തലസ്ഥാനമായ മുസഫറാബാദിലേക്ക് നടത്താനിരുന്ന ബഹുജന മാർച്ച് ജൂലൈ 21 ലേക്ക് മാറ്റിവെച്ചിട്ടും പാകിസ്താൻ അധീന കശ്മീരിൽ ജനകീയ പ്രക്ഷോഭം 38-ാം ദിവസവും അതിശക്തമായി തുടരുകയാണ്. രാവലാകോട്ടിലെ ഈദ്ഗാ മൈതാനം കേന്ദ്രീകരിച്ച് പതിനായിരക്കണക്കിന് പ്രക്ഷോഭകരാണ് പാക് സൈനിക ഭരണകൂടത്തിനും അവിടുത്തെ പ്രാദേശിക സർക്കാരിനുമെതിരെ നേരിട്ട് രംഗത്തിറങ്ങിയിരിക്കുന്നത്. ജനകീയ പ്രക്ഷോഭത്തിന് നേതൃത്വം നൽകുന്ന പ്രമുഖ നേതാവായ സർദാർ അമൻ ഖാൻ പാക് ഭരണകൂടത്തിനെതിരെയും സൈന്യത്തിനെതിരെയും കടുത്ത ആരോപണങ്ങളാണ് റാലിയിൽ ഉന്നയിച്ചത്. അതിക്രമങ്ങളിൽ കൊല്ലപ്പെട്ടവരുടെ വിവരങ്ങൾ സൈന്യം മറച്ചുവെക്കുകയാണെന്നും പരിക്കേറ്റ ജനങ്ങളെ ആശുപത്രികളിൽ നിന്ന് പോലും സൈന്യം ബലമായി തട്ടിക്കൊണ്ടുപോകുകയാണെന്നും അദ്ദേഹം ആരോപിച്ചു.
ജൂൺ 5 മുതൽ ഇതുവരെ സൈനിക അടിച്ചമർത്തലുകളിൽ 73 പൗരന്മാർ കൊല്ലപ്പെട്ടതായും, ഇതിൽ 56 പേരുടെ മൃതദേഹങ്ങൾ പാക് സൈന്യം നിയമവിരുദ്ധമായി കൈവശം വെച്ച് മാന്യമായ സംസ്കാര ചടങ്ങുകൾ നടത്തുന്നതിനുള്ള അവകാശം നിഷേധിക്കുകയാണെന്നും പ്രക്ഷോഭകർ വ്യക്തമാക്കുന്നു. കൂടാതെ പരിക്കേറ്റ് ആശുപത്രികളിൽ ചികിത്സയിൽ കഴിഞ്ഞിരുന്ന 219 പേരെ പാകിസ്താൻ റേഞ്ചേഴ്സ് സൈനിക വാഹനങ്ങളിൽ ജയിലുകളിലേക്ക് മാറ്റിയെന്നും ഇവർക്കെതിരെ യാതൊരുവിധ എഫ്.ഐ.ആറോ നിയമസഹായമോ ലഭ്യമാക്കിയിട്ടില്ലെന്നും അമൻ ഖാൻ കുറ്റപ്പെടുത്തി. ലോകത്തെ ഒരു യുദ്ധനിയമങ്ങളും അനുവദിക്കാത്ത ഇത്തരം ക്രൂരതകൾക്കെതിരെ തങ്ങളുടെ സഹപ്രവർത്തകരെ ജയിലിൽ നിന്ന് മോചിപ്പിക്കാതെയും കൊല്ലപ്പെട്ടവർക്ക് അർഹമായ യാത്രാമൊഴി നൽകുകയും ചെയ്യാതെ ഈ സമരവേദിയിൽ നിന്ന് ആരും മടങ്ങില്ലെന്ന് അദ്ദേഹം പ്രഖ്യാപിച്ചു.
