മദ്യപിച്ച് അമിതവേഗതയിൽ വാഹനമോടിച്ച് തുടർച്ചയായി അപകടങ്ങൾ വരുത്തിവെച്ച സംഭവത്തിൽ പ്രമുഖ സിനിമാ റിവ്യൂവറും യൂട്യൂബറുമായ അശ്വന്ത് കോക്കിനെതിരെ പോലീസ് കേസെടുത്തു (FIR). ഇന്നലെ രാത്രി ഏറെ വൈകിയാണ് നടക്കാവ് പോലീസ് കേസ് രജിസ്റ്റർ ചെയ്തത്. അപകടകരമായ രീതിയിൽ വാഹനം ഓടിച്ചതിനും മദ്യപിച്ച് വണ്ടിയോടിച്ചതിനുമാണ് കേസ്. സംഭവസ്ഥലത്തുനിന്ന് കസ്റ്റഡിയിലെടുത്ത അശ്വന്തിനെ പിന്നീട് പോലീസ് ജാമ്യത്തിൽ വിട്ടയച്ചു.
ഇന്നലെ വൈകിട്ട് ഏഴ് മണിയോടെ കോഴിക്കോട് എരഞ്ഞിപ്പാലം ജംഗ്ഷന് സമീപമായിരുന്നു സംഭവം. അശ്വന്ത് കോക്ക് ഓടിച്ച മഹീന്ദ്ര ഥാർ ജീപ്പ് നിയന്ത്രണം വിട്ട് കൊട്ടാരം റോഡിൽ നിർത്തിയിട്ടിരുന്ന കാറിലും ഭിന്നശേഷിക്കാരൻ സഞ്ചരിച്ച ഇരുചക്രവാഹനത്തിലും ഇടിക്കുകയായിരുന്നു. അപകടത്തിൽ വാഹനങ്ങൾക്ക് കേടുപാടുകൾ സംഭവിച്ചു. അശ്വന്ത് അമിതമായി മദ്യപിച്ചിരുന്നുവെന്നും വാഹനമോടിക്കാൻ പോലും കഴിയാത്ത ലഹരിയിലായിരുന്നുവെന്നും നാട്ടുകാരും പരാതിക്കാരും ആരോപിച്ചു.
അപകടം നടന്നയുടൻ ഓടിക്കൂടിയ നാട്ടുകാരോടും വിവരമറിഞ്ഞ് സ്ഥലത്തെത്തിയ പോലീസുകാരോടും ലഹരിയിലായിരുന്ന അശ്വന്ത് തട്ടിക്കയറുകയും ബഹളം വെക്കുകയും ചെയ്തു. ഇതിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നുണ്ട്. തുടര്‍ന്ന് അശ്വന്തിന്റെ ജീപ്പിൽ പോലീസ് നടത്തിയ പരിശോധനയിൽ നിന്നും രണ്ട് കുപ്പി മദ്യം കണ്ടെടുത്തു. വാഹനം പോലീസ് കസ്റ്റഡിയിലെടുത്തിട്ടുണ്ട്. തുടർന്ന് ഇയാളെ കോഴിക്കോട് ബീച്ച് ആശുപത്രിയിലെത്തിച്ച് വൈദ്യപരിശോധനയ്ക്ക് വിധേയനാക്കിയ ശേഷമാണ് ജാമ്യത്തിൽ വിട്ടത്. സംഭവത്തിൽ കൂടുതൽ അന്വേഷണം നടന്നു വരികയാണെന്ന് നടക്കാവ് പോലീസ് അറിയിച്ചു.
