ന്യൂഡൽഹി : ജൂലൈ 20 മുതൽ ആരംഭിക്കാനിരിക്കുന്ന പാർലമെന്റിന്റെ സുപ്രധാനമായ മൺസൂൺ സമ്മേളനത്തിൽ അവതരിപ്പിക്കുന്നതിനായി ഏഴ് പ്രമുഖ ബില്ലുകളുടെ പട്ടിക കേന്ദ്ര സർക്കാർ തയ്യാറാക്കി. വിദേശ നിക്ഷേപകർക്കുള്ള ആദായനികുതി ഇളവുകൾ വ്യവസ്ഥ ചെയ്യുന്ന ബില്ലും ചെറുകിട-ഇടത്തരം വ്യവസായ (MSME) മേഖലയിലെ നിർണ്ണായക മാറ്റങ്ങൾ ലക്ഷ്യമിട്ടുള്ള ബില്ലും ഉൾപ്പെടെ അതീവ പ്രാധാന്യമുള്ള നിയമനിർമ്മാണങ്ങളാണ് ഈ സമ്മേളനത്തിന്റെ മുഖ്യ അജണ്ടയിലുള്ളത്. ഇതിനുപുറമെ രാജ്യത്തെ പരമോന്നത കോടതിയിലെ ജഡ്ജിമാരുടെ എണ്ണം വർദ്ധിപ്പിക്കൽ, ജനന-മരണ രജിസ്ട്രേഷൻ കൂടുതൽ കർശനമാക്കൽ, ദേശീയ ചിഹ്നങ്ങളെയും വന്ദേമാതരത്തെയും അപമാനിക്കുന്നത് തടയൽ തുടങ്ങിയ അഞ്ച് പുതിയ ബില്ലുകളും ഈ സമ്മേളനത്തിൽ പാർലമെന്റിന്റെ പരിഗണനയ്ക്ക് വരും. ശക്തമായ പ്രതിപക്ഷ നീക്കങ്ങളെ നേരിട്ട് ഈ നിർണ്ണായക ബില്ലുകൾ പാസാക്കിയെടുക്കാനുള്ള ഒരുക്കത്തിലാണ് കേന്ദ്ര സർക്കാർ.
ഈ സമ്മേളനത്തിൽ അവതരിപ്പിക്കുന്നതിൽ ഏറ്റവും പ്രധാനപ്പെട്ടത് ‘ഇൻകം ടാക്സ് (അമെൻഡ്മെന്റ്) ബിൽ 2026’ ആണ്. കഴിഞ്ഞ ജൂൺ അഞ്ചിന് രാഷ്ട്രപതി പുറപ്പെടുവിച്ച ഓർഡിനൻസിന് പകരമായാണ് ഈ പുതിയ ഭേദഗതി ബിൽ സഭയിൽ വരുന്നത്. ഗവൺമെന്റ് സെക്യൂരിറ്റികളിൽ നിക്ഷേപം നടത്തുന്ന വിദേശ പോർട്ട്ഫോളിയോ നിക്ഷേപകർക്കും (FPI) ബാങ്ക് ഫോർ ഇന്റർനാഷണൽ സെറ്റിൽമെന്റ്സിനും (BIS) പലിശ വരുമാനത്തിൽ നിന്നും മൂലധന നേട്ട നികുതിയിൽ (Capital Gains Tax) നിന്നും ഇളവ് നൽകുന്നതാണ് ഈ നിയമം. ആഗോളതലത്തിൽ നിലനിൽക്കുന്ന സാമ്പത്തിക അസ്ഥിരതയ്ക്കിടയിലും ഇന്ത്യയിലേക്ക് വിദേശ നിക്ഷേപം ആകർഷിക്കാനും വിപണിയിലെ പണലഭ്യത വർദ്ധിപ്പിക്കാനും ഈ നികുതി ഇളവ് സഹായിക്കുമെന്നാണ് സർക്കാർ വ്യക്തമാക്കുന്നത്.
