ദേശീയ തലസ്ഥാനത്ത് തെരഞ്ഞെടുപ്പ് കമ്മീഷനെതിരെ കോൺഗ്രസും സഖ്യകക്ഷികളും ചേർന്ന് നടത്തിയ പ്രതിഷേധ മാർച്ചിൽ ലോക്സഭാ പ്രതിപക്ഷ നേതാവ് രാഹുൽ ഗാന്ധിയുടെ കടുത്ത ധാർഷ്ട്യവും അപമര്യാദയായ പെരുമാറ്റവും തുറന്നുകാട്ടി ബിജെപി നേതാക്കൾ. പ്രതിഷേധ പ്രകടനത്തിനിടയിൽ കർണാടക മുഖ്യമന്ത്രി ഡി.കെ. ശിവകുമാറുടെ കോളറിൽ പിടിച്ച് വലിക്കുന്ന രാഹുൽ ഗാന്ധിയുടെ ദൃശ്യങ്ങൾ സമൂഹമാധ്യമങ്ങളിൽ വൈറലായതോടെ കോൺഗ്രസ് നേതൃത്വത്തിനെതിരെ വൻ പ്രതിഷേധമാണ് ഉയർന്നിരിക്കുന്നത്. സംഭവത്തിൽ രാഹുൽ ഗാന്ധിക്കെതിരെ തുറന്നടിയുമായി അസം മുഖ്യമന്ത്രി ഹിമന്ത ബിശ്വ ശർമ്മ രംഗത്തെത്തി.
കർണാടക മുഖ്യമന്ത്രി എന്നത് വെറുമൊരു വ്യക്തിയല്ലെന്നും, അത് സമ്പന്നമായ ചരിത്രവും സംസ്കാരവുമുള്ള ഒരു സംസ്ഥാനത്തിന്റെ ഭരണഘടനാ പദവിയും മുഖവുമാണെന്ന് ഹിമന്ത ബിശ്വ ശർമ്മ ഓർമ്മിപ്പിച്ചു. പരസ്യമായി ഇത്തരത്തിലുള്ള അപമാനം നേരിട്ടിട്ടും കർണാടക മുഖ്യമന്ത്രി ഇത് എങ്ങനെ സഹിക്കുന്നുവെന്ന് അദ്ദേഹം ചോദിച്ചു. രാഹുൽ ഗാന്ധിയുടെ പുതിയ ‘റീഇൻവെൻഷൻ’ നാടകങ്ങൾക്കൊന്നും അദ്ദേഹത്തിന്റെ ഉള്ളിലെ ജനാധിപത്യവിരുദ്ധമായ അഹങ്കാരത്തെ മറച്ചുവെക്കാൻ കഴിയില്ലെന്നും ഹിമന്ത എക്സിൽ കുറിച്ചു. ഏത് മുഖംമൂടി അണിഞ്ഞാലും രാഹുൽ ഗാന്ധിയുടെ യഥാർത്ഥ മുഖം ഇതാണെന്നും അദ്ദേഹം പരിഹസിച്ചു.
2015-ൽ താൻ കോൺഗ്രസ് വിടാൻ ഉണ്ടായ സാഹചര്യം ഓർമ്മിപ്പിച്ചുകൊണ്ടാണ് ഹിമന്ത ബിശ്വ ശർമ്മ രാഹുൽ ഗാന്ധിയുടെ ഈ പെരുമാറ്റത്തെ വിമർശിച്ചത്. അന്നത്തെക്കാലത്ത് രാഹുൽ ഗാന്ധിയുടെ ഇത്തരം അപമാനങ്ങളും ധാർഷ്ട്യവും ഒരു അഭിമാനിയായ അസമീസ് എന്ന നിലയിൽ താൻ സഹിക്കാൻ തയ്യാറായില്ലെന്നും, അതിന്റെ ഫലമായിട്ടാണ് പാർട്ടി വിടേണ്ടി വന്നതെന്നും അദ്ദേഹം വ്യക്തമാക്കി.
