തിരുവനന്തപുരം: അനധികൃതമായി സമ്പാദിച്ച പണം വെളുപ്പിക്കുന്നതിനായി പിണറായി വിജയന്റെ മകൾ ടി. വീണ ദുബായിൽ ബിനാമി ഷെൽ കമ്പനി ഉണ്ടാക്കാൻ ശ്രമിച്ചതായി വിജിലൻസ് എഫ്.ഐ.ആറിൽ ഗുരുതര ആരോപണം.ഇതിന്റെ ഭാഗമായി 2024-ൽ വീണ നാലുതവണ ദുബായ് സന്ദർശിച്ചതായും റിപ്പോർട്ടിൽ വ്യക്തമാക്കുന്നു. കേസിലെ ആറാം പ്രതിയായ ഫൈജാസിനെ മുൻനിർത്തിയാണ് ഷെൽ കമ്പനി രൂപീകരിക്കാൻ നീക്കം നടത്തിയത്. മകനോട് നിർദ്ദേശിച്ച കമ്പനിയുടെ പേര് വാട്സാപ്പിലൂടെ ആരാഞ്ഞതിന്റെ രേഖകളും ഇ.ഡി നേരത്തെ ശേഖരിച്ചിരുന്നു.ഇതിനായി മന്ത്രി പി.എ. മുഹമ്മദ് റിയാസും ദുബായിലേക്ക് യാത്ര നടത്തിയതായി വിജിലൻസ് എഫ്.ഐ.ആറിൽ ചൂണ്ടിക്കാണിക്കുന്നു.
വീണയുടെ വസതിയിൽ നടത്തിയ പരിശോധനയിൽ പിടിച്ചെടുത്ത ഡയറിയിൽ നിന്ന് ഫൈജാസിന് വലിയ തുകകൾ കൈമാറിയതിന്റെ കണക്കുകൾ അന്വേഷണ സംഘത്തിന് ലഭിച്ചിട്ടുണ്ട്. ഇതിൽ 2,82,600 ദിർഹം നിക്ഷേപിച്ചതായും, 1,46,600 ദിർഹം ഫൈജാസിന് അയച്ചതായും, നാട്ടിൽ നിന്ന് ഹവാല മാർഗ്ഗത്തിലൂടെ 85 ലക്ഷം രൂപ കൈമാറിയതായും രേഖപ്പെടുത്തിയിട്ടുണ്ട്. ഇതിനുപുറമേ, ഇ.ഡി കണ്ടെടുത്ത കൈയെഴുത്തു കുറിപ്പുകളിൽ റിയാസിനു വേണ്ടി സൂക്ഷിച്ച കണക്കുകളാണുള്ളതെന്നും വിജിലൻസ് പറയുന്നു. റിയാസിന്റെ സുഹൃത്തുക്കളായ ഷൈജൽ, പി. നിഖിൽ, ഹസ്സൻ വാരീഷ് എന്നിവരുടെ പേരുകളിലും വിദേശത്തേക്ക് പണം കടത്തിയതിന്റെയും ഇടപാടുകൾ നടത്തിയതിന്റെയും വ്യക്തമായ വിവരങ്ങളുണ്ട്.
ദുബായ് ആസ്ഥാനമായുള്ള വസ്ത്ര കയറ്റുമതി ബിസിനസുമായി ബന്ധപ്പെട്ട ചർച്ചകളുടെ തെളിവുകളും റെയ്ഡിൽ കണ്ടെടുത്തിട്ടുണ്ട്. സി.എം.ആർ.എൽ അഴിമതിക്കേസിൽ ഇ.ഡി കൈമാറിയ നിർണ്ണായക വിവരങ്ങളുടെ അടിസ്ഥാനത്തിലാണ് വിജിലൻസ് രണ്ട് പ്രത്യേക എഫ്.ഐ.ആറുകൾ രജിസ്റ്റർ ചെയ്ത് അന്വേഷണം ശക്തമാക്കിയിരിക്കുന്നത്. മുഖ്യമന്ത്രിയുടെ മകളും കുടുംബവും ഉൾപ്പെട്ട പുതിയ ഹവാല – ഷെൽ കമ്പനി വെളിപ്പെടുത്തലുകൾ സംസ്ഥാന രാഷ്ട്രീയത്തിൽ വൻ കൊടുങ്കാറ്റായി മാറിക്കഴിഞ്ഞു.
