ഇന്ത്യ-വെസ്റ്റ് ഇന്‍ഡീസ് നാലാം ട്വന്റി-20 പോരാട്ടത്തിലെ അവസാന ഓവറില്‍ പരിക്കേറ്റ അര്‍ഷ്ദീപ് സിംഗിന് നേരെ വെസ്റ്റ് ഇന്‍ഡീസ് പേസര്‍ ഷമര്‍ ജോസഫ് തുടര്‍ച്ചയായി ബോഡി ലൈന്‍ പന്തുകള്‍ എറിഞ്ഞതിനെതിരെ മുന്‍ ഇന്ത്യന്‍ താരം സുനില്‍ ഗവാസ്കറും ശ്രീവത്സ ഗോ സ്വാമിയും കടുത്ത വിമര്‍ശനവുമായി രംഗത്തെത്തി.
ഹൈദരാബാദില്‍ നടന്ന മത്സരത്തിന്റെ അവസാന ഓവറില്‍ 35 റണ്‍സ് ജയിക്കാന്‍ വേണമെന്നിരിക്കെയാണ് അര്‍ഷ്ദീപിന്റെ ഇടതു തോളില്‍ ജോസഫിന്റെ പന്തേല്‍ക്കുന്നത്. കടുത്ത വേദന അനുഭവപ്പെട്ടിട്ടും ബാറ്റിങ് തുടര്‍ന്ന അര്‍ഷ്ദീപിന് നേരെ വിക്കറ്റ് ലക്ഷ്യമാക്കി പന്തെറിയുന്നതിന് പകരം ശരീരത്തിലേക്ക് വീണ്ടും പന്തെറിയാന്‍ ശ്രമിച്ചതാണ് ഗവാസ്‌കറെ ചൊടിപ്പിച്ചത്. ബാറ്റര്‍ ക്രീസില്‍ നിന്ന് മാറിനില്‍ക്കുമ്പോള്‍ സ്റ്റമ്പിലേക്ക് എറിയുന്നതിന് പകരം ശരീരത്തെ ലക്ഷ്യം വെക്കുന്നത് ശരിയായ രീതിയില്ലെന്ന് ഗവാസ്‌കര്‍ അഭിപ്രായപ്പെട്ടു. വേദന കാരണം അര്‍ഷ്ദീപ് റിട്ടയര്‍ ഹര്‍ട്ട് ചെയ്ത് മടങ്ങിയതോടെ ഇന്ത്യയുടെ ഇന്നിങ്‌സ് 19.3 ഓവറില്‍ അവസാനിക്കുകയായിരുന്നു.
ഷമര്‍ ജോസഫിന്റെ പ്രവൃത്തി കായിക വിനോദത്തിന്റെ മര്യാദകള്‍ക്ക് നിരക്കാത്തതാണെന്നും അര്‍ഷ്ദീപിനെ ബോധപൂര്‍വ്വം പരിക്കേല്‍പ്പിക്കാനാണ് ശ്രമിച്ചതെന്ന് തോന്നിയെന്നും മുന്‍ ഇന്ത്യന്‍ വിക്കറ്റ് കീപ്പര്‍ ശ്രീവത്സ ഗോ സ്വാമി എക്സില്‍ കുറിച്ചു. അത്തരം ഒരു ഘട്ടത്തില്‍ നിന്ന് അര്‍ഷ്ദീപ് ഇന്ത്യയെ ജയിപ്പിക്കില്ലെന്ന് ഉറപ്പായിരുന്നിട്ടും തുടര്‍ച്ചയായി ബോഡി ലൈന്‍ പന്തുകള്‍ എറിഞ്ഞത് അംഗീകരിക്കാനാവില്ലെന്ന് അദ്ദേഹം വ്യക്തമാക്കി.
പരിക്കേറ്റ അര്‍ഷ്ദീപ് തോളില്‍ ഐസ് പാക്ക് വെച്ച് വിശ്രമിക്കുകയാണെന്നും ബാംഗ്ലൂരില്‍ നടക്കുന്ന അഞ്ചാം മത്സരത്തിന് മുന്‍പ് താരം സുഖം പ്രാപിക്കുമെന്നാണ് പ്രതീക്ഷയെന്നും വൈസ് ക്യാപ്റ്റന്‍ സഞ്ജു സാംസണ്‍ മത്സരശേഷം അറിയിച്ചു. പരമ്പര നിലവില്‍ 2-2 എന്ന നിലയില്‍ സമനിലയിലായതോടെ ശനിയാഴ്ച ചിന്നസ്വാമി സ്റ്റേഡിയത്തില്‍ നടക്കുന്ന അവസാന മത്സരം പരമ്പര ജേതാക്കളെ തീരുമാനിക്കും.
