പാകിസ്താനിലെ സിന്ധ് പ്രവിശ്യയിൽ ഹൈന്ദവ ക്ഷേത്രത്തിന് നേരെ വീണ്ടും ക്രൂരമായ ആക്രമണം. നഗർപാർക്കർ മേഖലയിലെ രതി ഗ്രാമത്തിലുള്ള മാതാ ജോഗ് മായാ ക്ഷേത്രത്തിന് നേരെയാണ് ആക്രമണമുണ്ടായത്. സംഭവവുമായി ബന്ധപ്പെട്ട് ഒരാളെ പോലീസ് കസ്റ്റഡിയിലെടുത്തതായി പ്രാദേശിക പോലീസ് ഉദ്യോഗസ്ഥർ സ്ഥിരീകരിച്ചു.
തിങ്കളാഴ്ച രാത്രിയോടെയാണ് അക്രമികൾ ക്ഷേത്രത്തിൽ അതിക്രമിച്ചു കയറി നാശനഷ്ടങ്ങൾ വരുത്തിയത്. ചൊവ്വാഴ്ച പുലർച്ചെ ക്ഷേത്ര സൂക്ഷിപ്പുകാരൻ എത്തിയപ്പോഴാണ് മാതാ ജോഗ് മായാ ദേവിയുടെ വിഗ്രഹങ്ങൾ തകർത്ത നിലയിൽ കണ്ടെത്തിയത്. തുടർന്ന് വിവരം ഉടൻ തന്നെ പോലീസിനെ അറിയിക്കുകയായിരുന്നുവെന്ന് പാകിസ്താൻ ദ്രവിഡർ ഇത്തിഹാദ് ഇതര സർക്കാർ സംഘടനയുടെ (NGO) ചെയർമാൻ ശിവ കാച്ചി അറിയിച്ചു.
സംഭവത്തിൽ പ്രദേശത്തെ ഹൈന്ദവ സമൂഹം കടുത്ത ആശങ്കയും പ്രതിഷേധവും രേഖപ്പെടുത്തി. ക്ഷേത്രത്തിന് നേരെ നിരന്തരം നടക്കുന്ന ഇത്തരം അക്രമങ്ങൾ തടയുന്നതിൽ അധികൃതർ പരാജയപ്പെടുകയാണെന്ന് ജനങ്ങൾ ആരോപിച്ചു. സുരക്ഷ വീഴ്ചയെക്കുറിച്ച് സമഗ്രമായ അന്വേഷണം നടത്തണമെന്നും അക്രമത്തിൽ പങ്കാളികളായ മുഴുവൻ പ്രതികളെയും നിയമത്തിന് മുന്നിൽ കൊണ്ടുവന്ന് കർശന ശിക്ഷ ഉറപ്പാക്കണമെന്നും ഹിന്ദു സമൂഹത്തിലെ പ്രമുഖർ പാക് സർക്കാരിനോട് ആവശ്യപ്പെട്ടു. പാകിസ്താനിൽ ന്യൂനപക്ഷ സമുദായങ്ങൾക്കും അവരുടെ ആരാധനാലയങ്ങൾക്കും നേരെ തുടർച്ചയായി നടക്കുന്ന ആക്രമണങ്ങളുടെ പരമ്പരയിലെ ഒടുവിലത്തെ സംഭവമാണിത്.
