ഭാരതത്തിൽ അരാജകത്വം വിതയ്ക്കാനും ജനാധിപത്യ ഭരണഘടനാ സംവിധാനങ്ങളെ തകർക്കാനും നീക്കം നടത്തുന്ന ‘കോക്രോച്ച് ജനത പാർട്ടി’യുടെ (CJP) പ്രക്ഷോഭങ്ങൾക്ക് പിന്നിൽ വിദേശ ശക്തികളുടെ കൈകളുണ്ടെന്ന ആരോപണങ്ങൾക്ക് വീണ്ടും ബലമേകുന്നു. ബംഗ്ലാദേശിൽ മുൻ പ്രധാനമന്ത്രി ഷെയ്ഖ് ഹസീന സർക്കാരിനെ രക്തരൂഷിതമായ വിപ്ലവത്തിലൂടെ പുറത്താക്കിയ ‘നാഷണൽ സിറ്റിസൺ പാർട്ടി’ (NCP) കൺവീനർ നഹിദ് ഇസ്ലാം സി.ജെ.പിയുടെ ‘ജന്തർ മന്തർ 2.0’ സമരത്തിന് പരസ്യമായി പിന്തുണ പ്രഖ്യാപിച്ച് രംഗത്തെത്തി. ഇതോടെ ഡൽഹി കേന്ദ്രീകരിച്ച് നടക്കുന്ന പ്രക്ഷോഭങ്ങൾക്ക് പിന്നിലെ വിദേശ അജണ്ടയും ഭാരതവിരുദ്ധ ഗൂഢാലോചനയും പൂർണ്ണമായും പുറത്തുവന്നിരിക്കുകയാണ്.
കേന്ദ്ര തിരഞ്ഞെടുപ്പ് കമ്മീഷന്റെ വോട്ടർപട്ടിക തിരുത്തൽ നടപടികൾക്കെതിരെ ഡൽഹിയിൽ ഞായറാഴ്ച വീണ്ടും വൻ ജനക്കൂട്ടത്തെ അണിനിരത്താൻ സി.ജെ.പി ആഹ്വാനം ചെയ്തതിന് തൊട്ടുപിന്നാലെയാണ്, എക്സിലൂടെ (X) നഹിദ് ഇസ്ലാം പ്രസ്താവനയിറക്കിയത്. “ധാക്കയിൽ നിന്ന് ഞങ്ങൾ നിങ്ങളോടൊപ്പം നിൽക്കുന്നു; നിങ്ങളുടെ സമരം നമ്മുടേത് കൂടിയാണ്” എന്ന് കുറിച്ചുകൊണ്ടാണ് നഹിദ് ഇസ്ലാം ഇന്ത്യയിലെ പ്രതിഷേധക്കാർക്ക് പിന്തുണയറിയിച്ചത്. ഷഹീൻ ബാഗ് സമരം, ജെ.എൻ.യു, ജാദവ്പൂർ സർവ്വകലാശാലകളിലെ ദേശവിരുദ്ധ പ്രതിഷേധങ്ങൾ എന്നിവയെയും, വഞ്ചനാക്കുറ്റത്തിന് ജയിലിൽ കഴിയുന്ന ഷർജീൽ ഇളയാസ്, ഉമർ ഖാലിദ് എന്നിവരെയും പ്രശംസിച്ച നഹിദ് ഇസ്ലാം, ഇന്ത്യയിലെ സമരം ഭാരതത്തിന്റെ പരമാധികാരത്തിന് തന്നെ ഭീഷണിയാകുന്ന രീതിയിലാണ് വിശേഷിപ്പിച്ചത്.
കഴിഞ്ഞ ദിവസങ്ങളിൽ ഭാരതത്തിന്റെ വടക്കുകിഴക്കൻ സംസ്ഥാനങ്ങളായ ‘സെവൻ സിസ്റ്റേഴ്സ്’ പിടിച്ചെടുക്കുമെന്ന് ഭീഷണിപ്പെടുത്തിയ എൻ.സി.പി നേതാവ് ഹസ്‌നത് അബ്ദുള്ളയുടെ സഖ്യകക്ഷിയാണ് നഹിദ് ഇസ്ലാം. ബംഗ്ലാദേശിൽ ഹിന്ദുക്കൾക്കും മറ്റ് ന്യൂനപക്ഷങ്ങൾക്കും നേരെ ക്രൂരമായ വംശീയ അതിക്രമങ്ങൾക്ക് നേതൃത്വം നൽകിയവർ ഭാരതത്തെ ജനാധിപത്യവും മനുഷ്യാവകാശവും പഠിപ്പിക്കാൻ ഇറങ്ങുന്നതിനെതിരെ കനത്ത പ്രതിഷേധമാണ് രാജ്യത്ത് ഉയരുന്നത്. ഇന്ത്യയിൽ അരാജകത്വം സൃഷ്ടിച്ച് ഭരണം അട്ടിമറിക്കാൻ വിദേശത്തെ വിഘടനവാദ ഗ്രൂപ്പുകളും തീവ്രവാദാനുകൂല സംഘങ്ങളും ഒത്താശ ചെയ്യുന്നുണ്ടെന്ന ബിജെപിയുടെയും കേന്ദ്ര സുരക്ഷാ ഏജൻസികളുടെയും മുന്നറിയിപ്പുകളെ ശരിവെക്കുന്നതാണ് പുതിയ സംഭവവികാസങ്ങൾ.
