ഇന്ത്യൻ ടി20 ക്രിക്കറ്റ് ടീമിൽ റോയൽ ചലഞ്ചേഴ്സ് ബെംഗളൂരു (ആർസിബി) ക്യാപ്റ്റൻ രജത് പടിദാറിനെ ഉൾപ്പെടുത്തണമെങ്കിൽ നിലവിൽ ടീമിലുള്ള ഏതെങ്കിലും ഒരു പ്രധാന ബാറ്ററെ ഒഴിവാക്കേണ്ടി വരുമെന്ന് മുൻ ഇന്ത്യൻ താരം ആകാശ് ചോപ്ര. ഇംഗ്ലണ്ടിനെതിരെയുള്ള രണ്ടാം ടി20 മത്സരത്തിൽ മലയാളി താരം സഞ്ജു സാംസണെ പ്ലെയിങ് ഇലവനിൽ നിന്ന് പുറത്തിരുത്തിയ നടപടി പോലും ശരിയായി തോന്നിയില്ലെന്ന് അദ്ദേഹം ചൂണ്ടിക്കാട്ടി. ഇംഗ്ലണ്ടിനെതിരെ ഇപ്പോൾ നടക്കുന്ന അഞ്ച് മത്സരങ്ങളുടെ ടി20 പരമ്പരയ്ക്കുള്ള പതിനാറംഗ ഇന്ത്യൻ ടീമിൽ പടിദാറിന് ഇടം ലഭിച്ചിരുന്നില്ല. ആദ്യ മത്സരത്തിൽ കളിച്ച സഞ്ജു സാംസണെ, യുവതാരം വൈഭവ് സൂര്യവംശിയെ ടോപ് ഓർഡറിൽ ഉൾപ്പെടുത്താൻ വേണ്ടിയാണ് രണ്ടാം മത്സരത്തിൽ നിന്നും ഒഴിവാക്കിയത്. തന്റെ യൂട്യൂബ് ചാനലിലൂടെ ഇന്ത്യൻ ബാറ്റിങ് ലൈനപ്പിലെ വലതുകൈയ്യൻ ബാറ്റർമാരുടെ കുറവ് പരിഹരിക്കാൻ പടിദാറിനെ പരിഗണിക്കുന്നതിനെക്കുറിച്ചുള്ള ചോദ്യത്തോട് പ്രതികരിക്കുകയായിരുന്നു ആകാശ് ചോപ്ര.
പടിദാറിന് ടീമിൽ ഇടം കണ്ടെത്തണമെങ്കിൽ നിലവിൽ മികച്ച ഫോമിലുള്ള ആരെ ഒഴിവാക്കുമെന്ന ചോദ്യത്തിന് ഉത്തരം കണ്ടെത്തേണ്ടതുണ്ടെന്ന് ചോപ്ര നിരീക്ഷിച്ചു. നിലവിൽ ആദ്യ മൂന്ന് സ്ഥാനങ്ങളിലും ഇടംകൈയ്യൻ ബാറ്റർമാരായ വൈഭവ് സൂര്യവംശി, അഭിഷേക് ശർമ്മ, ഇഷാൻ കിഷൻ എന്നിവരാണുള്ളത്. ഈ മൂന്ന് പേരിൽ ആരെയും മാറ്റാൻ സാധിക്കില്ല. മൂന്നാം നമ്പരിൽ കളിക്കുന്ന ഇഷാൻ കിഷൻ അടുത്തിടെയാണ് ലോക ടി20 റാങ്കിങ്ങിൽ ഒന്നാം സ്ഥാനത്തെത്തിയത്. കൂടാതെ, ഭാരതത്തിന്റെ കപ്പ് വിജയത്തിൽ നിർണായക പങ്കുവഹിച്ച 2026 ലെ ടി20 ലോകകപ്പിലെ മികച്ച താരം കൂടിയായ സഞ്ജു സാംസണോട് ഇപ്പോൾ തന്നെ നീതികേടാണ് കാണിക്കുന്നതെന്നും ചോപ്ര തുറന്നടിച്ചു. മുൻപ് കളിച്ച മൂന്ന് ഇന്നിങ്സുകളിലെ പരാജയത്തിന്റെ പേരിലാണ് സഞ്ജുവിനെ രണ്ടാം മത്സരത്തിൽ നിന്ന് ഒഴിവാക്കിയത്.
നാലാം നമ്പരിൽ ക്യാപ്റ്റൻ ശ്രേയസ് അയ്യരും അഞ്ചാം നമ്പരിൽ വൈസ് ക്യാപ്റ്റൻ തിലക് വർമ്മയുമാണ് കളിക്കുന്നത്. ഇവരെ രണ്ടുപേരെയും ടീമിൽ നിന്ന് മാറ്റാൻ കഴിയില്ല. ആറാം നമ്പരിൽ കളിക്കുന്ന ശിവം ദുബെയ്ക്ക് പകരം രജത് പടിദാറിനെ കളിപ്പിക്കാൻ ടീം മാനേജ്മെന്റ് തയ്യാറാകുമോ എന്നും ചോപ്ര ചോദ്യമുയർത്തി. പടിദാർ ഭാവിയിൽ തീർച്ചയായും ഇന്ത്യൻ ടീമിലേക്ക് തിരിച്ചെത്തുമെന്ന കാര്യത്തിൽ സംശയമില്ലെന്നും എന്നാൽ നിലവിലെ സാഹചര്യത്തിൽ അതിന് പെട്ടെന്ന് സാധ്യത കാണുന്നില്ലെന്നും അദ്ദേഹം കൂട്ടിച്ചേർത്തു. ഇന്ത്യക്കായി ഇതിനകം മൂന്ന് ടെസ്റ്റുകളിലും ഒരു ഏകദിനത്തിലും കളിച്ചിട്ടുള്ള പടിദാറിന്, ആഭ്യന്തര ട്വന്റി-20 ക്രിക്കറ്റിൽ മികച്ച റെക്കോർഡാണുള്ളത്.
