ഡൽഹിയിൽ സ്ത്രീകൾക്കും ട്രാൻസ്‌ജെൻഡർ വിഭാഗക്കാർക്കും തൊഴിലവസരങ്ങൾ നൽകുന്നതിനും നഗരത്തിലെ യാത്രാസുരക്ഷ വർദ്ധിപ്പിക്കുന്നതിനുമായി ‘ദുർഗ്ഗ ഇ.വി ഓട്ടോ’ (DURGA EV Auto) പദ്ധതിക്ക് ഡൽഹി മന്ത്രിസഭ അംഗീകാരം നൽകി. മുഖ്യമന്ത്രി രേഖാ ഗുപ്തയുടെ അധ്യക്ഷതയിൽ ചേർന്ന കാബിനറ്റ് യോഗത്തിലാണ് ഈ നിർണായക തീരുമാനം കൈക്കൊണ്ടത്. പദ്ധതിയുടെ ആദ്യ ഘട്ടത്തിൽ 1,300 പിങ്ക് ഇലക്ട്രിക് ഓട്ടോറിക്ഷകളുടെ പെർമിറ്റുകളാണ് അനുവദിക്കുന്നത്. ഇതിൽ 1,170 എണ്ണം സ്ത്രീകൾക്കും 130 എണ്ണം ട്രാൻസ്‌ജെൻഡർ വ്യക്തികൾക്കുമായി പ്രത്യേകം സംവരണം ചെയ്തിട്ടുണ്ട്. ഡൽഹിയിലെ ഓരോ റവന്യൂ ജില്ലയിലും 90 വീതം ഓട്ടോകൾ സ്ത്രീകൾക്കും 10 വീതം ട്രാൻസ്‌ജെൻഡർമാർക്കും നൽകാനാണ് സർക്കാർ ലക്ഷ്യമിടുന്നത്.
ഈ പദ്ധതിയിലൂടെ തെരഞ്ഞെടുക്കപ്പെടുന്ന ഗുണഭോക്താക്കൾക്ക് വാഹനത്തിന്റെ ഉടമസ്ഥാവകാശവും ഓടിക്കാനുള്ള അനുമതിയും ഒരുമിച്ച് ലഭിക്കും. ഇ-ഓട്ടോ വാങ്ങുന്നതിനായി ഡൽഹി ഇ.വി നയം വഴി ആദ്യ വർഷം 50,000 രൂപ ധനസഹായവും റോഡ് ടാക്സ്, രജിസ്ട്രേഷൻ ഫീസ് എന്നിവയിൽ 100 ശതമാനം ഇളവും സർക്കാർ വാഗ്ദാനം ചെയ്യുന്നു. അപേക്ഷകർക്കായി പ്രത്യേക ഓൺലൈൻ പോർട്ടൽ ഉടൻ നിലവിൽ വരും. 20 നും 40 നും ഇടയിൽ പ്രായമുള്ള, കുടുംബ വാർഷിക വരുമാനം അഞ്ച് ലക്ഷം രൂപയിൽ താഴെയുള്ളവർക്കാണ് അപേക്ഷിക്കാൻ യോഗ്യത. അപേക്ഷകരുടെ എണ്ണം പെർമിറ്റുകളേക്കാൾ കൂടുതലായാൽ നറുക്കെടുപ്പ് വഴിയായിരിക്കും ഗുണഭോക്താക്കളെ തെരഞ്ഞെടുക്കുക.
ഡ്രൈവർമാരുടെ സുരക്ഷയ്ക്കും തിരിച്ചറിയലിനുമായി പ്രത്യേക ‘ദുർഗ്ഗ’ ജാക്കറ്റുകളും തൊപ്പികളും തിരിച്ചറിയൽ കാർഡുകളും നൽകാൻ ഭരണകൂടം തീരുമാനിച്ചിട്ടുണ്ട്. കൂടാതെ ഈ ഓട്ടോകളിൽ സ്ത്രീകളുടെ ഹെൽപ്പ് ലൈൻ നമ്പറുകളും എമർജൻസി കോൺടാക്റ്റുകളും വ്യക്തമായി പ്രദർശിപ്പിക്കും. മെട്രോ സ്റ്റേഷനുകൾ, ആർ.ആർ.ടി.എസ് സ്റ്റേഷനുകൾ തുടങ്ങിയ തിരക്കേറിയ സ്ഥലങ്ങൾ കേന്ദ്രീകരിച്ചായിരിക്കും ഇവയുടെ പ്രധാന സർവീസ്. യാത്രക്കാരെ വേഗത്തിൽ ലഭിക്കുന്നതിനായി ഇവരെ ഓൺലൈൻ ടാക്സി ആപ്പുകളുമായി ബന്ധിപ്പിക്കാനും ചാർജിംഗ്, പാർക്കിംഗ് സൗകര്യങ്ങൾ വർദ്ധിപ്പിക്കാനും ഡൽഹി സർക്കാർ നടപടികൾ സ്വീകരിക്കുന്നുണ്ട്.
