തെൽ അവീവ്: ദുബായിൽ നിന്ന് തെൽ അവീവിലേക്ക് പുറപ്പെട്ട ഫ്ലൈദുബായ് വിമാനത്തിന്റെ കോക്ക്പിറ്റിൽ പൈലറ്റുമാർ തമ്മിലുണ്ടായ കത്തിക്കുത്തിനേ തുടർന്ന് വിമാനം വെടിവെച്ചിടാൻ വരെ ഇസ്രായേൽ വ്യോമസേന തയാറെടുത്തിരുന്നതായി റിപ്പോർട്ട്. സി.ബി.എസ് ന്യൂസാണ് വിമാനം നിയന്ത്രണം വിട്ട് രാജ്യത്തിന് നേരെ പാഞ്ഞടുത്തപ്പോൾ ഇസ്രായേൽ സ്വീകരിച്ച അടിയന്തര പ്രതിരോധ നടപടികളെക്കുറിച്ചുള്ള വിവരങ്ങൾ പുറത്തുവിട്ടത്. സെപ്റ്റംബർ 30-നാണ് ദുബായിൽ നിന്ന് തെൽ അവീവിലേക്ക് പറന്ന ഫ്ലൈദുബായുടെ എഫ്.ഇസെഡ് 1073 (FZ1073) വിമാനത്തിൽ നാടകീയ സംഭവങ്ങൾ അരങ്ങേറിയത്. യാത്രാമധ്യേ ഒമാൻ സ്വദേശിയായ കോ-പൈലറ്റ് ഹമാം അൽ ഹമ്മാമി, ഇന്ത്യൻ വംശജനായ ക്യാപ്റ്റൻ സ്മിത് മച്ചാറിനെ വെട്ടിപ്പരിക്കേൽപ്പിച്ച് വിമാനത്തിന്റെ നിയന്ത്രണം പിടിച്ചെടുക്കാൻ ശ്രമിക്കുകയായിരുന്നു.
ആക്രമണത്തെ തുടർന്ന് വെറും 30 സെക്കൻഡിനുള്ളിൽ വിമാനം 16,000 അടിയോളം താഴേക്ക് പതിച്ചു. വിമാനത്തിൽ നിന്ന് അടിയന്തര ഹൈജാക്കിംഗ് സന്ദേശം (7500 Distress Code) ലഭിച്ചതോടെ ഇസ്രായേലിൽ കടുത്ത ആശങ്ക പരന്നു. വിമാനം രാജ്യത്തിന് നേരെ ആക്രമണം നടത്താൻ ലക്ഷ്യമിട്ടുള്ളതാണോ എന്ന് ഭയന്ന ഇസ്രായേൽ വ്യോമസേന ഉടൻ തന്നെ യുദ്ധവിമാനങ്ങൾ അന്തരീക്ഷത്തിലേക്ക് അയച്ചു. വിമാനവുമായി ബന്ധപ്പെടാൻ ഇസ്രായേൽ ശ്രമിച്ചെങ്കിലും കോക്ക്പിറ്റിൽ നിന്ന് മറുപടിയൊന്നും ലഭിച്ചില്ല. ഇതോടെ അടിയന്തര പ്രതിരോധ സംവിധാനങ്ങൾ സജീവമാക്കുകയും കമാൻഡ് സെന്റർ തുറന്ന് ഇസ്രായേൽ വ്യോമാതിർത്തി അടയ്ക്കുകയും ചെയ്തു. വിമാനം തെൽ അവീവ ലക്ഷ്യമാക്കി കൂടുതൽ മുന്നോട്ട് കുതിച്ചിരുന്നെങ്കിൽ അതിനെ വെടിവെച്ചിടാൻ തന്നെയാണ് ഇസ്രായേൽ സൈന്യം പദ്ധതിയിട്ടിരുന്നത്.
എന്നാൽ പരിക്കേറ്റ ക്യാപ്റ്റൻ സ്മിത് മച്ചാർ കാണിച്ച ധീരത വിമാനം വലിയൊരു ദുരന്തത്തിൽ നിന്ന് കരകയറാൻ കാരണമായി. രക്തത്തിൽ കുളിച്ച അവസ്ഥയിലും അദ്ദേഹം കോക്ക്പിറ്റിന്റെ വാതിൽ തുറന്നുകൊടുക്കുകയും തുടർന്ന് വിമാനത്തിലുണ്ടായിരുന്ന മറ്റ് ക്രൂ അംഗങ്ങളും യാത്രക്കാരും ചേർന്ന് ആക്രമണം നടത്തിയ കോ-പൈലറ്റിനെ ബലപ്രയോഗത്തിലൂടെ കീഴടക്കുകയുമായിരുന്നു. തുടർന്ന് വിമാനത്തിലുണ്ടായിരുന്ന ഓഫ്-ഡ്യൂട്ടി പൈലറ്റുമാരുടെ സഹായത്തോടെ വിമാനം സൗദി അറേബ്യയിലെ തബൂക്ക് വിമാനത്താവളത്തിൽ സുരക്ഷിതമായി ഇറക്കുകയായിരുന്നു. ഇതോടെ 170-ലധികം വരുന്ന യാത്രക്കാരുടെയും ജീവനക്കാരുടെയും ജീവൻ രക്ഷിക്കാൻ സാധിച്ചു. സംഭവത്തിൽ ഭീകരാക്രമണ കോണിലടക്കം വിശദമായ അന്വേഷണം നടക്കുകയാണ്.
