ഇന്ത്യയുമായുള്ള സ്വതന്ത്ര വ്യാപാര കരാർ നടപ്പിലാക്കുന്നതിനുള്ള ബില്ലിന് ന്യൂസിലാൻഡ് പാർലമെന്റ് അംഗീകാരം നൽകി. റോയിട്ടേഴ്സ് വാർത്താ ഏജൻസി റിപ്പോർട്ട് ചെയ്തതനുസരിച്ച്, 93നെതിരെ 29 വോട്ടുകൾക്കാണ് ബില്ല് പാസ്സായത്. പ്രതിപക്ഷമായ ലേബർ പാർട്ടിയും ഈ നിയമനിർമ്മാണത്തെ പിന്തുണച്ചിട്ടുണ്ട്. ഇന്ത്യയിലേക്കുള്ള ന്യൂസിലൻഡിന്റെ കയറ്റുമതിയുടെ 95 ശതമാനത്തോളം വരുന്ന ഉൽപ്പന്നങ്ങളുടെ തീരുവ പൂർണ്ണമായോ ഗണ്യമായോ ഒഴിവാക്കുന്നതിന് ഈ കരാർ വഴിയൊരുക്കും.
കരാർ ഒക്ടോബർ 19 മുതൽ നിലവിൽ വരുമെന്നാണ് പ്രതീക്ഷിക്കുന്നത്. വ്യാപാരവും നിക്ഷേപവും വർദ്ധിപ്പിക്കുന്നതിന്റെ ഭാഗമായി ഇരുരാജ്യങ്ങളും കഴിഞ്ഞ ഏപ്രിൽ 27നാണ് ഈ കരാറിൽ ഒപ്പുവെച്ചത്. ഇന്ത്യ-ന്യൂസിലാൻഡ് വ്യാപാര കരാർ പ്രാബല്യത്തിൽ വരുന്ന ദിവസത്തിൽ തന്നെ ഇതിൽ ഉൾപ്പെടുന്ന ഉൽപ്പന്നങ്ങളിൽ പകുതിയിലധികവും നികുതി രഹിതമായി മാറുമെന്നാണ് റിപ്പോർട്ടുകൾ വ്യക്തമാക്കുന്നത്. കയറ്റുമതിക്കാർക്ക് ലഭിക്കുന്ന ആനുകൂല്യങ്ങൾ വളരെ വലുതായിരിക്കുമെന്ന് ന്യൂസിലാൻഡ് വ്യാപാര മന്ത്രി ടോഡ് മക്ലേ വ്യക്തമാക്കി. ഈ വർഷം തന്നെ കരാർ പ്രാബല്യത്തിൽ വരുമെന്നാണ് സർക്കാർ പ്രതീക്ഷിക്കുന്നത്.
ഇന്ത്യൻ കയറ്റുമതികൾക്കെല്ലാം ന്യൂസിലാൻഡിൽ തീരുവ രഹിത പ്രവേശനം ഈ കരാർ ഉറപ്പ് നൽകുന്നുണ്ട്. അതേസമയം, അടുത്ത 15 വർഷത്തിനുള്ളിൽ ഇന്ത്യയിൽ 20 ബില്യൺ ഡോളർ നിക്ഷേപം നടത്താനാണ് വെല്ലിംഗ്ടൺ വാഗ്ദാനം ചെയ്തിട്ടുള്ളത്. 2026 ജൂണിൽ അവസാനിച്ച വർഷം ഇരുരാജ്യങ്ങളും തമ്മിലുള്ള ഉഭയകക്ഷി വ്യാപാരം 3.99 ബില്യൺ ഡോളർ ($2.29 ബില്യൺ) ആയിരുന്നു. ഉൽപ്പന്നങ്ങളുടെയും സേവനങ്ങളുടെയും കയറ്റുമതിയിൽ ഇന്ത്യ ഇപ്പോൾ ന്യൂസിലൻഡിന്റെ ഒമ്പാമത്തെ വലിയ വിപണിയായി മാറിയിരിക്കുകയാണ്.
ഈ വർഷം ജൂലൈയിൽ ഇന്ത്യൻ പ്രധാനമന്ത്രി നരേന്ദ്ര മോദി ന്യൂസിലാൻഡ് സന്ദർശിക്കുന്നതിന് മുന്നോടിയായി, ഇന്ത്യയുമായുള്ള വ്യാപാര കരാർ തങ്ങളുടെ രാജ്യത്തെ ബിസിനസുകൾക്ക് വലിയ വളർച്ച നൽകുമെന്ന് ന്യൂസിലാൻഡ് പ്രധാനമന്ത്രി ക്രിസ്റ്റഫർ ലക്സൻ വ്യക്തമാക്കിയിരുന്നു. കരാറിന്റെ സാമ്പത്തിക നേട്ടങ്ങൾ എടുത്തുപറഞ്ഞുകൊണ്ട്, ന്യൂസിലൻഡിന്റെ കയറ്റുമതിയുടെ 57 ശതമാനവും ആദ്യ ദിവസം മുതൽ തന്നെ തീരുവ രഹിതമായിരിക്കുമെന്ന് അദ്ദേഹം മുൻപ് വ്യക്തമാക്കിയിരുന്നു.
