സംസ്ഥാനത്തിനുള്ള ത്രൈമാസ മണ്ണെണ്ണ വിഹിതം അടിയന്തരമായി വർധിപ്പിക്കണമെന്ന് ആവശ്യപ്പെട്ട് കേന്ദ്ര പെട്രോളിയം സഹമന്ത്രി സുരേഷ് ഗോപിക്ക് കത്തയച്ച് ഭക്ഷ്യ-സിവിൽ സപ്ലൈസ് മന്ത്രി അനൂപ് ജേക്കബ്. നിലവിൽ അനുവദിച്ചിരിക്കുന്ന 4,068 കിലോലിറ്റർ ത്രൈമാസ വിഹിതം 9,564 കിലോലിറ്ററായി ഉയർത്തണമെന്നാണ് സംസ്ഥാനത്തിന്റെ അഭ്യർത്ഥന. കേന്ദ്രം മണ്ണെണ്ണ വിഹിതം ഗണ്യമായി വെട്ടിക്കുറച്ചതോടെ കേരളം കടുത്ത മണ്ണെണ്ണ ക്ഷാമത്തിലേക്കാണ് നീങ്ങുന്നത്.
മുമ്പ് ലഭിച്ചിരുന്ന 56.76 ലക്ഷം ലിറ്ററിൽ നിന്ന് ഇത്തവണ ഒക്ടോബർ-ഡിസംബർ പാദത്തിൽ വിഹിതം 40.68 ലക്ഷം ലിറ്ററായി കേന്ദ്ര സർക്കാർ പരിമിതപ്പെടുത്തിയിരുന്നു. ഇതിലൂടെ ഒറ്റയടിക്ക് 16.08 ലക്ഷം ലിറ്ററിന്റെ കുറവാണ് സംസ്ഥാനത്തിനുണ്ടായത്. നിലവിലെ വിഹിതമനുസരിച്ച് 5.94 ലക്ഷം വരുന്ന എ.എ.വൈ (മഞ്ഞ) കാർഡുകാർക്ക് മൂന്ന് മാസത്തിലൊരിക്കൽ ഒരു ലിറ്ററും, മുൻഗണനാ-മുൻഗണനേതര (പിങ്ക്, നീല, വെള്ള) കാർഡുടമകൾക്ക് അര ലിറ്റർ വീതവുമാണ് നൽകുന്നത്. എന്നാൽ വിഹിതം പകുതിയോളം കുറഞ്ഞതോടെ എല്ലാ കാർഡുടമകൾക്കും മണ്ണെണ്ണ വിതരണം പൂർണ്ണമായി തടസ്സപ്പെടുന്ന സാഹചര്യമാണുള്ളത്.
സാമ്പത്തികമായി പിന്നാക്കം നിൽക്കുന്ന കുടുംബങ്ങൾ, തീരദേശ-മലയോര മേഖലകളിലെ നിവാസികൾ, കുടിയേറ്റ തൊഴിലാളികൾ എന്നിവർ പാചക ആവശ്യങ്ങൾക്കായി സബ്സിഡി മണ്ണെണ്ണയെ ആശ്രയിക്കുന്നതിനാൽ വിതരണ അളവ് അര ലിറ്ററിൽ നിന്ന് ഒരു ലിറ്ററാക്കി വർധിപ്പിക്കേണ്ടതുണ്ട്. എൽ.പി.ജി നിയന്ത്രണങ്ങളും മത്സ്യത്തൊഴിലാളികളുടെ വള്ളങ്ങൾക്കുള്ള മണ്ണെണ്ണ ആവശ്യവും പ്രതിസന്ധി ഇരട്ടിയാക്കുന്നുണ്ട്. കൂടാതെ റേഷൻ മണ്ണെണ്ണയുടെ വില വർധിപ്പിച്ച് ലിറ്ററിന് 71 രൂപ മുതൽ 76 രൂപ വരെയാക്കിയതും സാധാരണക്കാർക്ക് കനത്ത തിരിച്ചടിയായിരിക്കുകയാണ്. 2026-27 സാമ്പത്തിക വർഷത്തിലെ ആദ്യപാദത്തിൽ 5,496 കെ.എൽ അധികവിഹിതം അനുവദിക്കണമെന്ന് സിവിൽ സപ്ലൈസ് കമ്മീഷണർ കേന്ദ്രത്തോട് ആവശ്യപ്പെട്ടിരുന്ന കാര്യവും കത്തിൽ ചൂണ്ടിക്കാട്ടിയിട്ടുണ്ട്.
