ന്യൂഡൽഹി: രാവിലത്തെ 20 രൂപയുടെ ചായ കുടി മുതൽ വൈകുന്നേരത്തെ വലിയ സാമ്പത്തിക ഇടപാടുകൾക്ക് വരെ ഇന്ന് നമ്മൾ ഏറ്റവും കൂടുതൽ ആശ്രയിക്കുന്നത് യുപിഐ (UPI) പേയ്‌മെന്റുകളെയാണ്. സാധാരണക്കാരുടെ ദൈനംദിന ജീവിതത്തിന്റെ ഭാഗമായി മാറിയ യുപിഐ ഇടപാടുകളിൽ 2,000 രൂപയ്ക്ക് മുകളിലുള്ള തുകകൾക്ക് നിർദ്ദിഷ്ട മാറ്റങ്ങൾ വരുന്നു എന്ന തരത്തിലുള്ള വാർത്തകൾ വ്യാപകമായി പ്രചരിക്കുന്നുണ്ട്. എന്നാൽ, 2,000 രൂപയ്ക്ക മുകളിലുള്ള യുപിഐ ഇടപാടുകൾക്ക് സാധാരണക്കാരായ ഉപഭോക്താക്കളിൽ നിന്ന് തുക ഈടാക്കില്ലെന്നും സാധാരണ പണം അയക്കൽ (P2P) പൂർണ്ണമായും സൗജന്യമായി തന്നെ തുടരുമെന്നും കേന്ദ്ര ധനമന്ത്രാലയം വ്യക്തത വരുത്തിയിട്ടുണ്ട്.
ഡിജിറ്റൽ പേയ്‌മെന്റ് സംവിധാനങ്ങളുടെ സുരക്ഷ ഉറപ്പാക്കുന്നതിനും അടിസ്ഥാന സൗകര്യങ്ങൾ മെച്ചപ്പെടുത്തുന്നതിനുമായി നിശ്ചിത മർച്ചന്റ് (വ്യാപാരി) ഇടപാടുകൾക്ക് സർവീസ് ചാർജ് അഥവാ എം.ഡി.ആർ (Merchant Discount Rate) ചുമത്തുന്നതിനുള്ള നിയമപരമായ അനുമതിയാണ് സഭയിൽ പാസാക്കിയ പുതിയ ഭേദഗതിയിലൂടെ വന്നിട്ടുള്ളത്. 2,000 രൂപ വരെയുള്ള എല്ലാത്തരം യുപിഐ ഇടപാടുകൾക്കും റൂപേ ഡെബിറ്റ് കാർഡ് വഴിയുള്ള ട്രാൻസാക്ഷനുകൾക്കും ഒരുവിധത്തിലുള്ള ചാർജുകളും ഈടാക്കാൻ പാടില്ലെന്ന് ബാങ്കുകൾക്കും പേയ്‌മെന്റ് സേവന ദാതാക്കൾക്കും കേന്ദ്ര സർക്കാർ കർശന നിർദ്ദേശം നൽകിയിട്ടുണ്ട്. വലിയ ബിസിനസ്സ് സ്ഥാപനങ്ങൾ വഴിയുള്ള കച്ചവട ഇടപാടുകളിൽ ഭാവിയിൽ നാമമാത്രമായ എം.ഡി.ആർ ഈടാക്കാൻ സാധിച്ചേക്കാമെങ്കിലും, അത് ഉപഭോക്താക്കളുടെ അക്കൗണ്ടിൽ നിന്ന് നേരിട്ട് പിടിത്തമിടില്ലെന്ന് അധികൃതർ വ്യക്തമാക്കിയിട്ടുണ്ട്. അതിനാൽ കടകളിലോ ഓൺലൈനായോ നടത്തുന്ന ദൈനംദിന യുപിഐ പേയ്‌മെന്റുകളെക്കുറിച്ച് സാധാരണ ഉപഭോക്താക്കൾ ആശങ്കപ്പെടേണ്ടതില്ല.
