ജയ്പൂർ/ശ്രീഗംഗാനഗർ: രാജസ്ഥാനിലെ ഇന്ത്യ-പാകിസ്ഥാൻ അതിർത്തിയിൽ ഡ്രോൺ വഴി വൻതോതിൽ ആയുധങ്ങളും സ്ഫോടകവസ്തുക്കളും കടത്താനുള്ള പാകിസ്ഥാന്റെ ശ്രമം അതിർത്തി രക്ഷാ സേനയും (BSF) സംസ്ഥാന പോലീസും ചേർന്ന് തകർത്തു. ശ്രീഗംഗാനഗർ ജില്ലയിലെ റാവ്ല മാണ്ഡി (Rawla Mandi) അതിർത്തി മേഖലയിൽ തിങ്കളാഴ്ച അർദ്ധരാത്രിയോടെയാണ് അതിർത്തി കടന്നെത്തിയ പാക് ഡ്രോൺ സ്ഫോടകവസ്തുക്കളും മാരകായുധങ്ങളും അടങ്ങിയ പാക്കറ്റുകൾ താഴേക്ക് വീഴ്ത്തിയത്. രാജ്യത്ത് വൻ സ്ഫോടന പരമ്പരകൾ ലക്ഷ്യമിട്ടാണ് ഈ ആയുധങ്ങൾ എത്തിച്ചതെന്നാണ് സുരക്ഷാ ഏജൻസികളുടെ പ്രാഥമിക നിഗമനം.
ഏഴ് കിലോഗ്രാം വിനാശകാരിയായ സ്ഫോടകവസ്തുക്കൾ (RDX/IED സംശയിക്കുന്നത്), രണ്ട് വിദേശ നിർമ്മിത പിസ്റ്റളുകൾ, നാല് മാഗസിനുകൾ, 650 റൗണ്ട് തിരകൾ, റിമോട്ട് കണ്ട്രോൾ ഉപകരണങ്ങൾ, ബാറ്ററികൾ എന്നിവയാണ് അതിർത്തി സുരക്ഷാ സേനയും (BSF), രാജസ്ഥാൻ ആന്റി നാർക്കോട്ടിക് ടാസ്ക് ഫോഴ്സും (ANTF), പ്രാദേശിക പോലീസും ചേർന്ന് നടത്തിയ തെരച്ചിലിൽ പിടിച്ചെടുത്തത്. ഡ്രോൺ വഴി വീഴ്ത്തിയ ആയുധ ശേഖരം കൈപ്പറ്റാൻ അതിർത്തി ഗ്രാമത്തിൽ എത്തിയ രണ്ട് പഞ്ചാബ് സ്വദേശികളെ സുരക്ഷാ സേന തടഞ്ഞുവെച്ച് കസ്റ്റഡിയിലെടുത്തു. ജലന്ധർ, ഫിറോസ്പൂർ മേഖലകളിൽ നിന്നുള്ള യുവാക്കളാണ് പി പിടിയിലായതെന്ന് ഉദ്യോഗസ്ഥർ സ്ഥിരീകരിച്ചിട്ടുണ്ട്.
ലഹരിമരുന്ന് കടത്താനെന്ന വ്യാജേന ആയുധങ്ങളും സ്ഫോടകവസ്തുക്കളും എത്തിച്ച് രാജ്യത്തിന്റെ വിവിധ ഭാഗങ്ങളിൽ ആക്രമണം നടത്താനായിരുന്നു പദ്ധതിയിട്ടിരുന്നത്. രാജസ്ഥാനിൽ നിന്ന് പഞ്ചാബിലേക്കോ മറ്റ് പ്രമുഖ നഗരങ്ങളിലേക്കോ ആയുധങ്ങൾ കൈമാറാനാണോ നീക്കം നടന്നതെന്ന് കേന്ദ്ര അന്വേഷണ ഏജൻസികൾ പരിശോധിച്ച് വരികയാണ്. സംഭവത്തെ തുടർന്ന് ശ്രീഗംഗാനഗർ, അനൂപ്ഗഡ്, റാവ്ല മാണ്ഡി തുടങ്ങിയ അതിർത്തി മേഖലകളിൽ ബിഎസ്എഫ് പട്രോളിംഗും നിരീക്ഷണവും കടുപ്പിച്ചിട്ടുണ്ട്. പിടിച്ചെടുത്ത സ്ഫോടകവസ്തുക്കളുടെ കൂടുതൽ വിവരങ്ങൾ അറിയാൻ ജയ്പൂരിൽ നിന്നുള്ള പ്രത്യേക ബോംബ് സ്ക്വാഡും ഫൊറൻസിക് സംഘവും സ്ഥലത്തെത്തിയിട്ടുണ്ട്.
