യമനിലെ ഹൂതി പ്രസ്ഥാനം ഭീകരവാദികളാണെന്നും അവർക്ക് ഇസ്ലാമുമായി യാതൊരു ബന്ധവുമില്ലെന്നും മുതിർന്ന പാകിസ്ഥാനി ഇസ്ലാമിക പണ്ഡിതനും പാകിസ്ഥാൻ ഉലമ കൗൺസിൽ ചെയർമാനുമായ ഹഫീസ് മുഹമ്മദ് താഹിർ മഹ്മൂദ് അഷറഫി. സൗദി അറേബ്യയിലെ മദീന ഇസ്ലാമിക് യൂണിവേഴ്സിറ്റിയിൽ നടന്ന രണ്ടുദിവസത്തെ അന്താരാഷ്ട്ര സമ്മേളനത്തിൽ സംസാരിക്കുകയായിരുന്നു അദ്ദേഹം. ഫലസ്തീന്റെയും ഇസ്ലാമിന്റെയും പേര് പറയുന്ന ഹൂതികൾ ഇസ്രായേലി കപ്പലുകൾക്ക് വഴിനൽകുകയും സൗദി അറേബ്യൻ കപ്പലുകളെ ആക്രമിക്കുകയുമാണ് ചെയ്യുന്നത്. ഈ പ്രവൃത്തികൾക്ക് ഇസ്ലാമുമായോ ഇസ്ലാമിക ധാർമ്മികതയുമായോ ഫലസ്തീൻ ജനതയ്ക്കുള്ള പിന്തുണയുമായോ യാതൊരു ബന്ധവുമില്ലെന്ന് അഷറഫി വ്യക്തമാക്കി.
മക്കയ്ക്കും മദീനയ്ക്കും നേരെ മിസൈൽ ആക്രമണങ്ങൾക്ക് മുതിരുന്ന ഹൂതികൾ ഇസ്ലാമിന്റെയും ഉമ്മത്തിന്റെയും യഥാർത്ഥ ശത്രുക്കളാണെന്ന് അദ്ദേഹം കുറ്റപ്പെടുത്തി. ചരിത്രത്തിലെ അബ്രഹായുടെയും ആനക്കൂട്ടത്തിന്റെയും ആക്രമണത്തിന് തുല്യമായ അക്രമമാണ് ഹൂതികൾ നടത്തുന്നത്. യമനിലെ സാധാരണക്കാരായ സ്ത്രീകളെയും കുട്ടികളെയും പ്രായമായവരെയും ആക്രമിക്കുന്ന ഈ ഭീകരവാദ സംഘത്തിന് സൗദി അറേബ്യ സഹായമായി നൽകുന്ന കോടിക്കണക്കിന് ഡോളറുകൾ വേണ്ടെന്നും, അവർ രാജ്യത്തെ തകർക്കാനാണ് ശ്രമിക്കുന്നതെന്നും അദ്ദേഹം പറഞ്ഞു. സൗദി അറേബ്യയ്ക്കെതിരെയുള്ള ഈ പോരാട്ടത്തിൽ പാകിസ്ഥാൻ ഭരണകൂടവും സായുധ സേനയും ജനങ്ങളും സൗദിക്കൊപ്പം തോളോട് തോൾ ചേർന്ന് നിലകൊള്ളുമെന്നും അഷറഫി കൂട്ടിച്ചേർത്തു.
നേരത്തെ ഒസാമ ബിൻ ലാദനെ പുകഴ്ത്തി സംസാരിച്ചതിന്റെ പേരിലും മതനിന്ദ ആരോപിച്ചുള്ള ബ്ലാക്ക്‌മെയിലിംഗിന് സംരക്ഷണം നൽകിയെന്ന ആരോപണത്തെത്തുടർന്നും ബ്രിട്ടനിലെ ആർച്ച് ബിഷപ്പ് നൽകിയ പുരസ്കാരം പിൻവലിച്ചതിലൂടെ വാർത്തകളിൽ നിറഞ്ഞ വ്യക്തിയാണ് അഷറഫി. സെപ്റ്റംബർ ആദ്യം ഹൂതികൾ സൗദി ലക്ഷ്യമിട്ട് നടത്തിയ മിസൈൽ ആക്രമണങ്ങളെ തുടർന്ന് മേഖലയിൽ സംഘർഷം കടുത്തിട്ടുണ്ട്.
അതേസമയം, സൗദി അറേബ്യയ്ക്ക് പ്രതിരോധ പിന്തുണ നൽകുമെങ്കിലും യമനിൽ നേരിട്ട് ആക്രമണം നടത്താനുള്ള സൗദിയുടെ ആവശ്യങ്ങളോട് പാകിസ്ഥാൻ ഭരണകൂടം തണുപ്പൻ പ്രതികരണമാണ് നടത്തിയത്. ഇതോടെ മേഖലയിലെ പോരാട്ടത്തിൽ പങ്കാളികളായാൽ പ്രത്യാഘാതം കഠിനമായിരിക്കുമെന്ന് ഹൂതി നേതാക്കളും പാകിസ്ഥാന് മുന്നറിയിപ്പ് നൽകിയിട്ടുണ്ട്.
