പ്രണയബന്ധങ്ങളും ദാമ്പത്യവും മുന്നോട്ട് കൊണ്ടുപോകാൻ ഇനി ഹൃദയം മാത്രമല്ല, കുറച്ച് ഗണിതശാസ്ത്രവും (Mathematics) അറിഞ്ഞിരിക്കുന്നത് നന്നായിരിക്കുമെന്നാണ് ശാസ്ത്ര ലോകം പറയുന്നത്. 2026-ൽ പ്രണയവും അതിലെ ‘കമ്മിറ്റ്മെന്റും’ ഏറെ സങ്കീർണ്ണമായി മാറിക്കൊണ്ടിരിക്കുന്ന കാലഘട്ടത്തിൽ, എന്തുകൊണ്ടാണ് ചില ബന്ധങ്ങൾ എത്ര വലിയ പ്രതിസന്ധികളിലും ശക്തമായി നിലനിൽക്കുന്നതെന്നും മറ്റുചിലത് പെട്ടെന്ന് തകർന്നുപോകുന്നതെന്നും ഗണിതശാസ്ത്ര സമവാക്യങ്ങളിലൂടെയും ഗ്രാഫുകളിലൂടെയും വിശദീകരിക്കാമെന്ന് ഗവേഷകർ വെളിപ്പെടുത്തുന്നു. ഫ്രാൻസിലെ ലിയോൺ സർവ്വകലാശാലയിലെ പ്രൊഫസർ ലോറന്റ് പൂജോ-മെൻഷുവിന്റെ ‘ലൗ! വാലർ! ഇക്വേഷൻസ്!’ എന്ന പുസ്തകത്തിലാണ് പ്രണയത്തിന്റെ ഗണിതശാസ്ത്രപരമായ വഴികൾ വ്യക്തമാക്കുന്നത്.
ജീവശാസ്ത്രത്തിൽ ഒരു ജീവിവർഗ്ഗത്തിന്റെ എണ്ണം നിർണായക പരിധിക്ക് താഴെയാകുമ്പോൾ ഉണ്ടാകുന്ന മാറ്റങ്ങളെക്കുറിച്ച് പഠിക്കുന്ന ‘ആലീ ഇഫക്ട്’ (Allee Effect) എന്ന തത്വത്തിന് സമാനമായാണ് പ്രണയബന്ധങ്ങളിലെ മാറ്റങ്ങളെയും ശാസ്ത്രജ്ഞർ സമീപിക്കുന്നത്. പരസ്പരമുള്ള ആകർഷണം, കാലക്രമേണ വികാരങ്ങളിലുണ്ടാകുന്ന കുറവ്, പങ്കാളികളുടെ വൈകാരിക പ്രതികരണങ്ങൾ തുടങ്ങിയ നാല് പ്രധാന ഘടകങ്ങളാണ് ഇതിനായി വിശകലനം ചെയ്യുന്നത്. പ്രണയബന്ധത്തിന്റെ കരുത്ത് ഒരു നിശ്ചിത ഗണിതശാസ്ത്ര പരിധിക്ക് (Critical Threshold) താഴേക്ക് പോയാൽ, ആ ബന്ധം തകർച്ചയിലേക്ക് നീങ്ങുമെന്നാണ് ഗണിതശാസ്ത്ര മാതൃകകൾ പറയുന്നത്. പ്രശസ്ത സൈക്കോളജിസ്റ്റായ ഡോ. ജോൺ ഗോട്ട്മാനും ദമ്പതികൾ തമ്മിലുള്ള സംഭാഷണങ്ങളും പെരുമാറ്റങ്ങളും ഗ്രാഫുകളാക്കി മാറ്റി ബന്ധങ്ങളുടെ ഭാവി പ്രവചിക്കാമെന്ന് അടിവരയിടുന്നു. പ്രണയം ആരുമായി ഉണ്ടാകുമെന്ന് പ്രവചിക്കാനല്ല, മറിച്ച് പ്രണയബന്ധങ്ങളുടെ ആയുസ്സും സ്ഥിരതയും മനസ്സിലാക്കാനാണ് ഈ ഗണിതശാസ്ത്ര മാതൃക സഹായിക്കുന്നതെന്ന് ശാസ്ത്രലോകം വ്യക്തമാക്കുന്നു.