ഫ്രോണ്ടിയർ കോർപ്സിനും റേഞ്ചേഴ്സിനും ഒത്താശ ചെയ്യുന്ന പ്രാദേശിക പൊലീസിനും സിവിൽ ഉദ്യോഗസ്ഥർക്കും അമൻ ഖാൻ കടുത്ത മുന്നറിയിപ്പ് നൽകി. ജൂലൈ 15 ലെ മാർച്ച് 21 ലേക്ക് മാറ്റിയത് തങ്ങളുടെ സമാധാനപരമായ മുഖമാണെന്നും എന്നാൽ ആവശ്യങ്ങൾ അംഗീകരിച്ചില്ലെങ്കിൽ കടുത്ത സായുധ പ്രതിരോധത്തിലേക്ക് നീങ്ങുമെന്നും അദ്ദേഹം മുന്നറിയിപ്പ് നൽകി. വരാനിരിക്കുന്ന ജൂലൈ 27 ലെ പ്രാദേശിക തിരഞ്ഞെടുപ്പിൽ അട്ടിമറിക്ക് ശ്രമിച്ചാൽ തിരഞ്ഞെടുപ്പ് പൂർണ്ണമായി ബഹിഷ്കരിക്കുമെന്നും തടയുമെന്നും പ്രക്ഷോഭകർ പ്രഖ്യാപിച്ചു.
പാക് സൈനിക മേധാവി ജനറൽ ആസിം മുനീറിന്റെയോ ഐ.എസ്.ഐ സെക്ടർ കമാൻഡർ ബ്രിഗേഡിയർ ഫായിഖ് അയൂബിന്റെയോ പേരെടുത്ത് പറയാതെ, തിരഞ്ഞെടുപ്പ് നടത്തുകയോ ജനങ്ങളെ ഭയപ്പെടുത്തുകയോ ചെയ്യലല്ല സൈനിക ജനറൽമാരുടെയും കേണൽമാരുടെയും പണിയെന്ന് അദ്ദേഹം ആഞ്ഞടിച്ചു. ജനറൽമാർ ആഡംബര ജീവിതത്തിലും ഡി.എച്ച്.എ പ്ലോട്ടുകൾ സ്വന്തമാക്കുന്നതിലുമാണ് ശ്രദ്ധ കേന്ദ്രീകരിക്കുന്നതെന്നും ജനങ്ങളെക്കാൾ വലിയൊരു ജനറലും ഈ ലോകത്തില്ലെന്നും അദ്ദേഹം കൂട്ടിച്ചേർത്തു.
പ്രതിസന്ധി പരിഹരിക്കാൻ പാക് ഭരണകൂടം നടത്തിയ രഹസ്യ നയതന്ത്ര ചർച്ചകൾ പൂർണ്ണമായി പരാജയപ്പെട്ടതോടെ മേഖലയിലെ സ്ഥിതി കൂടുതൽ വഷളായിരിക്കുകയാണ്. സമരക്കാരുമായി ചർച്ച നടത്താൻ ബിലാവൽ ഭൂട്ടോ നിയോഗിച്ച മുൻ പാക് പ്രധാനമന്ത്രി രാജാ പർവേസ് അഷ്റഫും ജനറൽ ആസിം മുനീറിന്റെ അടുത്ത അനുയായിയും പാകിസ്താൻ ഓവർസീസ് ഫൗണ്ടേഷൻ തലവനുമായ ഖമർ റാസയും ചർച്ചയ്ക്ക് എത്തിയിരുന്നു. താൻ പാക് സൈനിക മേധാവിയുടെ നേരിട്ടുള്ള ദൂതനാണെന്നാണ് ഖമർ റാസ അവകാശപ്പെട്ടിരുന്നത്.
എന്നാൽ 24 മണിക്കൂറിനുള്ളിൽ ഖമർ റാസയെ ജനറൽ മുനീർ അയച്ചതല്ലെന്ന് പാകിസ്താൻ ഓവർസീസ് ഫൗണ്ടേഷൻ പ്രസ്താവനയിലൂടെ നിഷേധിക്കുകയും മേഖലയിലെ അക്രമങ്ങൾക്ക് കാരണം പ്രക്ഷോഭകരാണെന്ന് റാസ കുറ്റപ്പെടുത്തുകയും ചെയ്തു. ഈ വഞ്ചനയോടെ പാക് ഭരണകൂടവുമായുള്ള എല്ലാ ചർച്ചാ വഴികളും അടഞ്ഞിരിക്കുകയാണ്. ഇപ്പോൾ ജൂലൈ 21 ലെ സമയപരിധി വരെ പ്രക്ഷോഭകർ കാത്തിരിക്കുമോ അതോ മുസഫറാബാദിലേക്ക് ഉടനടി ശക്തമായ മാർച്ചിലേക്ക് കടക്കുമോ എന്നാണ് രാജ്യാന്തരം ഉറ്റുനോക്കുന്നത്.
