തൊഴിൽ അന്വേഷിച്ചെത്തിയ ദളിത് യുവതിയെ രണ്ടുദിവസത്തോളം മുറിയിൽ പൂട്ടിയിട്ട് മയക്കുമരുന്ന് നൽകി കൂട്ടബലാത്സംഗത്തിനിരയാക്കിയതായി ഭർത്താവിന്റെ ഞെട്ടിക്കുന്ന വെളിപ്പെടുത്തൽ. കൊച്ചി നഗരത്തിലാണ് നാടിനെ നടുക്കിയ ക്രൂരത അരങ്ങേറിയത്. സ്ത്രീകൾ ഉൾപ്പെടുന്ന പ്രതികളുടെ സംഘം യുവതിയെ അതിക്രൂരമായ ശാരീരിക പീഡനങ്ങൾക്ക് ഇരയാക്കിയതായി ഭർത്താവ് വെളിപ്പെടുത്തി.
അധ്യാപികയായിരുന്ന യുവതി, അടുത്തിടെ വീടുമാറിയതിനെത്തുടർന്നാണ് പഴയ ജോലി ഉപേക്ഷിക്കേണ്ടി വന്നത്. തുടർന്ന് പുതിയ ജോലിക്കായുള്ള ശ്രമത്തിനിടയിലാണ് സോഷ്യൽ മീഡിയയിലൂടെ ഒരു സ്പാ മാനേജർ തസ്തികയിലേക്കുള്ള പരസ്യം കാണുന്നത്. പരസ്യം കണ്ട് അപേക്ഷ അയച്ച യുവതിയെ പ്രതികൾ അഭിമുഖത്തിനായി ക്ഷണിക്കുകയും ജോലി ലഭിച്ചതായി അറിയിക്കുകയുമായിരുന്നു.
അടുത്തിടെ ഗർഭച്ഛിദ്രം സംഭവിച്ചതിനെ തുടർന്ന് കടുത്ത മാനസികസമ്മർദത്തിലായിരുന്ന യുവതി ഡോക്ടറുടെ ചികിത്സയിലായിരുന്നു. മാനസിക പിന്തുണ നൽകുന്നതിന്റെയും കൗൺസിലിംഗിന്റെയും ഭാഗമായി ഡോക്ടറുടെ നിർദേശപ്രകാരമാണ് ഭാര്യ ജോലിക്ക് പോകുന്നതിനെ ഭർത്താവും കുടുംബവും പിന്തുണച്ചത്. എന്നാൽ ജോലി സ്ഥലത്തെത്തിയ യുവതിയെ ലഹരി കലർത്തിയ ഭക്ഷണവും ഐസ്‌ക്രീമും നൽകി ബോധംകെടുത്തി രണ്ടുദിവസത്തോളം തടങ്കലിൽ വെച്ച് കൂട്ടബലാത്സംഗത്തിന് ഇരയാക്കുകയായിരുന്നുവെന്ന് ഭർത്താവ് വ്യക്തമാക്കുന്നു. സംഭവത്തിൽ പോലീസ് കേസെടുത്ത് അന്വേഷണം വ്യാപിപ്പിച്ചിട്ടുണ്ട്.
