ഫുക്കറ്റിൽ നിന്ന് ഡൽഹിയിലേക്ക് പറന്ന എയർ ഇന്ത്യ വിമാനത്തിലെ മുഖ്യ പൈലറ്റ് ലഹരിവസ്തു ഉപയോഗിച്ചതായി കണ്ടെത്തൽ. എയർക്രാഫ്റ്റ് ആക്സിഡന്റ് ഇൻവെസ്റ്റിഗേഷൻ ബ്യൂറോ (AAIB) പുറത്തുവിട്ട പ്രാഥമിക അന്വേഷണ റിപ്പോർട്ടിലാണ് ഈ നിർണായക വിവരമുള്ളത്. സംഭവത്തിൽ പൈലറ്റിനെതിരെ അടിയന്തര നടപടിയെടുക്കാൻ വ്യോമയാന നിയന്ത്രണ ഏജൻസിയായ ഡിജിസിഎയോട് അന്വേഷണ സംഘം നിർദ്ദേശിച്ചു. കഴിഞ്ഞ ഓഗസ്റ്റ് നാലിന് 145 യാത്രക്കാരുമായി പറന്ന എയർ ഇന്ത്യ വിമാനം ഒഡീഷയ്ക്ക് മുകളിൽ വെച്ച് പെട്ടെന്ന് 300 അടിയോളം താഴേക്ക് പതിക്കുകയായിരുന്നു. ശക്തമായ കാറ്റും ഹൈഡ്രോളിക് തകരാറുമാണ് അപകടത്തിന് കാരണമായതെന്നാണ് ആദ്യം കരുതപ്പെട്ടിരുന്നത്. ഈ അപകടത്തിൽ 20 യാത്രക്കാർക്കും 4 ജീവനക്കാർക്കും പരിക്കേറ്റിരുന്നു.
ഡൽഹിയിൽ വിമാനം ഇറങ്ങിയതിന് ശേഷം നടത്തിയ വൈദ്യപരിശോധനയിലാണ് പൈലറ്റ് ലഹരി ഉപയോഗിച്ചതായി വ്യക്തമായത്. രക്തപരിശോധനയിൽ പൈലറ്റിന്റെ ശരീരത്തിൽ ലഹരി പദാർത്ഥത്തിന്റെ സാന്നിധ്യം കണ്ടെത്തിയെന്നാണ് റിപ്പോർട്ടുകൾ സൂചിപ്പിക്കുന്നത്. എന്നാൽ സഹപൈലറ്റിന്റെ പരിശോധനാ ഫലം നെഗറ്റീവായിരുന്നു. ഇന്റർനാഷണൽ സിവിൽ ഏവിയേഷൻ ഓർഗനൈസേഷന്റെ (ഐസിഎഒ) മാർഗ്ഗനിർദ്ദേശങ്ങൾക്കനുസൃതമായി പ്രസിദ്ധീകരിച്ച പ്രാഥമിക റിപ്പോർട്ടിൽ, സൈക്കോ ആക്റ്റീവ് പദാർത്ഥത്തിന്റെ ദുരുപയോഗം തടയുന്നതിന് ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (ഡിജിസിഎ) ശുപാർശ ചെയ്ത പ്രകാരം പൈലറ്റിനെതിരെ നടപടിയെടുക്കാൻ നിർദ്ദേശിച്ചു. അന്വേഷണം ഇപ്പോഴും പുരോഗമിക്കുകയാണെന്നും അന്തിമ റിപ്പോർട്ട് യഥാസമയം പ്രസിദ്ധീകരിക്കുമെന്നും ഡിജിസിഎ അറിയിച്ചു.
വിമാനത്തിന്റെ സാങ്കേതിക തകരാറുകളെക്കുറിച്ചും അപകട സമയത്തെ സാഹചര്യങ്ങളെക്കുറിച്ചും കൂടുതൽ അന്വേഷണം നടന്നുവരികയാണ്. അതേസമയം യാത്രക്കാരുടെ സുരക്ഷയ്ക്കാണ് പ്രഥമ പരിഗണനയെന്നും അന്വേഷണത്തോട് പൂർണ്ണമായി സഹകരിക്കുമെന്നും എയർ ഇന്ത്യ വ്യക്തമാക്കി. മുൻകരുതലിന്റെ ഭാഗമായി തങ്ങളുടെ മുഴുവൻ പൈലറ്റുമാരെയും ലഹരി പരിശോധനയ്ക്ക് വിധേയരാക്കാൻ എയർ ഇന്ത്യ തീരുമാനിച്ചിട്ടുണ്ട്.
