ഇന്ത്യൻ ടീമിലേക്കുള്ള തിരിച്ചുവരവിനെക്കുറിച്ചുള്ള ചർച്ചകൾ സജീവമാകുന്നതിനിടെ നിലപാട് വ്യക്തമാക്കി മുതിർന്ന പേസർ മുഹമ്മദ് ഷമി. ആഭ്യന്തര ക്രിക്കറ്റിൽ ബംഗാളിനായി താൻ സ്ഥിരമായി മികച്ച പ്രകടനം പുറത്തെടുക്കുകയും ഫിറ്റ്‌നസ് തെളിയിക്കുകയും ചെയ്തിട്ടുണ്ടെന്ന് ഷമി പറഞ്ഞു. ഇനി ഇന്ത്യൻ ദേശീയ ടീമിൽ കളിക്കാൻ അവസരം ലഭിച്ചില്ലെങ്കിൽ അത് തന്റെ നഷ്ടമല്ലെന്നും അദ്ദേഹം വ്യക്തമാക്കി.
ക്രിക്കറ്റിൽ തന്റെ പ്രകടനവും കഠിനാധ്വാനവുമാണ് എപ്പോഴും സംസാരിക്കുന്നതെന്നും, ടീമിൽ ഇടംനേടുക എന്നത് സെലക്ടർമാരുടെ തീരുമാനമാണെന്നും താരം സൂചിപ്പിച്ചു. പരുക്കിൽ നിന്ന് മോചിതനായി മികച്ച ഫോമിലേക്ക് തിരിച്ചെത്തിയ ഷമിയുടെ ഈ പ്രസ്താവന ക്രിക്കറ്റ് ലോകത്ത് വലിയ ചർച്ചയായിട്ടുണ്ട്.