ചെറുകിട-ഇടത്തരം വ്യവസായങ്ങൾക്ക് വലിയ ആശ്വാസം പകരുന്ന ‘എം.എസ്.എം.ഇ വികസന (ഭേദഗതി) ബിൽ 2026’ ആണ് മറ്റൊരു പ്രധാന ആകർഷണം. കഴിഞ്ഞ ബുധനാഴ്ച ചേർന്ന കേന്ദ്ര മന്ത്രിസഭ അംഗീകരിച്ച ഈ ബിൽ, ചെറുകിട സംരംഭകർ നേരിടുന്ന ഏറ്റവും വലിയ വെല്ലുവിളിയായ പണം ലഭിക്കാനുള്ള കാലതാമസം പരിഹരിക്കാൻ ശക്തമായ വ്യവസ്ഥകൾ മുന്നോട്ട് വെയ്ക്കുന്നു. തർക്കങ്ങൾ വേഗത്തിൽ പരിഹരിക്കാൻ ഓൺലൈൻ സംവിധാനവും ഉദ്യം (Udyam) രജിസ്ട്രേഷൻ പോർട്ടലിന് നിയമപരമായ പിന്തുണയും നൽകാൻ ഇതിലൂടെ സാധിക്കും. അതോടൊപ്പം തന്നെ, സംസ്ഥാനങ്ങൾക്ക് ഫെസിലിറ്റേഷൻ കൗൺസിലുകൾ രൂപീകരിക്കുന്നതിൽ കൂടുതൽ സ്വയംഭരണാധികാരം നൽകാനും ഈ ഭേദഗതി ലക്ഷ്യമിടുന്നുണ്ട്.
ഇവയ്ക്ക് പുറമെ, സുപ്രീം കോടതിയിലെ കെട്ടിക്കിടക്കുന്ന കേസുകൾ വേഗത്തിൽ തീർപ്പാക്കുന്നതിനായി ചീഫ് ജസ്റ്റിസ് ഒഴികെയുള്ള ജഡ്ജിമാരുടെ എണ്ണം 33-ൽ നിന്നും 37 ആയി ഉയർത്താനുള്ള ‘സുപ്രീം കോടതി (നമ്പർ ഓഫ് ജഡ്ജസ്) ഭേദഗതി ബിൽ 2026’ സഭയുടെ മുൻപിലെത്തും. ജനന-മരണ രജിസ്ട്രേഷനിൽ കാലതാമസം വരുത്തുന്നവർക്കെതിരെ കടുത്ത ചട്ടങ്ങൾ വ്യവസ്ഥ ചെയ്യുന്ന ബില്ലും, ദേശീയ ഗാനത്തിന് പുറമെ വന്ദേമാതരം ആലപിക്കുമ്പോൾ മനഃപൂർവ്വം തടസ്സം സൃഷ്ടിക്കുകയോ അപമാനിക്കുകയോ ചെയ്യുന്നവർക്ക് കർശന ശിക്ഷ ഉറപ്പാക്കുന്ന ‘ദേശീയ ബഹുമതികളെ അപമാനിക്കുന്നത് തടയൽ ഭേദഗതി ബിൽ 2026’ ഉം ഈ സമ്മേളനത്തിൽ അവതരിപ്പിക്കും. കഴിഞ്ഞ സമ്മേളനങ്ങളിൽ ഏറെ രാഷ്ട്രീയ കോളിളക്കം സൃഷ്ടിച്ച വിദേശ ഫണ്ടിംഗ് നിയന്ത്രണ ഭേദഗതി ബില്ലും (FCRA), ഉന്നത വിദ്യാഭ്യാസ മേഖലയിലെ പരിഷ്കരണങ്ങൾക്കായുള്ള ‘വികസിത് ഭാരത് ശിക്ഷാ അധിഷ്ഠാൻ ബിൽ 2025’ ഉം ഈ സമ്മേളനത്തിൽ തന്നെ പാസാക്കിയെടുക്കാൻ സർക്കാർ ശ്രമിക്കും. എന്നാൽ ഏറെ ചർച്ച ചെയ്യപ്പെട്ട മണ്ഡല പുനർനിർണ്ണയവുമായി (Delimitation) ബന്ധപ്പെട്ട ഭരണഘടനാ ഭേദഗതി ബില്ലുകൾ ഇത്തവണത്തെ അജണ്ടയിൽ ഇടംപിടിച്ചിട്ടില്ല.
