വെസ്റ്റ് ഇൻഡീസിനെതിരായ ഒന്നാം ടി20 പോരാട്ടത്തിലും ബാറ്റിംഗിൽ പരാജയപ്പെട്ടതോടെ മലയാളി താരം സഞ്ജു സാംസണിനെതിരെ കടുത്ത വിമർശനവുമായി ആരാധകർ . വൈഭവ് സൂര്യവംശിയെ ഒഴിവാക്കി അഭിഷേക് ശർമ്മയ്ക്കൊപ്പം ഓപ്പണറായി അവസരം ലഭിച്ച സഞ്ജുവിന്, 9 പന്തിൽ 11 റൺസ് മാത്രമെടുത്ത് നാലാം ഓവറിൽ ഇടങ്കയ്യൻ സ്പിന്നർ അകീൽ ഹൊസൈന് റിട്ടേൺ ക്യാച്ച് നൽകി മടങ്ങേണ്ടി വന്നു. 172 റൺസ് ലക്ഷ്യം പിന്തുടർന്ന ഇന്ത്യയ്ക്ക് സഞ്ജുവിന്റെ ഈ ഉത്തരവാദിത്തമില്ലാത്ത വിക്കറ്റ് നഷ്ടം വലിയ തിരിച്ചടിയായി. സഞ്ജുവിന് നൽകിയ അവസരങ്ങൾ ഇനി അവസാനിപ്പിക്കണമെന്ന രോഷാകുലരായ ആരാധകരുടെ പ്രതികരണങ്ങളാൽ സോഷ്യൽ മീഡിയ നിറഞ്ഞിരിക്കുകയാണ്.
കഴിഞ്ഞ നാല് ടി20 ഇന്നിംഗ്സുകളിൽ നിന്ന് വെറും 29 റൺസ് മാത്രമാണ് സഞ്ജുവിന് നേടാനായത്. 11, 2, 7, 9 എന്നിങ്ങനെയാണ് താരത്തിന്റെ അവസാനത്തെ സ്കോറുകൾ. പേസർമാർക്കും സ്പിന്നർമാർക്കും മുന്നിൽ വളരെ എളുപ്പത്തിൽ വിക്കറ്റ് എറിഞ്ഞു കൊടുക്കുന്ന രീതി സഞ്ജുവിന്റെ അന്താരാഷ്ട്ര കരിയറിന്റെ സ്ഥിരതയെക്കുറിച്ച് വീണ്ടും ചോദ്യങ്ങളുയർത്തുന്നു. വൈഭവ് സൂര്യവംശിയും ജിതേഷ് ശർമ്മയും അവസരത്തിനായി പുറത്തുനിൽക്കുമ്പോൾ, ലഭിക്കുന്ന അവസരങ്ങൾ കളഞ്ഞുകുളിക്കുന്നത് സഞ്ജുവിന്റെ ടീമിലെ സ്ഥാനത്തിന് തന്നെ ഭീഷണിയാവുകയാണ്.
അതേസമയം, നായകൻ ശ്രേയസ് അയ്യരുടെ മിന്നൽ അർദ്ധസെഞ്ചുറിയുടെ കരുത്തിൽ ഇന്ത്യ മത്സരത്തിൽ ശക്തമായി തിരിച്ചെത്തി. ഷായ് ഹോപ്പിന്റെയും ഷെർഫെയ്ൻ റൂഥർഫോർഡിന്റെയും അർദ്ധസെഞ്ചുറികളുടെ കരുത്തിലാണ് വെസ്റ്റ് ഇൻഡീസ് 171 റൺസ് കെട്ടിപ്പടുത്തത്. ഓപ്പണർമാർ ഇരുവരും പെട്ടെന്ന് പുറത്തായതോടെ ക്രീസിലെത്തിയ ശ്രേയസ്, 29 പന്തിൽ നിന്ന് 56 റൺസെടുത്ത് ഇന്ത്യൻ ചേസിംഗിന് വേഗം കൂട്ടി. ഷമർ സ്പ്രിംഗറെ സിക്സറിന് പറത്തി ശ്രേയസ് സ്കോർ 11 ഓവറിൽ 114-ൽ എത്തിച്ചു. ഇതോടെ വിജയം കൈയെത്തിപ്പിടക്കാവുന്ന ദൂരത്തിൽ ഇന്ത്യ കളിയിൽ ആധിപത്യം ഉറപ്പിച്ചു.
ചില സോഷ്യൽ മീഡിയ അഭിപ്രായങ്ങൾ ഇങ്ങനെ:
“സഞ്ജു സാംസൺ അയാളുടെ ബാഗുകൾ പാക്ക് ചെയ്യേണ്ടതുണ്ട്, അടിസ്ഥാനകാര്യങ്ങളിൽ നിന്ന് ആരംഭിക്കണം, കൂടാതെ ഒരു ഇന്ത്യക്കാരന് പകരം ഒരു വിദേശ ബാറ്റിംഗ് കോച്ചിനെ അയാൾ ആശ്രയിക്കേണ്ടതുണ്ട്. അയാൾ തൻ്റെ ഭാരം കുറച്ചത് വളരെ സന്തോഷകരമാണ്, പക്ഷേ ഇപ്പോൾ അവൻ്റെ ഗെയിം ശരിയായ ട്രാക്കിൽ അല്ല.”
” ഗൗതം ഗംഭീർ ഉടനടി സഞ്ജുവിനോട് ആ കാര്യം പറയും- ” നിന്റെ സമയമായിരിക്കുന്നു സഞ്ജു”
എന്തായാലും വരാനിരിക്കുന്ന മത്സരത്തിൽ അവസരം കിട്ടിയാൽ അതിൽ തിളങ്ങി ഇല്ലെങ്കിൽ ചിലപ്പോൾ ഗംഭീർ സഞ്ജുവിനോട് “നിന്റെ സമയമായിരിക്കുന്നു” എന്ന് പറയും.
