കാലാവസ്ഥാ വ്യതിയാനവും ആഗോളതാപനവും കാരണം നമ്മൾ ജീവിക്കുന്ന ഭൂമിയുടെ ആകൃതിയിൽ അതിവേഗം ഞെട്ടിക്കുന്ന മാറ്റങ്ങൾ സംഭവിക്കുന്നതായി ശാസ്ത്രലോകത്തിന്റെ പുതിയ കണ്ടെത്തൽ. ധ്രുവപ്രദേശങ്ങളിൽ അല്പം പരന്നും ഭൂമധ്യരേഖാ പ്രദേശത്ത് വീർത്തുമിരിക്കുന്ന ആകൃതിയിലുള്ള ഭൂമി, ഇപ്പോൾ ഒരേ സമയം കൂടുതൽ ഉരുണ്ടതും അതേസമയം തന്നെ കൂടുതൽ പരന്നതുമായ വിരോധാഭാസകരമായ മാറ്റത്തിന് വിധേയമായിക്കൊണ്ടിരിക്കുകയാണെന്ന് പഠനങ്ങൾ വ്യക്തമാക്കുന്നു. തെസ്സലോനിക്കിയിലെ അരിസ്റ്റോട്ടിൽ സർവകലാശാലയിലെ പ്രമുഖ ജിയോളജിസ്റ്റായ ക്രിസ്റ്റോഫർ കൊട്സാക്കിസ് നടത്തിയ പഠനമാണ് ഭൂമിയുടെ നിലനിൽപ്പിനെക്കുറിച്ചുള്ള ആശങ്കകൾ വർദ്ധിപ്പിക്കുന്നത്. പ്രശസ്ത ശാസ്ത്ര മാസികയായ ‘ജേണൽ ഓഫ് ജിയോഫിസിക്കൽ റിസർച്ച്: സോളിഡ് എർത്ത്’ ആണ് ഈ വിവരങ്ങൾ പുറത്തുവിട്ടത്.
കഴിഞ്ഞ 20 വർഷത്തിനിടെ ഭൂമിയുടെ ധ്രുവപ്രദേശങ്ങൾ ഉയരുന്നതിന്റെ നിരക്ക് ഇരട്ടിയായതാണ് ഈ മാറ്റങ്ങൾക്ക് പ്രധാന കാരണം. ആഗോളതാപനം കാരണം ഗ്രീൻലാൻഡിലെയും അന്റാർട്ടിക്കയിലെയും വൻകര ഹിമപാളികൾ (Ice Sheets) അതിവേഗം ഉരുകിത്തീരുന്നതാണ് ഈ പ്രതിഭാസത്തിന് പിന്നിൽ. ഭൂമിയുടെ ഉപരിതലം കഠിനമാണെന്ന് തോന്നുമെങ്കിലും ഭൗമശാസ്ത്രപരമായി അത് മാറ്റങ്ങൾക്ക് വിധേയമാണ്. വലിയ ഭാരമുള്ള ഹിമപാളികൾ ഉരുകി ഭാരം കുറയുമ്പോൾ, അതിനടിയിലെ ഭൂവൽക്കം (Crust) മുകളിലേക്ക് ഉയർന്നുവരുന്ന ‘പോസ്റ്റ്-ഗ്ലേഷ്യൽ റീബൗണ്ട്’ എന്ന പ്രക്രിയയാണ് ഇവിടെ നടക്കുന്നത്.
ഇത്തരത്തിൽ ഉരുകുന്ന കിലോമീറ്ററുകളോളം കനമുള്ള മഞ്ഞുപാളികളുടെ വെള്ളം മുഴുവൻ സമുദ്രങ്ങളിലേക്ക് ഒഴുകിയെത്തുകയും ഭൂമധ്യരേഖാ പ്രദേശങ്ങളിൽ അടിഞ്ഞുകൂടുകയും ചെയ്യുന്നു. ഇത് ഭൂമിയുടെ മധ്യഭാഗം കൂടുതൽ വീർക്കുന്നതിനും അച്ചുതണ്ടിലെ കറക്കത്തിലും മാറ്റങ്ങൾ വരുത്തുന്നതിനും കാരണമാകുന്നു. കാലാവസ്ഥാ വ്യതിയാനം കേവലം താപനിലയിൽ മാത്രമല്ല, ഭൂമിയുടെ ഭൗതിക രൂപത്തെപ്പോലും പുനർനിർണ്ണയിക്കുന്ന അവസ്ഥയിലേക്കാണ് കാര്യങ്ങൾ നീങ്ങുന്നതെന്ന് ശാസ്ത്രജ്ഞർ മുന്നറിയിപ്പ് നൽകുന്നു.
