കോഴിക്കോട്: വ്യാജ തിരിച്ചറിയൽ രേഖകളുമായി നഗരത്തിൽ തങ്ങിയിരുന്ന രണ്ട് സ്ത്രീകളടക്കം മൂന്ന് ബംഗ്ലാദേശ് സ്വദേശികളെ മെഡിക്കൽ കോളേജ് പോലീസ് പിടികൂടി. മാങ്കാവ് റോഡിൽ മിംസ് ആശുപത്രിക്ക് സമീപത്തെ വാടകമുറിയിൽ താമസിച്ചിരുന്ന റാബി ഷേക്ക് (27), ഭാര്യ റൗഷനരാ ബീഗം (38), പപ്പിയ (22) എന്നിവരാണ് കസ്റ്റഡിയിലായത്.
കഴിഞ്ഞദിവസം പ്രദേശത്ത് ഇതരസംസ്ഥാന തൊഴിലാളികൾ മദ്യപിച്ച് വഴക്കുണ്ടാക്കുകയും വലിയ രീതിയിൽ ബഹളമുണ്ടാക്കുകയും ചെയ്തിരുന്നു. നാട്ടുകാർ വിവരമറിയിച്ചതിനെ തുടർന്ന് സംഭവസ്ഥലത്തെത്തിയ പോലീസ് സംഘം നടത്തിയ ചോദ്യം ചെയ്യലിലും സമാന്തര പരിശോധനയിലുമാണ് വ്യാജ രേഖകളുമായി താമസിച്ച കുടിയേറ്റക്കാരെക്കുറിച്ച് സൂചന ലഭിച്ചത്. തുടര്‍ന്ന് നടത്തിയ വിശദമായ തെരച്ചിലിൽ ഇവർ താമസിച്ചിരുന്ന വാടകമുറിയിൽ നിന്ന് കൊൽക്കത്ത വിലാസത്തിൽ വ്യാജമായി നിർമ്മിച്ച ആധാർ കാർഡ്, പാൻ കാർഡ്, ഇലക്ഷൻ ഐഡി കാർഡ് എന്നിവ പോലീസ് സംഘം പിടിച്ചെടുത്തു.
എട്ടുമാസം മുമ്പാണ് ഇവർ അനധികൃതമായി ഇന്ത്യയിലേക്ക് കടന്നതെന്ന് പോലീസിന്റെ പ്രാഥമിക ചോദ്യം ചെയ്യലിൽ വ്യക്തമായിട്ടുണ്ട്. നാലുമാസം ബെംഗളൂരുവിൽ ജോലി ചെയ്തശേഷമാണ് ഇവർ കോഴിക്കോട്ടേക്ക് എത്തിയത്.പിടിയിലായ റാബി ഷേക്ക് പുതിയപാലത്തെ ഒരു വെൽഡിംഗ് വർക്ക് ഷോപ്പിലാണ് ജോലി ചെയ്തിരുന്നത്. 10 ദിവസം മുമ്പ് കോഴിക്കോട്ടേക്കെത്തിയ 22-കാരിയായ പപ്പിയ കഴിഞ്ഞ ഏഴ് ദിവസമായി തൊണ്ടയാടുള്ള ഒരു പ്രമുഖ സ്പാ കേന്ദ്രത്തിൽ ജീവനക്കാരിയായി ജോലി ചെയ്തുവരികയായിരുന്നു. സംഭവത്തിൽ വ്യാജ രേഖകൾ ചമച്ചതിനും എമിഗ്രേഷൻ നിയമങ്ങൾ ലംഘിച്ചതിനും കേസെടുത്ത പോലീസ്, സ്ഥാപന ഉടമകളെക്കുറിച്ചും പ്രദേശത്ത് മറ്റ് അനധികൃത കുടിയേറ്റക്കാർ തമ്പടിച്ചിട്ടുണ്ടോ എന്നതിനെക്കുറിച്ചും അന്വേഷണം ശക്തമാക്കിയിട്ടുണ്ട്.
