ചീഫ് ഇലക്ഷൻ കമ്മീഷണർ (സി.ഇ.സി) ഗ്യാനേഷ് കുമാറിനെതിരെ രാജ്യദ്രോഹക്കുറ്റം ചുമത്തി ക്രിമിനൽ കേസ് എടുത്ത് വിചാരണ ചെയ്യണമെന്ന് കോൺഗ്രസ് എം.പി പ്രിയങ്ക ഗാന്ധി. ജനാധിപത്യ പ്രക്രിയയെയും ഭരണഘടനയെയും അട്ടിമറിക്കാൻ ശ്രമിക്കുന്ന ഏതൊരാളും രാജ്യത്തോട് അനാദരവും രാജ്യദ്രോഹവുമാണ് കാണിക്കുന്നതെന്ന് വയനാട് എം.പി കൂടിയായ പ്രിയങ്ക ഗാന്ധി മാധ്യമങ്ങളോട് പറഞ്ഞു. ഏകദേശം 13 കോടി വോട്ടർമാരുടെ പേരുകൾ വോട്ടർപട്ടികയിൽ നിന്ന് ഒഴിവാക്കിയത് ജനാധിപത്യത്തിന് നേരെയുള്ള കടുത്ത ക്രിമിനൽ കുറ്റമാണെന്ന് അവർ കുറ്റപ്പെടുത്തി.
തിരഞ്ഞെടുപ്പ് കമ്മീഷൻ നടത്തുന്ന ഇത്തരം നിയമവിരുദ്ധമായ പ്രവർത്തനങ്ങൾ തടയാൻ ഉന്നത സ്ഥാനത്തിരിക്കുന്നവർക്ക് നിയമപരമായ സംരക്ഷണം നൽകരുത്. തന്റെ മൂക്കിൻതുമ്പിൽ നടക്കുന്ന അട്ടിമറികളെക്കുറിച്ച് അറിഞ്ഞിട്ടും അത് തടയാതെ നിഷ്ക്രിയത്വം പാലിച്ച സി.ഇ.സി മറ്റ് കുറ്റവാളികളെപ്പോലെ വിചാരണ നേരിടണം. മറ്റ് രണ്ട് തിരഞ്ഞെടുപ്പ് കമ്മീഷണർമാർ തടസ്സവാദങ്ങൾ ഉന്നയിച്ചിട്ടും ഏകപക്ഷീയമായി തീരുമാനം എടുത്തത് അട്ടിമറിക്ക് വേണ്ടിയാണെന്ന് വ്യക്തമാണെന്ന് പ്രിയങ്ക ഗാന്ധി ആരോപിച്ചു.
രാജ്യത്തെ വോട്ടർപട്ടിക പരിഷ്കരണം സംബന്ധിച്ച് വൻ ആരോപണങ്ങളാണ് പ്രതിപക്ഷം ഉയർത്തുന്നത്. വിഷയത്തിൽ നിഷ്പക്ഷവും സുതാര്യവുമായ അന്വേഷണം വേണമെന്ന് പ്രിയങ്കയും രാഹുൽ ഗാന്ധിയും ഉൾപ്പെടെയുള്ള നേതാക്കൾ ആവശ്യപ്പെട്ടിട്ടുണ്ട്. എന്നാൽ വോട്ടർപട്ടിക പുതുക്കലുമായി ബന്ധപ്പെട്ട എല്ലാ തീരുമാനങ്ങളും കമ്മീഷൻ ഒറ്റക്കെട്ടായാണ് കൈക്കൊണ്ടതെന്നാണ് തിരഞ്ഞെടുപ്പ് കമ്മീഷൻ നൽകുന്ന വിശദീകരണം.
