ഏറെ രാഷ്ട്രീയ കോലാഹലങ്ങൾ സൃഷ്ടിച്ച സിഎംആർഎൽ – എക്സാലോജിക് മാസപ്പടി, കള്ളപ്പണ കേസുകളിൽ മുൻ മുഖ്യമന്ത്രിയും നിലവിലെ പ്രതിപക്ഷ നേതാവുമായ പിണറായി വിജയനെതിരെ വിജിലൻസ് എഫ്ഐആർ രജിസ്റ്റർ ചെയ്തതിന് പിന്നാലെ കടുത്ത പ്രതികരണവുമായി ബിജെപി നേതാവ് ഷോൺ ജോർജ്. കേസിൽ ഒന്നാം പ്രതിയായി ചേർക്കപ്പെട്ട പശ്ചാത്തലത്തിൽ പിണറായി വിജയൻ പ്രതിപക്ഷ നേതൃസ്ഥാനം അടിയന്തിരമായി രാജിവെക്കണമെന്ന് ഷോൺ ജോർജ് ആവശ്യപ്പെട്ടു. വിഷയം ഇത്രത്തോളം എത്തിനിൽക്കുമ്പോഴും കോൺഗ്രസും സിപിഎമ്മും പരസ്പരം സഹായിക്കുന്ന അഡ്ജസ്റ്റ്മെന്റ് രാഷ്ട്രീയമാണ് കളിക്കുന്നതെന്ന് അദ്ദേഹം കുറ്റപ്പെടുത്തി.
പിണറായി വിജയന് നിയമപരമായി കോടതിയെ സമീപിച്ച് സ്റ്റേ വാങ്ങാനുള്ള സൗകര്യമൊരുക്കാൻ വേണ്ടിയാണ് വിജിലൻസ് എഫ്ഐആർ രജിസ്റ്റർ ചെയ്യുന്നത് വൈകിപ്പിച്ചതെന്ന് ഷോൺ ജോർജ് ആരോപിച്ചു. സിഎംആർഎൽ കമ്പനിയിൽ നിന്നും എക്സാലോജിക്കിൽ നിന്നും അനധികൃതമായി പണം വാങ്ങിയ മുഴുവൻ രാഷ്ട്രീയ നേതാക്കൾക്കുമെതിരെ കൃത്യമായ അന്വേഷണം വേണമെന്നും അദ്ദേഹം കോട്ടയത്ത് മാധ്യമങ്ങളോട് പറഞ്ഞു. ഹൈക്കോടതി ഉത്തരവിന് പിന്നാലെ വിജിലൻസ് സ്പെഷ്യൽ ഇൻവെസ്റ്റിഗേഷൻ ടീം വൺ ആണ് രണ്ട് എഫ്ഐആറുകളിലായി കേസ് രജിസ്റ്റർ ചെയ്ത് അന്വേഷണം ആരംഭിച്ചിരിക്കുന്നത്.
ആദ്യ കേസിൽ പിണറായി വിജയൻ ഒന്നാം പ്രതിയായപ്പോൾ, രണ്ടാമത്തെ അഴിമതി-ഹവാല കേസിൽ മുൻ മന്ത്രി പി.എ. മുഹമ്മദ് റിയാസാണ് ഒന്നാം പ്രതി. രണ്ട് കേസുകളിലും ടി. വീണ രണ്ടാം പ്രതിസ്ഥാനത്തുണ്ട്. അതേസമയം വിജിലൻസ് കേസിലെ നിയമപരമായ പോരായ്മകൾ ചൂണ്ടിക്കാട്ടി ഹൈക്കോടതി സിംഗിൾ ബെഞ്ച് ഉത്തരവിനെതിരെ സുപ്രീം കോടതിയെയോ ഡിവിഷൻ ബെഞ്ചിനെയോ സമീപിക്കാനാണ് പിണറായി വിജയന്റെ തീരുമാനം. തന്റെ വാദം കേൾക്കാതെയാണ് സിംഗിൾ ബെഞ്ച് ഉത്തരവിറക്കിയതെന്നും, ലളിതകുമാരി കേസിലെ വിധിക്കെതിരാണ് ഈ നടപടിയെന്നും ചൂണ്ടിക്കാട്ടി എഫ്ഐആർ റദ്ദാക്കണമെന്ന് ആവശ്യപ്പെട്ട് അദ്ദേഹം നാളെ തന്നെ ഹർജി നൽകിയേക്കും.
