ന്യൂയോർക്ക്: ആഗോളതലത്തിൽ നയതന്ത്ര ബന്ധങ്ങളിൽ വലിയ മാറ്റങ്ങൾ സംഭവിച്ചുകൊണ്ടിരിക്കുകയാണെന്നും ലോകം അതിവേഗം ബഹുമുഖ (Multipolar) വ്യവസ്ഥയിലേക്ക് നീങ്ങുകയാണെന്നും വിദേശകാര്യ മന്ത്രി എസ്. ജയശങ്കർ. മുൻകാലങ്ങളിൽ ഇന്ത്യയ്ക്ക് കൂടുതൽ വിദേശനയ ഓപ്ഷനുകൾ ഉണ്ടാകുന്നതിനോട് അമേരിക്കയ്ക്ക് എതിർപ്പുണ്ടായിരുന്നുവെന്നും, തങ്ങളുമായി മാത്രം ബന്ധം കേന്ദ്രീകരിക്കണമെന്ന നിലപാടാണ് വാഷിംഗ്ടൺ സ്വീകരിച്ചിരുന്നതെന്നും അദ്ദേഹം തുറന്നടിച്ചു. ന്യൂയോർക്കിൽ ഏഷ്യ സൊസൈറ്റി (Asia Society) സംഘടിപ്പിച്ച പരിപാടിയിൽ സംസാരിക്കവെയാണ് ജയശങ്കർ അമേരിക്കൻ നയതന്ത്ര നിലപാടുകളിലെ ഇരട്ടത്താപ്പിനെ രൂക്ഷമായി വിമർശിച്ചത്.
അമേരിക്കൻ വിദേശകാര്യ വകുപ്പിലെ മുൻ അസിസ്റ്റന്റ് സെക്രട്ടറി ഡാനിയൽ റസ്സലുമായി പങ്കെടുത്ത സംവാദത്തിലാണ് ജയശങ്കർ ഇന്ത്യയുടെ സ്വതന്ത്ര വിദേശനയത്തിന്റെ കരുത്ത് വ്യക്തമാക്കിയത്. “അമേരിക്ക തങ്ങളുടെ എല്ലാ ഓപ്ഷനുകളും തുറന്നു നിലനിർത്തുമ്പോൾ തന്നെ, ഇന്ത്യയ്ക്ക് കൂടുതൽ ഓപ്ഷനുകൾ ഉണ്ടാകാൻ പാടില്ലെന്ന ഒരു അന്തരീക്ഷം പണ്ട് അമേരിക്കയിൽ ഉണ്ടായിരുന്നു. എന്നാൽ ഇന്ന് ആ അഭിനയവും കപടതയും അവസാനിച്ചിരിക്കുകയാണ്. ഇപ്പോൾ എല്ലാവരും എല്ലാവരുമായും പരസ്യമായി തന്നെ ബന്ധപ്പെടുകയും ഉഭയകക്ഷി ഇടപാടുകൾ നടത്തുകയും ചെയ്യുന്നു,” ജയശങ്കർ പറഞ്ഞു.
ഇന്ത്യ ദീർഘകാലമായി മുന്നോട്ടുവെക്കുന്ന ‘സ്ട്രാറ്റജിക് ഓട്ടോണമി’ (Strategic Autonomy) അഥവാ തന്ത്രപരമായ സ്വയംഭരണാവകാശം ഇന്ന് അമേരിക്ക ഉൾപ്പെടെയുള്ള ലോകരാജ്യങ്ങൾ പിന്തുടരുന്ന കാഴ്ചയാണ് കാണാനാകുന്നതെന്നും അദ്ദേഹം കൂട്ടിച്ചേർത്തു. ഓരോ രാജ്യവും തങ്ങളുടെ സ്വന്തം താല്പര്യങ്ങൾക്ക് മുൻഗണന നൽകിക്കൊണ്ട് മികച്ച അവസരങ്ങൾ കണ്ടെത്താൻ ശ്രമിക്കുകയാണ്. ഈ നയതന്ത്രപരമായ മാറ്റങ്ങൾ ലോകം കൂടുതൽ ശക്തികേന്ദ്രങ്ങളുള്ള ബഹുമുഖ ലോകത്തിലേക്ക് (Multipolar World) നീങ്ങുന്നതിന്റെ വ്യക്തമായ തെളിവാണെന്നും വിദേശകാര്യ മന്ത്രി ചൂണ്ടിക്കാട്ടി.
