മൈതാനത്തിലെ റെക്കോർഡുകൾക്ക് പുറമെ വ്യവസായ ലോകത്തും പുതിയ വിപ്ലവം സൃഷ്ടിച്ച് മുൻ ഇന്ത്യൻ നായകൻ വിരാട് കോഹ്‌ലി. പ്രമുഖ സ്പോർട്സ് വെയർ ബ്രാൻഡായ പൂമയുമായുള്ള എട്ട് വർഷത്തെ 300 കോടി രൂപയുടെ കരാർ നീട്ടാനുള്ള വാഗ്ദാനം വേണ്ടെന്നുവെച്ചാണ് 37-ാം വയസ്സിൽ കോഹ്‌ലി സ്വന്തം ബിസിനസ്സ് സാമ്രാജ്യത്തിലേക്ക് ചുവടുവെക്കുന്നത്.
സേഫ് ഓപ്ഷനുകൾ മാറ്റിവെച്ച് സ്പോർട്സ് ബ്രാൻഡായ ‘അജിലിറ്റാസ് സ്പോർട്സിൽ’ (Agilitas Sports) സ്വന്തം സമ്പാദ്യത്തിൽ നിന്ന് 40 കോടി രൂപ നിക്ഷേപിച്ച കോഹ്‌ലി, ‘വൺ8വേൾഡ്’ (one8world) ബ്രാൻഡിന്റെ സഹസ്ഥാപകനുമായി മാറിയിരിക്കുകയാണ്. ഇതിന് പിന്നാലെ ഔദ്യോഗികമായി ലിങ്ക്ഡ്ഇനിൽ (LinkedIn) അക്കൗണ്ട് ആരംഭിച്ച താരം തന്റെ പുതിയ ബിസിനസ്സ് കാഴ്ചപ്പാടുകൾ പങ്കുവെക്കുകയും ചെയ്തു.
ഇന്ത്യയിൽ എല്ലാ കായിക ഇനങ്ങളും ആഘോഷിക്കപ്പെടുന്ന ഒരു കാലമാണ് താൻ സ്വപ്നം കാണുന്നതെന്നും, ആഗോളതലത്തിൽ ഉൽപ്പാദനം മുതൽ വിതരണം വരെ നീളുന്ന ഒരു സമ്പൂർണ്ണ സ്പോർട്സ് പ്ലാറ്റ്‌ഫോം ഇന്ത്യയിൽ നിന്ന് കെട്ടിപ്പടുക്കുകയാണ് തന്റെ ലക്ഷ്യമെന്നും കോഹ്‌ലി ആദ്യ പോസ്റ്റിൽ കുറിച്ചു. അതിരുകൾ ലംഘിച്ച് ചിന്തിക്കുന്നതിലൂടെയും പുതിയ മാനദണ്ഡങ്ങൾ സൃഷ്ടിക്കുന്നതിലൂടെയുമാണ് വളർച്ചയുണ്ടാകുന്നതെന്നും, വരുംതലമുറകൾക്ക് കൂടി ഉപകാരപ്പെടുന്ന വലിയൊരു സംരംഭം കെട്ടിപ്പടുക്കുകയാണ് തങ്ങളുടെ ലക്ഷ്യമെന്നും അദ്ദേഹം വ്യക്തമാക്കി.
പൂമ ഇന്ത്യ മുൻ മാനേജിംഗ് ഡയറക്ടർ അഭിഷേക് ഗാംഗുലി, അതുൽ ബജാജ്, അമിത് പ്രഭു എന്നിവർ ചേർന്ന് 2023-ൽ തുടക്കമിട്ട അജിലിറ്റാസ്, കായിക ഉൽപ്പന്നങ്ങളുടെ ഡിസൈനിംഗ്, നിർമ്മാണം, റീട്ടെയിൽ വിൽപ്പന എന്നിവ ഏകോപിപ്പിച്ചാണ് പ്രവർത്തിക്കുന്നത്.
