ബെംഗളൂരുവിലേക്ക് 25 ബംഗ്ലാദേശികളെ അയച്ചിട്ടുണ്ടെന്നും ധൈര്യമുണ്ടെങ്കിൽ കർണാടക പോലീസ് അവരെ പിടികൂടി കാണിക്കണമെന്നും പരസ്യമായി വെല്ലുവിളിച്ച് സോഷ്യൽ മീഡിയയിൽ വീഡിയോ പോസ്റ്റ് ചെയ്ത പ്രവാസി യുവാവ് കടുത്ത നിയമക്കുരുക്കിൽ. പോലീസുകാരുടെയും രാഷ്ട്രീയക്കാരുടെയും വീടുകളിൽ കയറി ആക്രമണം നടത്താനാണ് ഇവരെ അയച്ചതെന്നടക്കം ഗുരുതര ഭീഷണിയുയർത്തിയ മാണ്ഡ്യ കൃഷ്ണരാജപേട്ട കിക്ക്രി സ്വദേശി സന്തോഷ് കുമാറിനെതിരെയാണ് ബെംഗളൂരു സെൻട്രൽ ക്രൈംബ്രാഞ്ച് (CCB) കേസെടുത്തത്. നിലവിൽ ദുബായിൽ ഹോട്ടൽ തൊഴിലാളിയായി ജോലി ചെയ്യുകയാണ് ഇയാൾ.
കഴിഞ്ഞ വ്യാഴാഴ്ച രാവിലെയോടെ ഇയാളുടെ ‘santhuuu_kr_pete’ എന്ന ഇൻസ്റ്റാഗ്രാം അക്കൗണ്ടിലാണ് പോലീസിനെയും ജനപ്രതിനിധികളെയും വധിക്കുമെന്ന് ഭീഷണിപ്പെടുത്തുന്ന അപകീർത്തികരമായ വീഡിയോ പ്രത്യക്ഷപ്പെട്ടത്. “കർണാടക പോലീസിന് ആണുങ്ങളുടെ ധൈര്യമുണ്ടെങ്കിൽ അവരെ കണ്ടുപിടിക്ക്. ബെംഗളൂരുവിലേക്ക് ഞാൻ 25 ബംഗ്ലാദേശികളെ അയച്ചിട്ടുണ്ട്. ഇതുവരെ നിങ്ങൾക്ക് അവരെ പിടികൂടാൻ കഴിഞ്ഞിട്ടില്ല. പോലീസുകാരെയും രാഷ്ട്രീയക്കാരെയുമാണ് ഞാൻ ലക്ഷ്യമിട്ടിരിക്കുന്നത്. അവർ നിങ്ങളുടെ വീടുകളിൽ കയറി ഭാര്യമാരെയും കുട്ടികളെയും അപായപ്പെടുത്തും. അവർക്ക് തിരിച്ചറിയൽ രേഖകളോ മേൽവിലാസമോ ഇല്ല. അവരെ പിടികൂടിയാൽ എന്റെ മേൽവിലാസം തരാം, നിങ്ങൾക്ക് ഇഷ്ടമുള്ളത് ചെയ്യാം” എന്നായിരുന്നു വീഡിയോയിലെ വിദ്വേഷ പരാമർശം.
വീഡിയോ നിമിഷങ്ങൾക്കകം വൈറലാവുകയും വൻ സുരക്ഷാ ആശങ്കയ്ക്ക് വഴിവെക്കുകയും ചെയ്തതോടെ ക്രൈംബ്രാഞ്ചിന്റെ സൈബർ ക്രൈം വിഭാഗം ഉടൻ രംഗത്തിറങ്ങി ഇയാളെ തിരിച്ചറിയുകയായിരുന്നു. സംഭവം വൻ കേസ് ആയി മാറിയതോടെ വിദേശത്തുള്ള സന്തോഷ് കുമാറുമായി പോലീസ് ബന്ധപ്പെടുകയും തുടർന്ന് ഇയാൾ മുൻ വീഡിയോ ഡിലീറ്റ് ചെയ്ത് മാപ്പുപറഞ്ഞ് പുതിയ വീഡിയോ പോസ്റ്റ് ചെയ്യുകയും ചെയ്തു. ബെംഗളൂരുവിലേക്ക് നിരവധി ബംഗ്ലാദേശികൾ അനധികൃതമായി എത്തുമ്പോഴും അധികൃതർ നടപടിയെടുക്കാത്തതിലുള്ള ദേഷ്യം കൊണ്ടാണ് താൻ അത്തരം രീതിയിൽ സംസാരിച്ചതെന്നും പോലീസിനോട് ക്ഷമ ചോദിക്കുന്നുവെന്നും ഇയാൾ രണ്ടാമത്തെ വീഡിയോയിൽ വ്യക്തമാക്കി.
എന്നാൽ, വ്യാജ പ്രചാരണങ്ങൾ നടത്തി സമൂഹത്തിൽ ഭീതിയും ക്രമസമാധാന പ്രശ്നങ്ങളും സൃഷ്ടിക്കാൻ ശ്രമിച്ച പ്രതിക്കെതിരെ ശക്തമായ നടപടി സ്വീകരിക്കുമെന്ന് ബെംഗളൂരു സിറ്റി പോലീസ് കമ്മീഷണർ സീമന്ത് കുമാർ സിംഗ് വ്യക്തമാക്കി. ഇയാളെ ദുബായിൽ നിന്ന് ഇന്ത്യയിലേക്ക് നാടുകടത്തി (Deportation) അറസ്റ്റ് ചെയ്യാനുള്ള നടപടികൾ വേഗത്തിലാക്കിയിട്ടുണ്ട്. കൂടാതെ, വധഭീഷണിയും വിദ്വേഷ സന്ദേശങ്ങളും പ്രചരിപ്പിച്ചതിന് സന്തോഷ് കുമാറിനും കുടുംബത്തിനുമെതിരെ പ്രാദേശിക പോലീസും പ്രത്യേക കേസെടുത്ത് അന്വേഷണം ആരംഭിച്ചു.
