ഭാരതീയ സേനയുടെ സുരക്ഷാ സജ്ജീകരണങ്ങൾ അതിവേഗത്തിലാക്കാൻ വിപ്ലവകരമായ സാങ്കേതികവിദ്യയുമായി സെൻട്രൽ പബ്ലിക് വർക്സ് ഡിപ്പാർട്ട്മെന്റ് (CPWD). ജമ്മുവിലെ കഠിനമായ അതിർത്തി മേഖലയിൽ സായുധ സേനയ്ക്കായി അത്യാധുനിക 3ഡി പ്രിന്റിംഗ് സാങ്കേതികവിദ്യ (3D Printing Technology) ഉപയോഗിച്ച് വാച്ച്ടവർ നിർമ്മിച്ച് സിപിഡബ്ല്യുഡി ചരിത്രം സൃഷ്ടിച്ചു. സാധാരണ നിർമ്മാണ രീതികളിൽ ഒരു വർഷത്തിലധികം സമയം വേണ്ടിവരുന്ന കെട്ടിട നിർമ്മാണം വെറും 45 ദിവസം കൊണ്ടാണ് പൂർത്തിയാക്കിയത്. അതിർത്തി പ്രദേശങ്ങളിലെ പ്രതിരോധ അടിസ്ഥാന സൗകര്യ വികസനത്തിൽ വലിയൊരു കുതിച്ചുചാട്ടത്തിനാണ് ഈ വിജയം വഴിയൊരുക്കിയിരിക്കുന്നത്.
പരമ്പരാഗതമായി ഓരോ ഇഷ്ടികയും സിമന്റും ഉപയോഗിച്ച് പണിയുന്ന രീതിക്ക് പകരം കമ്പ്യൂട്ടർ നിയന്ത്രിത വൻകിട യന്ത്രങ്ങൾ പ്രത്യേകതരം കോൺക്രീറ്റ് മിശ്രിതം ഉപയോഗിച്ച് നിമിഷനേരം കൊണ്ട് നിർമ്മിതി പൂർത്തിയാക്കുന്നതാണ് 3ഡി പ്രിന്റിംഗ് രീതി. ഇത് നിർമ്മാണ വേഗത ഇരട്ടിയാക്കുന്നതോടൊപ്പം കൃത്യത ഉറപ്പാക്കാനും സാമഗ്രികളുടെ അപചയം തടയാനും സഹായിക്കുന്നു. ജമ്മുവിൽ നിർമ്മിച്ച ഈ ഗ്രൗണ്ട് പ്ലസ് വൺ (രണ്ടു നില) വാച്ച്ടവറിൽ ജലവിതരണം, ശുചിമുറി സൗകര്യങ്ങൾ, വൈദ്യുതീകരണം തുടങ്ങിയ എല്ലാ അടിസ്ഥാന സൗകര്യങ്ങളും ഡിസൈൻ ഘട്ടം മുതൽ പൂർണ്ണ സജ്ജമാക്കി കൈമാറുകയായിരുന്നു.
അതിരൂക്ഷമായ ഭൂപ്രകൃതിയും സുരക്ഷാ നിയന്ത്രണങ്ങളും നിർമ്മാണ സാമഗ്രികൾ എത്തിക്കാനുള്ള ബുദ്ധിമുട്ടുകളും മറികടന്നാണ് സിപിഡബ്ല്യുഡി ഈ പദ്ധതി നിശ്ചിത സമയത്തിനകം പൂർത്തിയാക്കിയത്. ഉയർന്ന സുരക്ഷാ പ്രാധാന്യമുള്ളതും എത്തിച്ചേരാൻ പ്രയാസമുള്ളതുമായ അതിർത്തി മേഖലകളിൽ തടസ്സമില്ലാതെ വേഗത്തിൽ നിർമ്മാണം നടത്താൻ 3ഡി കോൺക്രീറ്റ് പ്രിന്റിംഗ് ഏറ്റവും അനുയോജ്യമാണെന്ന് ഇതോടെ തെളിഞ്ഞിരിക്കുകയാണ്. ശത്രുരാജ്യങ്ങളുടെ ഭീഷണികൾക്കിടയിൽ സൈന്യത്തിന്റെ പ്രതിരോധ ശേഷി ഇരട്ടിയാക്കാനും ഭാവിയിലെ സൈനിക ആവശ്യങ്ങൾക്കായി സമാന രീതിയിൽ അതിവേഗ നിർമ്മാണങ്ങൾ നടത്താനും ഈ നേട്ടം വഴികാട്ടിയാകും.
