പശ്ചിമ ബംഗാളിലെ നന്ദിഗ്രാം നിയമസഭാ മണ്ഡലത്തിലേക്ക് നടന്ന ഉപതിരഞ്ഞെടുപ്പിന്റെ വോട്ടെണ്ണലിൽ ബിജെപി സ്ഥാനാർത്ഥി ഹസിറാണി രഥ്‌ വൻ മുന്നേറ്റം തുടരുന്നു. മുഖ്യമന്ത്രി സുവേന്ദു അധികാരി ഭവാനിപൂർ മണ്ഡലം നിലനിർത്താൻ നന്ദിഗ്രാം സീറ്റ് രാജിവെച്ചതിനെ തുടർന്നാണ് ഇവിടെ ഉപതിരഞ്ഞെടുപ്പ് വേണ്ടിവന്നത്. വോട്ടെണ്ണലിന്റെ തുടക്കം മുതൽ തന്നെ കൃത്യമായ മേൽക്കൈ നേടിയ ബിജെപി സ്ഥാനാർത്ഥി ഓരോ റൗണ്ട് പിന്നിടുമ്പോഴും ഭൂരിപക്ഷം ഉയർത്തിക്കൊണ്ടിരിക്കുകയാണ്. ശക്തമായ സുരക്ഷാ ക്രമീകരണങ്ങളോടെയാണ് എണ്ണൽ കേന്ദ്രങ്ങളിൽ നടപടികൾ പുരോഗമിക്കുന്നത്.
ബിജെപിയെ തോൽപ്പിക്കാനായി തൃണമൂൽ കോൺഗ്രസും കോൺഗ്രസും ഉൾപ്പെടെയുള്ള ഇൻഡി സഖ്യം ഒന്നിച്ച് മത്സരിച്ചെങ്കിലും വൻ നിരാശയാണ് നന്ദിഗ്രാമിൽ നേരിട്ടിരിക്കുന്നത്.
തൃണമൂൽ കോൺഗ്രസ് പിന്തുണയോടെ മത്സരിക്കുന്ന കോൺഗ്രസ് സ്ഥാനാർത്ഥി മിലാൻ പ്രധാൻ രണ്ടാം സ്ഥാനത്തുണ്ടെങ്കിലും ബിജെപിയുടെ വൻ ഭൂരിപക്ഷത്തിന് മുന്നിൽ വളരെ പിന്നിലായാണ് നിൽക്കുന്നത്. അതേസമയം സിപിഐ, എഐഎസ്എഫ് തുടങ്ങിയ മറ്റ് കക്ഷികളുടെ സ്ഥാനാർത്ഥികൾക്ക് വളരെ കുറഞ്ഞ വോട്ടുകൾ മാത്രമാണ് ഇതുവരെ നേടാനായത്. പ്രമുഖ പാർട്ടി സ്ഥാനാർത്ഥികൾ തമ്മിലുള്ള പോരാട്ടത്തിൽ ബിജെപിയുടെ മേധാവിത്വം പ്രതിപക്ഷ ക്യാമ്പുകളിൽ കനത്ത തിരിച്ചടിയായി മാറിയിട്ടുണ്ട്.
ഉപതിരഞ്ഞെടുപ്പിൽ വോട്ട് മോഷണം നടന്നു എന്ന് ആരോപിച്ച കോൺഗ്രസ് നേതൃത്വം ഭരണകൂട ഇടപെടലുകളെ രൂക്ഷമായി വിമർശിച്ചു. എന്നാൽ ബിജെപി പ്രവർത്തകർ മണ്ഡലത്തിലുടനീളം വലിയ വിജയാഘോഷങ്ങൾ ആരംഭിച്ചുകഴിഞ്ഞു. എണ്ണൽ നടപടികൾ പൂർത്തിയാകുന്നതോടെ ബിജെപിയുടെ ഭൂരിപക്ഷം ഇനിയും ഉയരുമെന്നാണ് പാർട്ടി വൃത്തങ്ങൾ വ്യക്തമാക്കുന്നത്. നന്ദിഗ്രാമിലെ ഈ വിജയം പശ്ചിമ ബംഗാൾ രാഷ്‌ട്രീയത്തിൽ ബിജെപിയുടെ സ്വാധീനം കൂടുതൽ ഉറപ്പിക്കുന്ന ഒന്നായി മാറുകയാണ്.
