൂല്യങ്ങൾ വിതരണം ചെയ്യൂ. ഇന്ത്യൻ പൗരന്മാരല്ലെന്ന് കണ്ടെത്തുന്ന വ്യക്തികളെ എല്ലാത്തരം സർക്കാർ ധനസഹായങ്ങളിൽ നിന്നും പൂർണ്ണമായും അയോഗ്യരാക്കും. ഈ നാല് പ്രധാന നിബന്ധനകളും കർശനമായി നടപ്പിലാക്കാൻ ഉദ്യോഗസ്ഥർക്ക് മുഖ്യമന്ത്രി നേരിട്ട് നിർദ്ദേശം നൽകിയിട്ടുണ്ട്.
